🌹 “ഇന്നത്തെ ചിന്താവിഷയം” 🌹 – 2024 | ജൂലൈ 14 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

പുറം കാഴ്ചകളിൽ മതിമറക്കരുത്
——————————————————–

ഒരു യുവതി, താൻ പുതുതായി എടുത്ത തീരുമാനം ഗുരുവിനോടു പറഞ്ഞു: “ഇനി ഒരിക്കലും ഞാൻ ദേവാലയത്തിൽ പോകുന്നില്ല. അവിടെ നടക്കുന്നതൊന്നും ശരിയല്ല. കുറെ ആളുകൾ മൊബൈലിൽ സംസാരിച്ചു കൊണ്ടിരിക്കുന്നു.കുറച്ചു പേർ പുറത്തേക്കു നോക്കിയിരിക്കുന്നു. മറ്റു ചിലർ പരദൂഷണം പറയുന്നു”.

യുവതിയുടെ കൈയ്യിൽ ഒരു ഗ്ലാസ്സു നിറയെ വെള്ളം കൊടുത്തിട്ട് ഗുരു പറഞ്ഞു: “ഈ ഗ്ലാസ്സുമായി, ആശ്രമത്തിനു ചുറ്റും രണ്ടു തവണ വലം വയ്ക്കുക. ഒരു തുള്ളി വെള്ളം പോലും താഴെ പോകരുത് “. ഗുരു പറഞ്ഞതു പോല, യുവതി ചെയ്തു. വെള്ളം ഒട്ടും കളയാതെ അവർ ഗ്ലാസ്സുമായി തിരിച്ചെത്തി. ഗുരു ചോദിച്ചു: “ഗ്ലാസ്സുമായി പോയപ്പോൾ, മറ്റെന്തെങ്കിലും കണ്ടോ? ആരുടെയെങ്കിലും ഫോൺ ബെല്ലടി ശ്രദ്ധിച്ചോ? ആരെങ്കിലും പരദുഷണം പറയുന്നതു കേട്ടോ?”

യുവതിയുടെ മറുപടി: “അതെങ്ങനെയാണു കേൾക്കുക; ഞാൻ ഗ്ലാസ്സിലെ വെള്ളം മാത്രം ശ്രദ്ധിച്ചല്ലെ, നടന്നത് ?” ഗുരു പറഞ്ഞു: ” ദേവാലയത്തിൽ പോകുമ്പോൾ, ദൈവത്തെ മാത്രം ശ്രദ്ധിക്കൂ. മറ്റൊന്നും കാണുകയും കേൾക്കുകയുമില്ല”.

ഓരോ സ്ഥലത്തിനും അതിൻ്റേതായ ഉദ്ദേശ്യങ്ങളുണ്ട് . സ്ഥലമറിഞ്ഞു പെരുമാറാനാകണം. ഏതിലാണോ ശ്രദ്ധ, അതാണ് കണ്ണിൽപ്പെടുക; മനസ്സിൽ പതിയുക. പരിസരം വീക്ഷിക്കുന്നതും, അറിയുന്നതും തെറ്റല്ല. പക്ഷെ, പുറം കാഴ്ചകളിൽ മതിമറന്നു പോകരുത്. എവിടേയ്ക്കാണു വന്നതെന്നും, എന്തിനാണു വന്നതെന്നും മറന്നു പോകരുത്. അതിൽ നിന്നും ശ്രദ്ധ പതറാൻ ഒരിക്കലും ഇടയാകരുത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര