🌹 “ഇന്നത്തെ ചിന്താവിഷയം” 🌹 – 2024 | ജൂൺ 29 | ശനി ✍ പ്രൊഫസ്സർ എ.വി. ഇട്ടി മാവേലിക്കര

ജയപരാജയങ്ങൾക്കും അപ്പുറം
————————————————–

യുദ്ധമുഖത്തു വച്ചു കാണാതായ സഹയോദ്ധാവിനെ കണ്ടെത്താൻ ഒരു സൈനീകൻ തൻ്റെ ഓഫീസറുടെ അനുവാദം തേടി. “ഒരു പക്ഷെ, ഇതിനകം മരിച്ചു കഴിഞ്ഞ ഒരാൾക്കു വേണ്ടി താങ്കളുടെ ജീവൻ കൂടി നഷ്ടപ്പെടുത്തുന്നതിൽ എനിക്കു താൽപര്യമില്ല” എന്നു പറഞ്ഞ് ഓഫീസർ അയാളെ നിരുത്സാഹപ്പെടുത്തിയെങ്കിലും, ആ സൈനീകൻ കൂട്ടുകാരനെ അന്വേഷിച്ചു പോയി. ഏറെ നേരം കഴിഞ്ഞ് അയാൾ സുഹൃത്തിൻ്റെ മൃതദേഹവുമായി തിരിച്ചെത്തി. അയാൾക്കും മാരകമായ മുറിവേറ്റിരുന്നു.

ഓഫീസർ ദേഷ്യത്തോടെ ചോദിച്ചു: “ഒരു മൃതദേഹവുമായി വന്നിട്ടെന്തു നേട്ടമുണ്ടായി? എനിക്കിപ്പോൾ രണ്ടു പേരേയാണു നഷ്ടമാകുക!”. അയാൾ പറഞ്ഞു: “നേട്ടമാണു സാർ സംഭവിച്ചത്. ഞാൻ ചെന്നപ്പോൾ, അദ്ദേഹത്തിനു ജീവനുണ്ടായിരുന്നു. മാത്രവുമല്ല, ഞാൻ മരിക്കുന്നതിനു മുമ്പു നീ വരുമെന്നെനിക്ക് ഉറപ്പുണ്ടായിരുന്നു എന്നയാൾ പറയുകയും ചെയ്തു”.

നേട്ടങ്ങളുടെ കണക്കു പുസ്തകം വച്ചു മാത്രം, ജീവിതത്തിനു വിലയിടുന്നവർ, സൗഹൃദത്തെ ഏതു കോളത്തിൽ അടയാളപ്പെടുത്തും: വരവിൻ്റെയോ, ചെലവിൻ്റെയോ? അക്കംകൊണ്ടും അർത്ഥംകൊണ്ടും പകരം വയ്ക്കാനാവാത്ത ഒരു ഇഴയടുപ്പം സൗഹൃദത്തിനുണ്ട്. കണ്ണടയ്ക്കുന്നതിനു മുമ്പു പ്രത്യക്ഷനാകുന്ന ആത്മസുഹൃത്തായിരിക്കും, ഒരാളുടെ ജീവിത്തിൽ കാണാനാകുന്ന ഏറ്റവും വില പിടിപ്പുള്ള കാഴ്ച.

സ്വന്തം തട്ടകത്തിൽ വീണു കിടക്കുന്നവനെ രക്ഷപെടുത്താന്നുള്ള ആഗ്രഹത്തെ, എതിർ പാളയത്തിൽ എഴുന്നേറ്റു നിൽക്കുന്നവനെ വീഴ്ത്താനുള്ള വാഞ്ച മറികടക്കുമ്പോൾ, എല്ലാ മനുഷീക ഭാവങ്ങളും നഷ്ടപ്പെടുകയാണ്. സ്വന്തം ചിന്തകളാലും കാഴ്ചപ്പാടുകളാലും മാത്രം കെട്ടിയുയർത്തിയ മതിലുകൾക്ക് ഇരുപുറവും നിന്നു കലഹിക്കുന്നവർ, തൊട്ടടുത്ത് കാൽ കുഴഞ്ഞു വീഴുന്നവരെ കാണാതെ പോകരുത്. ഒരാളുടെ ജീവൻ്റെ വിലയ്ക്കു പകരമാവില്ല, ഒരു ജയവും പരാജയവും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര