🌹 “ഇന്നത്തെ ചിന്താവിഷയം” 🌹 – 2024 | നവംബർ 01 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

നമുക്ക് അപര മനസ്സിൽ ഇടം പിടിക്കാനാകട്ടെ
———————————————————————

ടീച്ചർ, താൻ പഠിപ്പിച്ചിരുന്ന ഒരു വിദ്യാർത്ഥിയുടെ മാതാപിതാക്കളെ വിളിച്ചു വരുത്തി, തലേ ദിവസം അയാൾ വരച്ച ഒരു ചിത്രം കാണിച്ച ശേഷം പറഞ്ഞു: “നിങ്ങൾ ഈ പടത്തിലേക്കൊന്നു നോക്കൂ. ‘എൻ്റെ വീട് ‘ എന്ന വിഷയത്തിൽ, നിങ്ങളുടെ മകൻ വരച്ച ചിത്രമാണിത് “.

അവർ കുറേ നേരം നോക്കിയിട്ടും, ആ ചിത്രത്തിൽ അരുതാത്തതൊന്നും കണ്ടില്ല.
അവരുടെ നോട്ടത്തിൽ, എല്ലാം മനോഹരമായിരുന്നു. വീടും, ചുറ്റുപാടുകളും,
കൃഷികളും, അവൻ്റെ ചേട്ടനും, വേലക്കാരിയുമെല്ലാം ചിത്രത്തിലുണ്ട്. അവർ അദ്ധ്യാപികയോടു ചോദിച്ചു: “ഈ ചിത്രത്തിനു് എന്താണു കുഴപ്പം?” ടീച്ചർ പറഞ്ഞു: ” ചിത്രത്തിന് ഒരേയൊരു കുഴപ്പമേയുള്ളു. അതിൽ നിങ്ങളില്ല!”

ഒരു കുറവും കൂടാതെ വച്ചുവിളമ്പി നൽകുന്ന ഭക്ഷണത്തിനിടയിലൂടെയും, അറിയാതെ ചോർന്നു പോകുന്ന ചില മൂല്യങ്ങളുണ്ട്. വളർത്തലിലും പരിശീലനത്തിലും സംഭവിക്കുന്നവയാണവ. ഇഷ്ടപ്പെട്ടതെല്ലാം വെട്ടിപ്പിടിച്ചു നൽകാനുള്ള തിടുക്കത്തിൽ, ഏറെ ആവശ്യമുള്ളതു്ത് എന്താണാവോ അത് മക്കൾക്കു പകർന്നു നൽകാൻ മാതാപിതാക്കൾ മറന്നു പോകുന്നു. ചെറുപ്രായത്തിൽത്തന്നെ കുഞ്ഞുങ്ങൾക്കു ലഭിക്കേണ്ട ചില അനുഭവങ്ങളും, അവബോധങ്ങളുമുണ്ട് . അവയ്ക്കു പകരം, ഹൃദയത്തിൽ ഇടം തേടുന്നത്, കല്ലും, മണ്ണും, കെട്ടിടവും, കൃഷിയും മാത്രമാണെങ്കിൽ, വളർത്തലിൽ എവിടെയോ പിഴച്ചു എന്നു തിരിച്ചറിയാനാകണം.

വർഷങ്ങളായി കൂടെ ജീവിച്ചിട്ടും, നാളുകളായി ഒരുമിച്ചു പാർത്തിട്ടും, ഉണ്ടുറങ്ങിയിട്ടും, അപര മനസ്സുകളിൽ ഇടം പിടിക്കാനായില്ലെങ്കിൽ, ബന്ധങ്ങളിൽ എവിടെയോ പാളിച്ചകൾ സംഭവിച്ചിട്ടുണ്ടെന്നു തീർച്ച. പുതിയ സമവാക്യങ്ങൾ രൂപീകരിക്കണ്ടതുണ്ടെന്നാണ് , അതിനർത്ഥം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര