🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 13 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

പരസ്പരം അറിയാതെ പോകുന്നവർ
———————————————————-

സ്വന്തം ദേശത്ത് വർഗ്ഗീയ കലാപങ്ങൾ അരങ്ങേറുമ്പോൾ, വിരുദ്ധ ചേരികളിലുള്ളവർക്ക് സ്വന്തം വീട്ടിൽ സംരക്ഷണം നൽകിയിരുന്ന ഒരു മനുഷ്യനുണ്ടായിരുന്നു. ഒരു ലഹളക്കാലത്ത് അയാൾ എതിർ ചേരിയിലുണ്ടായിരുന്ന ഓരോരുത്തരെ, തൻ്റെ വീട്ടിൽ സംരക്ഷണം നൽകി പാർപ്പിച്ചിരുന്നു. അവർ സ്പരം കാണുകയോ, സംസാരിക്കുകയോ ചെയ്തിരുന്നില്ല. അവരുടെ എല്ലാ ആവശ്യങ്ങളും അയാൾ നിറവേറ്റിക്കൊടുത്തിരുന്നു. കുറച്ചു നാളുകൾക്കു ശേഷം അദ്ദേഹം മരിച്ചു. അന്നാ വീട്ടിൽ താമസിച്ചിരുന്ന ആ നിത്യവൈരികൾ കണ്ടുമുട്ടാനിടയായി. പരസ്പരം ആലിംഗ ബദ്ധരായി നിന്ന അവരേക്കണ്ട് അത്ഭുതം പൂണ്ട മറ്റാളുകളോട് അവർ പറഞ്ഞത് : “ഇത്, ഇത്രയും നാൾ ഞങ്ങളെ സംരക്ഷിച്ച, ഈ മനുഷ്യനോടുള്ള കൃതജ്ഞതയുടെ സൂചനയാണ്, എന്നാണ്!

യഥാർത്ഥ കരുണ കാണിക്കുന്നവരുടെ മുമ്പിൽ, ആരായാലും എളിമപ്പെട്ടു പോകുക തന്നെ ചെയ്യും. സ്വന്തം സുരക്ഷിതത്വം ഉപേക്ഷിച്ച്, സുഖാനുഭവങ്ങൾ പരിത്യജിച്ച് , അന്യൻ്റെ പാതയിൽ, വഴിവിളക്കുകളാകുന്നവരാണ്, യഥാർത്ഥ മനുഷ്യ സ്നേഹികൾ. നഷ്ടങ്ങളും, അപകട സാദ്ധ്യതകളും മുൻകൂട്ടി കണ്ടിട്ടും, അവയെ അവഗണിച്ച്, മറ്റുള്ളവർക്കു സംരക്ഷണമൊരുക്കുന്നവരുടെ മുമ്പിൽ, കൈകൂപ്പി നിൽക്കുകയല്ലാതെ, മറ്റെന്താണു മാർഗ്ഗം?

സന്മാർഗ്ഗം പഠിപ്പിക്കാൻ പുസ്തകങ്ങൾ രചിക്കുകയോ, പരീക്ഷകൾ നടത്തുകയോ, അല്ല വേണ്ടത്. ജീവിച്ചു കാണിക്കുകയാണതിനാവശ്യം. എത്ര ദേഷ്യപ്പെട്ടാലും, തിരികെ സൗമ്യമായി മാത്രം ഇടപെടുന്നവരോട്, ക്ഷിപ്രകോപികൾക്കെന്തു ചെയ്യാനാകും?

ചില പുണ്യങ്ങൾ, സമ്പർക്കങ്ങളെ ശ്രേഷ്ഠമാക്കും. അടുത്തു ജീവിക്കാൻ തുടങ്ങുമ്പോഴാണറിയുക, പരസ്പരം അകറ്റി നിർത്തിയിരുന്ന പല ഘടകങ്ങളും, അർത്ഥരഹിതമായിരുന്നുവെന്ന്. വ്യതസ്ഥങ്ങളായ കാരണങ്ങളുടെ പേരിൽ, വിദ്വേഷവും വെറുപ്പും വച്ചുപുലർത്തിയിരുന്നവർ, ഒരു ദിവസം ഒന്നിച്ചു ജീവിച്ചാൽ, പരസ്പരം അറിഞ്ഞാൽ, ഒരുപക്ഷെ, വർഷങ്ങളുടെ വൈര്യം അലിഞ്ഞില്ലാതാകുന്നതിനുള്ള കാരണമായി, അതു തീർന്നെന്നു വരാം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര