🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 07 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

കടന്നുവന്ന വഴികൾ മറക്കാതിരിക്കാം
———————————————————–

വളരെ നീതിനിഷ്ടനായിരുന്നു ഷംസുധിൻ ഷാ എന്ന പ്രമാണി. അദ്ദേഹത്തിന് ഒരു പ്രത്യേക സ്വഭാവമുണ്ടായിരുന്നു. ഗൗരവമുള്ള ഏതു തീരുമാനവും എടുക്കുന്നതിനു മുമ്പ് അദ്ദേഹം ഒരു ചെറിയ മുറിയിൽ കയറി കതകടയ്ക്കും. കുറച്ചു കഴിഞ്ഞ് , പുറത്തിറങ്ങി വന്ന് തീരുമാനം പ്രഖ്യാപിക്കും. പലരും അദ്ദേഹത്തിൻ്റെ ഈ സ്വഭാവത്തെ, സംശയദൃഷ്ടിയോടെയാണ് വീക്ഷിച്ചിരുന്നത്.

ഷാ മരിച്ചപ്പോൾ, ആ മുറിയിൽ എന്താണെന്നറിയാൻ എല്ലാവർക്കും ആഗ്രഹമുണ്ടായി. അകത്തു കയറിയവർ കണ്ടത്, കൂറെ കല്ലുകളും, ഒരു കവണയും മാത്രമായിരുന്നു. അതു കണ്ടമ്പരന്ന ആളുകളോട് ഷായുടെ സുഹൃത്തു പറഞ്ഞു: “ഷാ ജീവിതം തുടങ്ങിയത് ഒരു ഇടയ ബാലനായിട്ടായിരുന്നു. പിന്നിട്ട വഴികളെ ക്കുറിച്ച്, സ്വയം ഓർമ്മപ്പെടുത്താൻ വേണ്ടിയിട്ടായിരുന്നു, തീരുമാനങ്ങളെടുക്കുന്നതിനു മുമ്പ് അദ്ദേഹം ആ മുറിയിൽ കയറി, കതകടച്ചു ധ്യാനിച്ചിരുന്നത് “.

പിന്നോട്ടു നടക്കേണ്ടതില്ല; പിന്നിട്ട വികളെക്കുറിച്ച് ഓർമ്മയുണ്ടായിരുന്നാൽ മാത്രം മതി. ഒരിക്കലും മറക്കരുതാത്ത പാഠങ്ങളും, അനുഭവങ്ങളും, കൈവിളക്കായി കൂടെയുണ്ടെന്ന് ചില ഓർമ്മകൾ ഉറപ്പു വരുത്തും. മുൻപ് ആരായാരുന്നു എന്ന വസ്തുത ഇപ്പോൾ ആരാണെന്ന അവസ്ഥയെ എളിമപ്പെടുത്തും.

എല്ലാ തുടക്കവും, ചെറുതായിരിക്കും. എത്ര വലുതായിത്തീർന്നാലും, ആ തുടക്കത്തെ ബഹുമാനിക്കണം. ആരുടെയും ആദ്യ ചുവടുകളെ അവഹേളിക്കരുത്. അവർ എന്തായി തീരുമെന്ന്, അവർക്കോ നമുക്കോ പറയാനാകയില്ല. ആർക്കും എന്തുമായിത്തീരാം: തുടങ്ങാനുള്ള ധൈര്യവും, എത്തിച്ചേരാനുള്ള ആത്മവിശ്വാസവും എത്തിച്ചേർന്ന സ്ഥലങ്ങളോടു വിടപറയാനുള്ള ഒരുക്കവും ഉണ്ടായിരിക്കണമെന്നു മാത്രം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര