🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 18 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

തോറ്റു കൊടുക്കുന്നതിലെ വിജയം
——————————————————–

ഓട്ടത്തിൽ മിടുമിടുക്കനായ ഒരു കുട്ടിയുണ്ടായിരുന്നു. അവർ പങ്കെടുത്ത ഒരു ഗ്രാമീണ ഓട്ടമത്സരത്തിൽ, മറ്റുള്ളവരെയെല്ലാം തോൽപിച്ച് തലയെടുപ്പോടെ നിന്നു കൊണ്ടവൻ ചോദിച്ചു: “ഇനിയാരെങ്കിലും എന്നോട് മത്സരിക്കാനുണ്ടോ?” അവിടെയുണ്ടായിരുന്ന വയോധികനായ ഒരാൾ കൈ ഉയർത്തി. കുട്ടിക്കൊപ്പം മത്സരിച്ചോടാൻ അയാൾ രണ്ടു പേരേ നിർദ്ദേശിച്ചു: മറ്റൊരു വയോധികനും, ഒരു വയോധികയും.

മത്സരം തുടങ്ങി. മറ്റു രണ്ടു പേരും ഓടിയെത്തുന്നതിന് ഏറെ മുമ്പേ, കുട്ടി ഫിനീഷ് ചെയ്തു. പക്ഷെ, അത്രയും നേരം നിറഞ്ഞ കയ്യടിയോടെ, അവനെ പ്രോത്സാഹിപ്പിച്ചിരുന്നവരാരും അപ്പോൾ ആരവം മുഴക്കിയില്ല. അതിൽ അതിശയം തോന്നിയ അവൻ കാരണമന്വേഷിച്ചു.

വയോധികൻ പറഞ്ഞു: “നീ അവർ രണ്ടു പേരുടെ കൈകളും പിടിച്ച് അവരോടൊപ്പം ഓടൂ”. അവൻ അങ്ങനെ ചെയ്തു. അവർ മൂന്നു പേരും ഒരുമിച്ചോടി ഓട്ടം തീർത്തു. ആളുകൾ വീണ്ടും ഏറെ ഉച്ചത്തിൽ ഹർഷാരവം മുഴക്കി.

കുട്ടിക്ക് വീണ്ടും സംശയം: ആർക്കു വേണ്ടിയാണ് ജനക്കൂട്ടം കയ്യടിച്ചത് ? ആരാണ് വിജയിച്ചത് ? വൃദ്ധൻ പറഞ്ഞു:
” ഇതു വിജയിക്കുള്ള കയ്യടിയല്ല. അവരോടൊപ്പമോടിയ നിനക്കും, നിന്നോടൊപ്പം കൂടിയ അവർക്കുമുള്ള കയ്യടിയാണ്. നീ അവർക്കായി തോറ്റു കൊടുത്തതിനാൽ, യഥാർത്ഥ ക്രെഡിറ്റ് നിനക്കു തന്നെ!”

ജയിക്കാൻ മാത്രമല്ല, തോറ്റു കൊടുക്കാനും കൂടി നാം പഠിക്കണം. ജയിക്കാൻ വേണ്ട പരിശ്രമത്തേക്കാൾ വലുതാണ് തോറ്റു കൊടുക്കാൻ വേണ്ട മന:സാന്നിദ്ധ്യവും, തോൽവിയെ അംഗീകരിക്കാനുള്ള വൈകാരിക പക്വതയും.

നിലനിൽപിനു വേണ്ടി പോരാടുന്നവരേയല്ല നാം തോൽപിക്കേണ്ടത്. നമ്മുടെ എതിരാളികളെയെല്ലാം പോരാളികളായി നാം കാണേണ്ട കാര്യവുമില്ല. മത്സരക്ഷമതയുള്ളവരോടൊപ്പം സ്വന്തം വിജയത്തിനായി പോരാടുക. എന്നാൽ, പ്രപ്തിയില്ലാവരുടെ വിജയത്തിനായി അവരോടൊപ്പം നിന്ന് മറ്റുള്ളവരോടു പോരാടാനും നമുക്കാകണം.

എല്ലാ മത്സരങ്ങളിലും വിജയിക്കുന്നതിനേക്കാൾ ശ്രേഷ്ഠമാണ് ചില മത്സരങ്ങളിൽ മറ്റുള്ളവരെ ജയിക്കാൻ അനുവദിക്കും വിധം തോറ്റു കൊടുക്കുന്നതും. ജയിക്കുന്നവർ മാത്രമല്ല, ജേതാക്കളെ സൃഷ്ടിക്കുന്നവരും ജയാളികൾ തന്നെ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര