🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 14 | ശനി ✍ പ്രൊഫസ്സർ എ.വി. ഇട്ടി മാവേലിക്കര

വിവേകവും വിശ്വാസവും ഒന്നിച്ചു പോകണം
—————————————————————————-

ഒരു ചക്രവർത്തിയുടെ ജ്ഞാനിയും സമർത്ഥനുമായിരുന്ന പ്രധാനമന്ത്രി മരിച്ചതി നെത്തുടർന്ന്, മറ്റൊരാളെ കണ്ടെത്താൻ ചക്രവർത്തി തൻ്റെ ചില വിശ്വസ്ഥരെ നിയോഗിച്ചു. അവർ മൂന്നു പേരെ കണ്ടെത്തി. ഒരു ഗണിത ശാസ്ത്രജ്ഞൻ, ഒരു തത്വചിന്തകൻ, ഒരു യഥാർത്ഥ ദൈവ ഭക്തൻ.

ചക്രവർത്തി അവരോടു പറഞ്ഞു: “മൂന്നു ദിവസം നിങ്ങൾക്കു വിശ്രമിക്കാം. നാലാം ദിവസമായിരിക്കും പരീക്ഷ. ജയിക്കുന്നയാൾ എൻ്റെ പ്രധാനമന്ത്രിയാകും”. ശാസ്ത്രജ്ഞനും ചിന്തകനും ഉറങ്ങാതെയിരുന്നു പരീക്ഷയ്ക്കൊരുങ്ങി . എന്നാൽ, യഥാർത്ഥ ഭക്തൻ പരീക്ഷാഭീതിയൊന്നുമില്ലാതെ, സന്തോഷ ചിത്തനായിരുന്നു. നാലാം ദിവസം ചക്രവർത്തി മൂന്നു പേരേയും ഒരു മുറിയിലിട്ടു പൂട്ടിയിട്ടു പറഞ്ഞു: “ആദ്യം പൂട്ടു തുറന്നു പുറത്തു വരുന്നയാൾ വിജയി ആകും”.

ശാസ്ത്രജ്ഞനും ചിന്തകനും പൂട്ടു തുറക്കുന്നതിനേക്കുറിച്ചു ചിന്തിച്ച് അവശരായി. കുറച്ചു സമയം കഴിഞ്ഞു, രാജാവു മുറി തുറന്ന് ഉള്ളിലേക്കു വന്നിട്ടു പറഞ്ഞു: “ഇനി നിങ്ങൾ കഷ്ടപ്പെടേണ്ടാ. എനിക്കു വിജയിയെ കിട്ടിയിരിക്കുന്നു”. യഥാർത്ഥ ദൈവഭക്തൻ, രാജാവിൻ്റെ പുറകിൽ വിജയാഹ്ലാദത്തോടെ നിൽപുണ്ടായിരുന്നു. ഇതെങ്ങനെ സാധിച്ചുവെന്ന മറ്റു രണ്ടു പേരുടെയും ചോദ്യത്തിന് യഥാർത്ഥ ദൈവ ഭക്തൻ്റെ മറുപടി: “കതക് യഥാർത്ഥത്തിൽ പൂട്ടിയിട്ടില്ലായിരുവെന്ന കാര്യം, ഞാൻ ആദ്യമേ തന്നെ ശ്രദ്ധിച്ചിരുന്നു!”

ബുദ്ധിയുള്ളതുകൊണ്ടോ, വിയർപ്പൊഴുക്കിയതു കൊണ്ടോ മാത്രം, ജീവിത പരീക്ഷ വിജയിക്കണമെന്നില്ല. വിശ്വാസവും വിവേകവും കൂടി ഒപ്പമുണ്ടായിരിക്കണം. “താൻ പാതി; ദൈവം പാതി ” എന്നാണ് ജ്ഞാനമൊഴി.
ദൈവത്തോടൊത്തുചേർന്ന് ചിന്തിക്കാനും പ്രവർത്തിക്കാനും നമുക്കാകട്ടെ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര