🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 24 | ശനി ✍ പ്രൊഫസ്സർ എ.വി. ഇട്ടി മാവേലിക്കര

സാധാരണത്വത്തിലെ അസാധാരണത്വം
—————————————————————–

മികച്ച വേട്ടക്കാരനെന്നു സ്വയം അഹങ്കരിച്ചിരുന്ന അയാൾ, ഒരു ദിവസം പർവ്വതശൃംഗത്തിൽ താമസിച്ചിരുന്ന ശല്യക്കാരൻ വ്യാളിയെ പിടികൂടാൻ പുറപ്പെട്ടു. ദിവസങ്ങൾക്കു ശേഷം കൊടുമുടിയുടെ ഏറ്റവും ഉയർന്ന ഭാഗത്ത് ഒരു ഗുഹയിൽ മഞ്ഞിൽ തണുത്തുറഞ്ഞു കിടന്നിരുന്ന വ്യാളിയെ അയാൾ കണ്ടെത്തി. അതിനെ നാട്ടിലേക്കു കൊണ്ടു വന്ന അയാൾ, താനാണതിനെ കൊന്നതെന്ന പ്രഖ്യാപനവും നടത്തി. പെട്ടന്ന് എല്ലാവരുടെയും ആരാധനാ പാത്രമായി തീർന്നു അയാൾ.
ചില ദിവസങ്ങൾ കഴിഞ്ഞപ്പോൾ, നാട്ടിലെ ചൂടേറ്റ് വ്യാളി അതിൻ്റെ ശീതകാല നിദ്രയിൽ നിന്നുണർന്നു. കലിപൂണ്ടലറി വിളിച്ചുകൊണ്ട് ഒട്ടേറെപ്പേരെ അതു വകവരുത്തി. അവസാനം അതു വേട്ടക്കാരനേയും വിഴുങ്ങി.

അർഹതയുള്ളതിൽ മാത്രമേ അഭിമാനിക്കാവൂ. അബദ്ധത്തിൽ സംഭവിക്കുന്ന വിജയങ്ങൾ ആവർത്തിക്കപ്പെടണമെന്നില്ല. അനർഹമായ നേട്ടങ്ങൾക്ക് ദീർഘായുസ്സുണ്ടാകണമെന്നുമില്ല! മാത്രവുമല്ല, അതു ചിലപ്പോൾ അത്യാഹിതങ്ങൾ ക്ഷണിച്ചു വരുത്തിയെന്നും വരാം. പ്രസിദ്ധനാകേണ്ടത് പ്രവൃത്തികളുടെ സത്യസന്ധതയും ഗുണമേന്മയും കൊണ്ടാണ്. തൻ്റെ ചെയ്തികളുടെ ശ്രേഷ്ഠതയാണ് ഒരാളിൻ്റെ വൈശിഷ്ഠ്യം നിശ്ചയിക്കേണ്ടത്.

അത്ഭുതം കാണിച്ച് അതിമാനുഷരാകുന്നവർ, വളരെപ്പെട്ടന്ന് ആരാധനാപാത്രങ്ങളായി മാറി എന്നു വരും. എന്നാൽ, അത്ഭുതങ്ങളുടെ പുറകിലെ അടവുകൾ മറ്റുള്ളവർ തിരിച്ചറിയുന്ന നിമിഷം അവർ തികച്ചും അവഹേളിതരാകും.

അസാധാരണത്വം ഒരു സാധാരണ കാര്യമല്ല. അതേറെപ്പേർക്കു കൈവരിക്കാനുമാകില്ല. സാധാരണ ജീവിതത്തിലെ വിശ്വസ്തതയും വിശുദ്ധിയും ആർക്കും നേടിയെടുക്കാനാകും. അപ്രകാരം ജീവിച്ചു വിജയിക്കുകയെന്നതാണ് ഒരാളെ സാധരണക്കാരിലെ അസാധാരണക്കാരനാക്കുന്നത്.