🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 22 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

നിരർഥക സംവാദങ്ങൾ അവസാനിപ്പിക്കാം
—————————————————————–

ഒരു മൃതദേഹം സംസ്കാര സ്ഥലത്തേക്കു കൊണ്ടു പോകാനൊരങ്ങുകയായിരുന്നു. ആരോ ഒരാൾ ചോദിച്ചു: “മൃതദേഹത്തിൻ്റെ ഇടതു വശത്തു കൂടിയാണോ അതോ വലതു വശത്തുകൂടിയാണോ ആളുകൾ നടക്കേണ്ടത് ?” ഒരാൾ പറഞ്ഞു: ”ഇടതു വശത്തുകൂടി “. മറ്റൊരാൾ പറഞ്ഞു: “വലതു വശത്തു കൂടി!” അവിടെയുണ്ടായിരുന്നവർ രണ്ടു വിഭാഗമായി തിരഞ്ഞ് കലഹമായി. മൃതദേഹം എടുക്കുവാൻ സാധ്യമല്ലാതായി. അപ്പോഴാണ് വന്ദ്യവയോധികനായ ഒരാൾ വന്നത്. പ്രശ്നം കേട്ടശേഷം അദ്ദേഹം പറഞ്ഞു: “നിങ്ങൾ, നിങ്ങൾക്കു സൗകര്യമുള്ള ഏതെങ്കിലും വശത്തുകൂടി പോകുക. ഇല്ലെങ്കിൽ, നിങ്ങളിലാരെങ്കിലും കൂടെ, ഈ പെട്ടിയുടെ ഉള്ളിലാകും”.

അർഥരഹിതങ്ങളായ സംവാദങ്ങളാണ് അപരിഹാര്യങ്ങളായ പ്രശ്നങ്ങളെ സൃഷ്ടിക്കുന്നത്. നിരർഥകമായ ചോദ്യങ്ങൾക്ക് ഉത്തരങ്ങൾ ഉണ്ടാകില്ല. അവ ചിന്താക്കുഴപ്പം ഉണ്ടാക്കുകയേ ഉള്ളൂ. അർഥപൂർണ്ണമായ സംശയങ്ങളും സന്ദേഹങ്ങളുമാണ് ഗവേഷണങ്ങളിലേക്കും കണ്ടെത്തലുകളിലേക്കും നയിക്കുന്നത്. അനവസരത്തിലുള്ളതും, അനാവശ്യവുമായ ചോദ്യങ്ങൾ, പലപ്പോഴും കലാപത്തിനു പോലും കാരണമായി എന്നു വന്നേക്കാം.

സംവാദങ്ങൾക്കു സംവേദനക്ഷമതയുണ്ടായിരിക്കണം.
വൈകാരികതയായിരിക്കരുത് ആശയ വിനിമയത്തിൻ്റെ അടിസ്ഥാനം. സ്വന്തം കാഴ്ചപ്പാടുകളോടുള്ള അതിരു കടന്ന അഭിനിവേശം, സ്വതന്ത്ര ചിന്തകളെ വിലക്കാനേ സഹായിക്കൂ. നിഷ്പക്ഷ നിലപാടുകളിൽ ഉറച്ചു നിന്നു കൊണ്ടു വേണം, പ്രശ്നങ്ങൾക്കു പ്രതിവിധി കണ്ടെത്തുവാൻ. ആളുകളെ ഒന്നിപ്പിക്കാൻ പ്രേരിപ്പിക്കുന്ന ചിന്തകൾക്ക്, അവരെ പോരടിക്കുവാൻ കാരണമാകുന്ന ചിന്തകളേക്കാർ എപ്പോഴും മൂല്യമേറും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര