🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 21 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

മുമ്പോട്ടേക്കാണു നാം സഞ്ചരിക്കേണ്ടത്
————————————————————–

ഭാര്യ മരിച്ച് നാളുകൾക്കു ശേഷം, ഒരു ധനീകൻ ഒരു വിധവയെ വിവാഹം ചെയ്തു. എന്നാൽ, അവർ എപ്പോഴും മുൻ ഭർത്താവിനെക്കുറിച്ചാണു സംസാരിച്ചു കൊണ്ടിരുന്നത്. അത് അവർ തമ്മിൽ കലഹത്തിന് ഇടയാക്കി. ഒരിക്കൽ കലഹം മൂത്ത് അയാൾ തൻ്റെ ഭാര്യയെ മർദ്ദിക്കുന്നതിന് ഇടയായി. അന്നു തന്നെ അയാളുടെ ഭാര്യ, അയാളുടെ പിതാവിനോടു പരാതി പറഞ്ഞു. ചോദിക്കാൻ ചെന്ന പിതാവിനോട് അയാൾ പറഞ്ഞു: “അവൾ എപ്പോഴും, മുൻ ഭർത്താവിനെ പുകഴ്ത്തിക്കൊണ്ടിരുന്നാൽ, എനിക്കു ദേഷ്യം വരാതിരിക്കുമോ?”

പഴയതിനെയാണ് നാം തേടുന്നതെങ്കിൽ, പുറകോട്ടു നടക്കേണ്ടി വരും. കാലവും കാഴ്ചയും മുമ്പോട്ടു നീങ്ങുമ്പോൾ, നമ്മുടെ കാലുകൾ മാത്രം പിന്നോട്ടു ചലിക്കുന്നത് ഒരു വിരോധാഭാസമാണ്. ഓർമ്മകൾക്കൊരു വിനോദമുണ്ട് . അവ വേദനിപ്പിക്കുന്നവയെ എല്ലാം എടുത്തു മാറ്റുകയും, വിശിഷ്ടമായവയെ മാത്രം, സൂക്ഷിച്ചു വയ്ക്കുകയും ചെയ്യും. ഓർമ്മകൾ ഉണ്ടായിരിക്കണം. കടന്നു വന്ന വഴികളെയും കടന്നു പോയ അനുഭവങ്ങളെയും കുറിച്ചുള്ള ഓർമ്മൾ, മുമ്പോട്ടുള്ള യാത്രയിൽ നമുക്കു മുതൽക്കൂട്ടാകാം.. എന്നാൽ, അവയിൽ നാം തളച്ചിടപ്പെടരുത്. അവ, മുമ്പോട്ടുള്ള നമ്മുടെ ചലനം അസാദ്ധ്യമാക്കും.

അനിവാര്യമായ മാറ്റങ്ങളെ അംഗീകരിച്ച് ജീവിതത്തെ അതിൻ്റെ സ്വാഭാവികതയിൽ ഒഴുകാൻ നാം അനുവദിക്കണം. ഭൂതകാലത്തിൽ നാം എടുത്ത തീരുമാനങ്ങളെ ശരിവയ്ക്കുന്നത് അവയോടുള്ള പ്രതിബദ്ധതയിലൂടെയാണ്. അലോചനകൾ, അവസാന തീർപ്പിനു മുമ്പാകണം. പുനർവിചിന്തനങ്ങൾക്കു വേണ്ടി മാത്രമാണു നാം ജീവിക്കുന്നതെങ്കിൽ, ജീവിതം തന്നെ നിശ്ചലമാകും. മുമ്പോട്ടേക്കാണ് നാം സഞ്ചരിക്കേണ്ടത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര