📱വാർത്തകൾ ഒറ്റനോട്ടത്തിൽ📱 – 2024 | ഒക്ടോബർ 29 | ചൊവ്വ ✍ കപിൽ ശങ്കർ

🔹നീലേശ്വരം അഞ്ഞൂറ്റമ്പലം വീരര്‍ക്കാവ് ക്ഷേത്രത്തിലെ കളിയാട്ടത്തിനിടെ പടക്കശേഖരത്തിന് തീപിടിച്ച് നൂറിലേറെപ്പേര്‍ക്ക് പൊള്ളലേറ്റു. ഇന്ന് പുലര്‍ച്ചെ 12 മണിക്ക് ശേഷമായിരുന്നു സംഭവം. സ്ത്രീകളും കുട്ടികളുമുള്‍പ്പെടെയുള്ളവര്‍ക്ക് പൊള്ളലേറ്റിട്ടുണ്ട്. ഇവരെ കാസര്‍കോട് ജില്ലാ ആശുപത്രിയിലും മറ്റ് സ്വകാര്യ ആശുപത്രികളിലും പ്രവേശിപ്പിച്ചു. മാരകമായി പൊള്ളലേറ്റവരെ മംഗളൂരുവിലെയും കണ്ണൂരിലെയും സ്വകാര്യ ആശുപത്രികളിലേക്കും കണ്ണൂര്‍ ഗവ. മെഡിക്കല്‍ കോളേജ് ആശുപത്രിയിലേക്കും മാറ്റി. തെയ്യത്തിന്റെ വെള്ളാട്ടം പുറപ്പാട് സമയത്ത് പടക്കംപൊട്ടിച്ചപ്പോള്‍, തീപ്പൊരി പടക്കംസൂക്ഷിച്ച കെട്ടിടത്തിലേക്ക് വീഴുകയും ഒന്നാകെ പൊട്ടിത്തെറിക്കുകയുമായിരുന്നു.

🔹കാസര്‍കോട് നീലേശ്വരം അഞ്ഞൂറ്റമ്പലം വീരര്‍കാവ് ക്ഷേത്രത്തിലെ ഉത്സവത്തിനിടെയുണ്ടായ വെടിക്കെട്ട് അപകടത്തില്‍ പരുക്കേറ്റ 8 പേരുടെ നില ഗുരുതരം. ആകെ 154 പേര്‍ക്ക് പരുക്കുണ്ട്. പരിയാരം മെഡിക്കല്‍ കോളജ്, കണ്ണൂര്‍ മിംസ് എന്നിവിടങ്ങളില്‍ ചികിത്സയിലുള്ളവരാണ് ഗുരുതരനിലയിലുള്ളത്.

🔹കളിയാട്ട മഹോത്സവത്തിനിടെ പടക്കങ്ങള്‍ സൂക്ഷിച്ച സ്ഥലത്തുണ്ടായ പൊട്ടിത്തെറിയില്‍ 8 പേര്‍ക്കെതിരെ കേസെടുത്തു. ഏഴ് ക്ഷേത്ര കമ്മറ്റി ഭാരവാഹികള്‍ക്കും വെടിക്കെട്ട് നടത്തിയ രാജേഷ് എന്നയാള്‍ക്കുമെതിരെയാണ് നീലേശ്വരം പൊലീസ് കേസെടുത്തത്. അലക്ഷ്യമായി സ്ഫോടക വസ്തുക്കള്‍ കൈകാര്യം ചെയ്തതിനാണ് കേസ്. അഞ്ഞൂറ്റമ്പലം വീരര്‍കാവ് കമ്മറ്റി പ്രസിഡന്റും സെക്രട്ടറിയും കസ്റ്റഡിയിലാണ്.

🔹തൃശൂര്‍ പൂരം കലങ്ങി എന്നല്ല കലക്കാന്‍ ശ്രമം ഉണ്ടായി എന്നാണ് അന്നും ഇന്നും നിലപാടെന്നും തൃശൂര്‍ പൂരം അലങ്കോലപ്പെട്ടിട്ടില്ലെന്നും ആവര്‍ത്തിച്ച് മുഖ്യമന്ത്രി പിണറായി വിജയന്‍. വെടിക്കെട്ട് മാത്രം വൈകിയെന്നാണ് മുഖ്യമന്ത്രിയുടെ വിശദീകരണം.

🔹താമസിച്ചാല്‍ മാറ്റിവെച്ചു നടത്താന്‍ സര്‍ക്കാര്‍ ഓഫീസിലെ പരിപാടിയാണോ വെടിക്കെട്ടെന്നും വെടിക്കെട്ട് മുഖ്യമന്ത്രി കണ്ടിട്ടുണ്ടോയെന്നും കോണ്‍ഗ്രസ് നേതാവ് കെ.മുരളീധരന്‍. പൂരം കലക്കലില്‍ മുഖ്യമന്ത്രി വാര്‍ത്താക്കുറിപ്പ് ഇറക്കിയത് മാധ്യമപ്രവര്‍ത്തകര്‍ ചോദിക്കും എന്നത് കൊണ്ടാണെന്നും മുന്നണിയിലെ ഘടക കക്ഷികളെ പോലും തൃപ്തിപ്പെടുത്താന്‍ മുഖ്യമന്ത്രിക്ക് ആകുന്നില്ലെന്നും അദ്ദേഹം പറഞ്ഞു.

🔹തൃശ്ശൂര്‍ പൂരം കലങ്ങിയില്ലെങ്കില്‍ പിന്നെ എന്തിനാണ് പുതിയ എഫ്.ഐ.ആര്‍ രജിസ്റ്റര്‍ ചെയ്തതെന്ന് മുന്‍ കേന്ദ്ര സഹമന്ത്രിയും ബിജെപി നേതാവുമായി വി.മുരളീധരന്‍. മറ്റ് മതവികാരങ്ങളുടെ പിന്തുണ നേടാന്‍ ഹിന്ദുക്കളുടെ വികാരം വ്രണപ്പെടുത്തുകയാണ് മുഖ്യമന്ത്രിയെന്നും ഇതിനേക്കാള്‍ ഭയങ്കരമായി ഭാവിയില്‍ പൂരം കലക്കുമെന്നാണ് മുഖ്യമന്ത്രിയുടെ വാക്കുകളില്‍ നിന്ന് മനസിലാകുന്നതെന്നും മുരളീധരന്‍ വിമര്‍ശിച്ചു. പുതിയ എഫ്.ഐ.ആറിലൂടെ ദേവസ്വം ഭാരവാഹികളുടെ പേരില്‍ കേസ് എടുക്കാനാണ് നീക്കമെങ്കില്‍ ഹൈന്ദവ വിശ്വാസികള്‍ പ്രതിഷേധവുമായി ഇറങ്ങേണ്ടി വന്നാല്‍ ഉത്തരവാദി പിണറായി മാത്രമാകുമെന്നും അദ്ദേഹം പറഞ്ഞു.

🔹തന്നെ സ്ഥാനാര്‍ത്ഥി മോഹിയാക്കി ചിത്രീകരിക്കുന്നത് വേദനാജനകമാണെന്ന് മുതിര്‍ന്ന ബിജെപി നേതാവ് ശോഭ സുരേന്ദ്രന്‍. പാലക്കാട്ടെ ബിജെപി സ്ഥാനാര്‍ത്ഥിയുടെ പ്രചരണ കണ്‍വന്‍ഷനിലെത്തി സംസാരിക്കുകയായിരുന്നു സ്ഥാനാര്‍ത്ഥിത്വത്തിന് വേണ്ടി അങ്ങോളമിങ്ങോളം ഓടി നടക്കുന്ന ആളല്ല താനെന്നും പത്തുപേര് തികച്ച് ബിജെപി യ്ക്ക് ഇല്ലാതിരുന്ന കാലത്ത് ഈ പാര്‍ട്ടിയില്‍ പ്രവര്‍ത്തിച്ച് തുടങ്ങിയതാണെന്നും ശോഭ സുരേന്ദ്രന്‍ പറഞ്ഞു.

🔹വയനാട്ടിലെ കോണ്‍ഗ്രസ് സ്ഥാനാര്‍ത്ഥി പ്രിയങ്ക ഗാന്ധിയെ ‘പൊളിറ്റിക്കല്‍ ടൂറിസ്റ്റ്’ എന്ന് വിമര്‍ശിച്ച് ബിജെപി ദേശീയ വക്താവ് സി.ആര്‍ കേശവന്‍. രാഹുല്‍ ഗാന്ധിയെപ്പോലെ തന്നെ പ്രിയങ്ക ഗാന്ധിയേയും വിശ്വസിക്കാന്‍ കഴിയില്ലെന്നും അവസരവാദ രാഷ്ട്രീയമാണ് പ്രിയങ്കയുടേതെന്നും സി.ആര്‍ കേശവന്‍ ആരോപിച്ചു.

🔹വയനാട് മെഡിക്കല്‍ കോളേജിനുവേണ്ടി ശക്തമായ ഇടപെടല്‍ നടത്തുമെന്നും രാത്രിയാത്രാ നിരോധനം നീക്കാനും മനുഷ്യ- വന്യജീവി സംഘര്‍ഷം ലഘൂകരിക്കാനും ഇടപെടുമെന്നും വയനാട്ടിലെ യുഡിഎഫ് സ്ഥാനാര്‍ത്ഥി പ്രിയങ്കാ ഗാന്ധി. വയനാടിനെ പ്രതിനിധീകരിക്കാന്‍ കഴിയുന്നതിലൂടെ രാജ്യത്തെ ഏറ്റവും അഭിമാനമുള്ള വ്യക്തിയായി താന്‍ മാറുകയാണെന്നും നിങ്ങള്‍ എന്നെ തിരഞ്ഞെടുത്താല്‍ അത് തനിക്ക് ലഭിക്കുന്ന ഏറ്റവും വലിയ ആദരമായിരിക്കുമെന്നും പ്രിയങ്ക പറഞ്ഞു.

🔹വയനാട്, പാലക്കാട്, ചേലക്കര മണ്ഡലങ്ങളിലെ നാമനിര്‍ദ്ദേശ പത്രികകളുടെ സൂക്ഷ്മ പരിശോധന പൂര്‍ത്തിയായി. വയനാട് ലോക്സഭ മണ്ഡലത്തില്‍ 16 ഉം പാലക്കാട് 12 ഉം ചേലക്കരയില്‍ 7 ഉം സ്ഥാനാര്‍ത്ഥികളാണ് നാമനിര്‍ദ്ദേശ പത്രികകളുടെ സൂഷ്മ പരിശോധനയ്ക്ക് ശേഷം മത്സര രംഗത്തുള്ളത്. പത്രിക പിന്‍വലിക്കാനുള്ള അവസാന തീയതി ഈ മാസം 30 നാണ്.

🔹എഡിഎം നവീൻ ബാബുവിന്റെ ആത്മഹത്യയുമായി ബന്ധപ്പെട്ട കേസിൽ പി പി ദിവ്യയ്ക്ക് മുൻ‌കൂർ ജാമ്യമില്ല. ദിവ്യയുടെ മുൻ‌കൂർ ജാമ്യാപേക്ഷ കോടതി തള്ളി. തലശ്ശേരി അഡീഷണൽ സെഷൻസ് കോടതിയുടേതാണ് വിധി. കോടതി ചേർന്നയുടനായിരുന്നു ഉത്തരവ്. ജാമ്യാപേക്ഷ തള്ളിക്കൊണ്ടുള്ള കോടതി വിധി ആഗ്രഹിച്ചതെന്നും ദിവ്യയെ ഉടൻ അറസ്റ്റ് ചെയ്യണമെന്നും നവീൻ ബാബുവിൻ്റെ കുടുംബം പ്രതികരിച്ചു.ആശ്വാസകരമായ വിധിയാണെന്നും പൊലീസ് പ്രതിയെ അറസ്റ്റ് ചെയ്യണമെന്നും കളക്ടർ യോഗത്തിൽ ഇടപെടേണ്ട ആളായിരുന്നുവെന്നും നവീൻ ബാബുവിൻ്റെ ഭാര്യ മഞ്ജുഷ പ്രതികരിച്ചു. അതേസമയംഅന്വേഷണം ശരിയായ നിലയിലാണെന്നും സർക്കാരും പ്രോസിക്യൂഷനും ഇരക്കൊപ്പമായിരുന്നുവെന്നും പ്രോസിക്യൂട്ടർ അജിത്‌ കുമാർ പ്രതികരിച്ചു.

🔹 പിപി ദിവ്യയ്ക്ക് മുന്‍കൂര്‍ ജാമ്യം നിഷേധിച്ചുകൊണ്ടുള്ള കോടതി വിധി ആശ്വാസമെന്ന് നവീന്‍ ബാബുവിന്റെ ഭാര്യയും കോന്നി തഹസില്‍ദാറുമായ മഞ്ജുഷ പ്രതികരിച്ചു. ഞങ്ങളുടെ ജീവിതം നശിപ്പിച്ച ആ പ്രതിയെ അറസ്റ്റ് ചെയ്യണമെന്നും നീതിക്കായി ഏതറ്റം വരെയും പോകുമെന്നും മഞ്ജുഷ പറഞ്ഞു. വിധിയില്‍ സന്തോഷമല്ല, ആശ്വാസമാണെന്നും എന്നാല്‍ പിപി ദിവ്യയെ ഇതുവരെ അറസ്റ്റ് ചെയ്യാനുള്ള നീക്കമുണ്ടായിട്ടില്ലെന്നും മഞ്ജുഷ പറഞ്ഞു.

🔹പിപി ദിവ്യക്ക് സിപിഎം നിര്‍ദ്ദേശമൊന്നും നല്‍കില്ലെന്ന് സിപിഎം സംസ്ഥാന സെക്രട്ടറി എംവി ഗോവിന്ദന്‍. സിപിഎം കണ്ണൂര്‍ ജില്ലാ കമ്മിറ്റിയംഗമായ ദിവ്യ മുന്‍കൂര്‍ ജാമ്യം നിഷേധിക്കപ്പെട്ട സാഹചര്യത്തില്‍ പൊലീസില്‍ കീഴടങ്ങുമോയെന്ന ചോദ്യത്തോട് അതൊക്കെ ഓരോരുത്തരുടെയും വ്യക്തിപരമായ തീരുമാനമല്ലേയെന്നും അദ്ദേഹം മറുപടി പറഞ്ഞു. ദിവ്യയെ പാര്‍ട്ടി സംരക്ഷിക്കുന്നില്ലെന്ന് ഇടതുമുന്നണി കണ്‍വീനറും സിപിഎം നേതാവുമായ ടി.പി രാമകൃഷ്ണനും വ്യക്തമാക്കി.. വിഷയത്തില്‍ പാര്‍ട്ടി കണ്ണൂര്‍ ജില്ല നേതൃത്വത്തിന് ഉചിതമായ നടപടി സ്വീകരിക്കാമെന്നും പൊലീസിന് സ്വതന്ത്രമായ നിലപാട് സ്വീകരിക്കാമെന്നും സര്‍ക്കാര്‍ മറ്റ് നിര്‍ദ്ദേശം നല്‍കില്ലെന്നും അദ്ദേഹം പറഞ്ഞു.

🔹പി.പി.ദിവ്യക്ക് മുന്‍കൂര്‍ ജാമ്യം നിഷേധിച്ചതിനുപിന്നാലെ ഇവരെ അറസ്റ്റ് ചെയ്യണമെന്നാവശ്യപ്പെട്ട് വന്‍ പ്രതിഷേധം. കണ്ണൂരില്‍ കമ്മീഷണര്‍ ഓഫീസിലേക്ക് യൂത്ത് കോണ്‍ഗ്രസ് നടത്തിയ സമരം സംഘര്‍ഷത്തില്‍ കലാശിച്ചു. പോലീസ് തുടര്‍ച്ചയായി ജലപീരങ്കി പ്രയോഗിച്ചു. തുടര്‍ന്ന് പ്രവര്‍ത്തകരെ ബലം പ്രയോഗിച്ച് മാറ്റുകയായിരുന്നു. കണ്ണൂര്‍ പോലീസ് സ്റ്റേഷനിലേക്ക് യൂത്ത് ലീഗും പ്രതിഷേധ മാര്‍ച്ച് നടത്തി.

🔹മലപ്പുറം നിലമ്പൂർ പൂക്കോട്ടുംപാടത്ത് അടച്ചിട്ട വീട്ടിൽ കവർച്ച.പൂക്കോട്ടുംപാടം ഗാന്ധി പടി മഞ്ചപുള്ളികുഞ്ഞുമൊയ്തീന്റെ വീട്ടിലാണ് മോഷ്ണം നടന്നത്.നാല്പത്തി രണ്ട് പവൻ സ്വർണവും പണവും വിലപിടിപ്പുള്ള ക്യാമറയും നഷ്ടമായിട്ടുണ്ട്.
വീടിന്റെ പിറക് വശത്തുള്ള വാതിൽ കുത്തിത്തുറന്നാണ് മോഷ്ടാവ് അകത്തു കയറിയത്. സംഭവത്തിൽ പൂക്കോട്ടുംപാടം പൊലീസ് അന്വേഷണം ആരംഭിച്ചിട്ടുണ്ട്.

🔹സിനിമാ ചിത്രീകരണത്തിനിടെ പരിചയപ്പെട്ട യുവാവിനെ ബെംഗളൂരുവിലെ പഞ്ചനക്ഷത്ര ഹോട്ടലിലേക്ക് വിളിച്ച് വരുത്തിയെന്നും അസ്വാഭാവിക ലൈംഗിക പീഡനത്തിന് ഇരയാക്കിയെന്നും, ചിത്രങ്ങള്‍ പകര്‍ത്തിയെന്നുമുള്ള കേസില്‍ സംവിധായകന്‍ രഞ്ജിത്തിനെതിരെ ബെംഗളൂരു പൊലീസ് കേസെടുത്തു. ബെംഗളൂരു ദേവനഹള്ളി സബ് ഡിവിഷന് കീഴിലുള്ള എയര്‍പോര്‍ട്ട് പൊലീസ് സ്റ്റേഷനിലാണ് കേസ് രജിസ്റ്റര്‍ ചെയ്തിരിക്കുന്നത്. കോഴിക്കോട് സ്വദേശിയായ യുവാവാണ് രഞ്ജിത്തിനെതിരെ പരാതി ഉന്നയിച്ചത്.

🔹എസ്എഫ്ഐ സംസ്ഥാന സെക്രട്ടറി പിഎം ആര്‍ഷോ ഏറെക്കാലമായി കോളേജില്‍ എത്തുന്നില്ലെന്നും കൃത്യമായ കാരണം അറിയിച്ചില്ലെങ്കില്‍ പുറത്താക്കുമെന്നും എറണാകുളം മഹാരാജാസ് കോളേജ് അധികൃതര്‍. എന്നാല്‍ എക്സിറ്റ് ഓപ്ഷന്‍ എടുത്ത് പഠനം അവസാനിപ്പിക്കുകയണെന്ന് ആര്‍ഷോ മഹാരാജാസ് കോളേജിനെ അറിയിച്ചു. ആദ്യ ആറു സെമസ്റ്റര്‍ പരീക്ഷകള്‍ പൂര്‍ണമായി ജയിക്കാത്തതിനാല്‍ എക്സിറ്റ് ഓപ്ഷന്‍ നല്‍കുന്നതില്‍ കോളേജ് അധികൃതര്‍ സര്‍വകലാശാലയോട് അഭിപ്രായം തേടി.

🔹ദീപാവലി, ഛത് പൂജ ഉത്സവ സീസണുകളുടെ പശ്ചാത്തലത്തിൽ വെസ്റ്റേൺ റെയിൽവേ 200 സ്പെഷ്യൽ ട്രെയിനുകൾ പ്രഖ്യാപിച്ചു. ചൊവ്വാഴ്ച 120 ലധികം ട്രെയിനുകൾ ഓടുമെന്ന് ഇന്ത്യൻ റെയിൽവേ അറിയിച്ചു. ഇതിൽ നാൽപ്പതോളം ട്രെയിനുകൾ മുംബൈ ഡിവിഷൻ നിയന്ത്രിക്കും.
ഉത്തർപ്രദേശ്, ബീഹാർ, പശ്ചിമ ബംഗാൾ, ഒഡീഷ എന്നിവിടങ്ങളിലേക്കുള്ള 22 ട്രെയിനുകൾ മുംബൈയിൽ നിന്നുണ്ടാകും. ഉത്സവ തിരക്കും യാത്രക്കാരുടെ ആവശ്യവും മാനിച്ച് നിരവധി അധിക കോച്ചുകളും ചേർത്തിട്ടുണ്ട്.
ഈസ്റ്റേൺ റെയിൽവേ 50 അധിക ട്രെയിനുകൾ ഓടിക്കും. അധികമായി 400 സർവീസുകളാണ് നടത്തുക. കഴിഞ്ഞ വർഷം 33 സ്പെഷ്യൽ ട്രെയിനുകളാണ് ദീപാവലി സീസണിൽ ഈസ്റ്റേൺ റെയിൽവേ സർവീസ് നടത്തിയത്.

🔹സ്‌കൂട്ടര്‍ യാത്രക്കാരിയെ രക്ഷിക്കാന്‍ ശ്രമിക്കുകയായിരുന്നതിനിടെ മുഖ്യമന്ത്രിയുടെ എസ്‌കോര്‍ട്ട് വന്ന 5 വാഹനങ്ങള്‍ കൂട്ടിയിടിച്ച് അപകടം. മുഖ്യമന്ത്രി കോട്ടയത്ത് നിന്ന് തിരുവനന്തപുരത്തേക്ക് വരികയായിരുന്നു. വാമനപുരം പാര്‍ക്ക് ജംഗ്ഷനില്‍ വെച്ചാണ് അപകടമുണ്ടായത്. അപകടത്തില്‍ ആര്‍ക്കും പരിക്കില്ലെന്നാണ് വിവരം.

🔹ദീപാവലി ആഘോഷങ്ങളില്‍ നിശബ്ദ മേഖലകളായ ആശുപത്രികള്‍, കോടതികള്‍, വിദ്യാഭ്യാസ സ്ഥാപനങ്ങള്‍, ആരാധനാലയങ്ങള്‍, തുടങ്ങിയവയുടെ 100 മീറ്റര്‍ ചുറ്റളവിനുള്ളില്‍ ശബ്ദമുണ്ടാക്കുന്ന പടക്കങ്ങള്‍ പൊട്ടിക്കാന്‍ പാടില്ലെന്ന ഉത്തരവ് പുറത്തിറക്കി സംസ്ഥാന സര്‍ക്കാര്‍. അന്തരീക്ഷ മലിനീകരണം നിയന്ത്രിക്കുന്നതിന്റെ ഭാഗമായി ഹരിത പടക്കങ്ങള്‍ മാത്രമേ സംസ്ഥാനത്ത് വില്‍ക്കാനും ഉപയോഗിക്കാനും പാടുള്ളൂ എന്ന സംസ്ഥാന ആഭ്യന്തര വകുപ്പിന്റെ നിര്‍ദ്ദേശത്തെ തുടര്‍ന്നാണ് നടപടി.

🔹കൊച്ചി ചിറ്റൂരില്‍ തൊടുപുഴയിലേക്ക് പോവുകയായിരുന്ന കെഎസ്ആര്‍ടിസി ലോ ഫ്ലാര്‍ ബസിന് തീപിടിച്ചു. ഫയര്‍ഫോഴ്സ് എത്തി തീയണച്ചെങ്കിലും ബസ് പൂര്‍ണ്ണമായും കത്തി നശിക്കുകയായിരുന്നു. ബസ്സിന്റെ അടിയില്‍ നിന്ന് പുക ഉയരുകയായിരുന്നു. ഈ സമയത്ത് ബസ്സില്‍ ഇരുപതോളം യാത്രക്കാര്‍ ഉണ്ടായിരുന്നുവെങ്കിലും ഉടന്‍ തന്നെ പുറത്തിറങ്ങിയതിനാല്‍ വന്‍ദുരന്തം ഒഴിവായി.

🔹താമശ്ശേരി ചുരത്തില്‍ ഭാരവാഹനങ്ങള്‍ക്ക് വീണ്ടും നിയന്ത്രണം. ബസുകള്‍ ഒഴികെയുള്ള വലിയ വാഹനങ്ങള്‍ക്ക് അറ്റകുറ്റപ്പണികള്‍ക്കായാണ് നിയന്ത്രണം ഏര്‍പ്പെടുത്തിയിരിക്കുന്നത്. കഴിഞ്ഞ മാസം ചുരത്തിലെ പ്രധാന വളവുകളില്‍ അറ്റകുറ്റപ്പണി നടത്തിയിരുന്നു. അവധി ദിനത്തിലും മറ്റ് വിശേഷ ദിവസങ്ങളിലും ക്രമാതീതമായ വാഹന തിരക്കാണ് ചുരത്തില്‍ അനുഭപ്പെടുന്നത്. ഹെയര്‍പിന്‍ വളവുകളില്‍ റോഡ് തകര്‍ന്നതോടെ ബ്ലോക്ക് പതിവായിരുന്നു.

🔹കണ്ണൂര്‍ ഏഴിമലയില്‍ പിക്കപ്പ് ലോറി തൊഴിലുറപ്പ് തൊഴിലാളികള്‍ക്കിടയിലേക്ക് പാഞ്ഞുകയറിയ അപകടത്തില്‍ മരണം മൂന്നായി. ഇന്നലെ രാവിലെയുണ്ടായ അപകടത്തില്‍ ഗുരുതരമായി പരിക്കേറ്റ് ചികിത്സയിലായിരുന്ന തൊഴിലുറപ്പ് തൊഴിലാളിയായ ശ്രീലേഖ, ശോഭ, യശോദ എന്നിവരാണ് മരിച്ചത്.

🔹എറണാകുളം കളക്ട്രേറ്റില്‍ യുവതിയുടെ ആത്മഹത്യാ ശ്രമം. പള്ളുരുത്തി സ്വദേശി ഷീജയാണ് ആത്മഹത്യക്ക് ശ്രമിച്ചത്. കെട്ടിടങ്ങള്‍ക്ക് പ്ലാന്‍ വരച്ചു നല്‍കുന്ന ജോലി ചെയ്യുന്ന ഷീജ ഒരു കെട്ടിടത്തിന് വരച്ച് കൊടുത്ത പ്ലാനുമായി ബന്ധപ്പെട്ട്, ക്രമക്കേട് ഉണ്ടെന്ന പരാതി ഇവര്‍ക്കെതിരെ ഉയര്‍ന്നിരുന്നു. ഇതുമായി ബന്ധപ്പെട്ട് ഇന്നലെ കളക്ടേറ്റില്‍ എത്തിയ ഷീജ ശരീരത്തില്‍ പെട്രോള്‍ ഒഴിച്ച് ആശങ്ക പരത്തിയെങ്കിലും പിന്നീട് കുഴഞ്ഞുവീഴുകയായിരുന്നു.

🔹നാഗര്‍കോവിലില്‍ ആത്മഹത്യ ചെയ്ത മലയാളി അധ്യാപികയുടെ ഭര്‍തൃമാതാവ് മരിച്ചു. കൊല്ലം പിറവന്തൂര്‍ സ്വദേശിയായ ശ്രുതിയുടെ ആത്മഹത്യക്ക് പിന്നാലെ ജീവനൊടുക്കാന്‍ ശ്രമിച്ച ചെമ്പകവല്ലി ഇന്നലെ ആശുപത്രിയില്‍ ചികിത്സയിലിരിക്കെയാണ് മരിച്ചത്. ചെമ്പകവല്ലിയുടെ പീഡനം കാരണം ജീവനൊടുക്കുന്നുവെന്നാണ് ശ്രുതിയുടെ അവസാന സന്ദേശത്തില്‍ പറഞ്ഞത്.

🔹മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയില്‍നിന്ന് ആറുമാസത്തിനിടെ 85 ലക്ഷത്തോളം തൊഴിലാളികളെ കേന്ദ്ര സര്‍ക്കാര്‍ പുറത്താക്കിയെന്ന് സിപിഎം. ഏപ്രില്‍ മുതല്‍ സെപ്റ്റംബര്‍ വരെയുള്ള കാലയളവില്‍ 84.8 ലക്ഷം തൊഴിലാളികള്‍ ഒഴിവാക്കപ്പെട്ടതായി ആന്ധ്രാപ്രദേശ് കേന്ദ്രീകരിച്ചുള്ള ഗവേഷക കൂട്ടായ്മയായ ‘ലിബ്‌ടെക്’പഠനം ഉയര്‍ത്തിയാണ് സിപിഎം വിമര്‍ശനം. തമിഴ്‌നാട്, ഛത്തീസ്ഗഡ് എന്നിവിടങ്ങളിലെ തൊഴിലാളികളാണ് കൂടുതല്‍ ഒഴിവാക്കപ്പെട്ടത്.

🔹തമിഴക വെട്രി കഴകം അധ്യക്ഷന്‍ നടന്‍ വിജയ്‌ക്കെതിരേ തമിഴ്‌നാട് ഭരണകക്ഷിയായ ഡി.എം.കെയും പ്രതിപക്ഷമായ എ.ഐ.എ.ഡി.എം.കെയും. വിജയ് പ്രഖ്യാപിച്ച തമിഴക വെട്രി കഴകത്തിന്റെ പ്രത്യയശാസ്ത്രം, തങ്ങളുടേത് കോപ്പിയടിച്ചതാണെന്ന് ഡി.എം.കെ. നേതാവ് ടി.കെ.എസ്. ഇളങ്കോവന്‍ ആരോപിച്ചു. തമിഴ്‌നാട്ടിലെ എല്ലാ പാര്‍ട്ടികളില്‍നിന്നും എടുത്ത കോക്ടെയില്‍ പ്രത്യയശാസ്ത്രമാണ് ടി.വി.കെയുടേതെന്നും പഴയ വൈന്‍ പുതിയ കുപ്പിയില്‍ ആക്കിയിരിക്കുന്നതാണെന്നും എ.ഐ.എ.ഡി.എം.കെ. വക്താവ് കോവൈ സത്യനും വിമര്‍ശിച്ചു.

🔹വിമാനങ്ങള്‍ക്കുണ്ടായ ബോംബ് ഭീഷണിയുടെ അന്വേഷണത്തിന് അന്താരാഷ്ട്ര ഏജന്‍സികളുടെ സഹായം തേടി ഇന്ത്യ. വിദേശത്ത് നിന്നും ഫോണ്‍ കോളുകളെത്തുന്നതോടെയാണ് നീക്കം. ഒക്ടോബര്‍ പതിനാല് മുതല്‍ ആകെ 350നടുത്ത് വിമാനങ്ങള്‍ക്കാണ് രാജ്യത്ത് ബോംബ് ഭീഷണി ലഭിച്ചത്.

🔹ഡല്‍ഹിയിലെ വായു ഗുണനിലവാര സൂചിക ഇന്നലെ 328 ആയി. വായുമലിനീകരണതോത് ഗുരുതരാവസ്ഥയിലേക്ക് മാറിയ സാഹചര്യത്തില്‍ മലിനീകരണം കുറയ്ക്കാന്‍ ദീപാവലിക്ക് പടക്ക നിരോധനമേര്‍പ്പെടുത്തിയ ദില്ലി സര്‍ക്കാര്‍ ഹിന്ദു വിരോധികളാണെന്ന് ബിജെപി വിമര്‍ശിച്ചു.

🔹ജമ്മു കശ്മീരിലെ അഖ്‌നൂറില്‍ സൈനിക വാഹനത്തിന് നേരെ വെടിയുതിര്‍ത്ത മൂന്ന് ഭീകരരെ വധിച്ചു. പ്രദേശത്ത് നിന്ന് ആയുധങ്ങളും വെടിക്കോപ്പുകളും സുരക്ഷാസേന പിടിച്ചെടുത്തു. കൂടുതല്‍ ഭീകരര്‍ ഒളിച്ചിരിക്കുന്നുവെന്ന വിവരത്തെ തുടര്‍ന്ന് പ്രദേശത്ത് തെരച്ചില്‍ തുടരുകയാണ്.

🔹ജനന നിരക്ക് ഗണ്യമായി കുറഞ്ഞ ചൈനയില്‍ ആയിരക്കണക്കിന് കിന്റര്‍ഗാര്‍ട്ടനുകള്‍ അടച്ചുപൂട്ടേണ്ടി വന്നെന്ന് റിപ്പോര്‍ട്ടുകള്‍. പുതുതായി പ്രവേശനത്തിന് കുട്ടികളില്ലാത്തതിനാലാണ് രാജ്യത്ത് വ്യാപകമായി കിന്റര്‍ഗാര്‍ട്ടനുകള്‍ അടച്ചുപൂട്ടേണ്ടി വന്നത്.

🔹ലഖ്‌നൗ സൂപ്പര്‍ ജയന്റ്‌സിനെ വരുന്ന ഐപിഎല്‍ സീസണില്‍ നിക്കോളാസ് പുരാന്‍ നയിക്കുമെന്ന് റിപ്പോര്‍ട്ടുകള്‍. ഇതോടെ കെ എല്‍ രാഹുല്‍ ഫ്രാഞ്ചൈസി വിടുമെന്ന് ഉറപ്പായി. താരം ഐപിഎല്‍ മെഗാ ലേലത്തിനുണ്ടാവും. റോയല്‍ ചലഞ്ചേഴ്‌സ് ബെംഗളൂരുവാണ് അദ്ദേഹത്തെ ടീമിലെത്തിക്കാന്‍ പ്രധാനമായും ശ്രമിക്കുക.

🔹മിമിക്രി ആര്‍ടിസ്റ്റും നടനുമായ കലാഭവന്‍ പ്രജോദ് സംവിധായനാകുന്നു. സിനിമയുടെ കാസ്റ്റിങ് കോള്‍ അണിയറക്കാര്‍ പുറത്തിറക്കിയിട്ടുണ്ട്. എബ്രിഡ് ഷൈന്‍ ആണ് ചിത്രത്തിന്റെ രചന നിര്‍വഹിക്കുന്നത്. ആക്ഷന് ഏറെ പ്രാധാന്യമുള്ള പ്രമേയമാകും ചിത്രത്തിന്റേതെന്നാണ് സൂചന. മാര്‍ഷ്യല്‍ ആര്‍ട്സില്‍ പ്രാഗല്‍ഭ്യമുള്ള 18നും 24നും ഇടയിലുള്ള പുരുഷന്മാരും 30നും 48നും ഇടയിലുള്ള മാര്‍ഷ്യല്‍ ആര്‍ട്സ് പ്രഗത്ഭരെയുമാണ് ഈ ചിത്രത്തിലേക്കു തേടുന്നത്. 18നും 24നും ഇടയില്‍ മാര്‍ഷ്യല്‍ ആര്‍ട്സില്‍ പ്രാഗല്‍ഭ്യം ഉള്ളവര്‍ kalabhavanprajodmovie1@gmail.com എന്ന ഇമെയില്‍ ഐഡിയിലെക്കും 30നും 48നും ഇടയില്‍ പ്രാഗല്‍ഭ്യം ഉള്ളവര്‍ kalabhavanprajodmovie2@gmail.com എന്ന ഇമെയിലിലും പ്രൊഫൈല്‍ അയയ്ക്കണം. ചിത്രത്തിന്റെ കൂടുതല്‍ വിവരങ്ങള്‍ വരും നാളുകളില്‍ അറിയിക്കുമെന്ന് അണിയറപ്രവര്‍ത്തകര്‍ അറിയിച്ചു.

തയ്യാറാക്കിയത്:
കപിൽ ശങ്കർ