📱വാർത്തകൾ ഒറ്റനോട്ടത്തിൽ📱 – 2024 | സെപ്റ്റംബർ27 | വെള്ളി ✍ കപിൽ ശങ്കർ

🔹മുഖ്യമന്ത്രി പിണറായി വിജയനെതിരെ രൂക്ഷവിമര്‍ശനമുന്നയിച്ച് നിലമ്പൂര്‍ എം.എല്‍.എ പി.വി.അന്‍വറിന്റെ വാര്‍ത്താസമ്മേളനം. പരസ്യപ്രതികരണം പാടില്ലെന്ന പാര്‍ട്ടി നിര്‍ദേശം ലംഘിച്ചുകൊണ്ടാണ് പിവി അന്‍വര്‍ എംഎല്‍എ വാര്‍ത്താസമ്മേളനം നടത്തിയത്. എ.ഡി.ജി.പി. അജിത്കുമാറിനെതിരേയും, മുന്‍ എസ്.പി.സുജിത് ദാസിനെതിരേയുമുള്ള കേസന്വേഷണം കൃത്യമല്ലെന്നും സ്വര്‍ണക്കടത്ത് കേസിലെ അന്വേഷണം പ്രഹസനമെന്നും പാര്‍ട്ടി ഉറപ്പ് പാടെ ലംഘിച്ചുവെന്നും മുഖ്യമന്ത്രി തന്നെ കള്ളക്കടത്തുക്കാരനാക്കിയെന്നും അന്‍വര്‍ പറഞ്ഞു. താന്‍ ഉന്നയിക്കുന്നത് പാര്‍ട്ടി പ്രവര്‍ത്തകരുടെ വികാരമാണെന്നും മുഖ്യമന്ത്രിയെ പാര്‍ട്ടി തിരുത്തിയില്ലെന്നും പാര്‍ട്ടിയില്‍ ഇനി പ്രതീക്ഷയില്ലെന്നും പ്രതീക്ഷ മുഴുവന്‍ കോടതിയിലെന്നും ഹൈക്കോടതിയെ സമീപിക്കുമെന്നും അന്‍വര്‍ പറഞ്ഞു. മുഖ്യമന്ത്രി വായിക്കുന്നത് എ.ഡി.ജി.പി. യുടെ തിരക്കഥയാണെന്നും സ്വര്‍ണക്കടത്തില്‍ പോലീസിന് പങ്കുണ്ടെന്നും പോലീസ് സ്വര്‍ണം മുക്കിയെന്നും സ്വര്‍ണക്കടത്തില്‍ എ.ഡി.ജി.പി. അജിത്കുമാറിനും പി.ശശിക്കും പങ്കെന്നും സ്വര്‍ണക്കടത്ത് കേസില്‍ ജുഡീഷ്യല്‍ അന്വേഷണം പ്രഖ്യാപിക്കാന്‍ മുഖ്യമന്ത്രിക്ക് ധൈര്യമുണ്ടോയെന്നും അന്‍വര്‍ വെല്ലുവിളിച്ചു. മുഖ്യമന്ത്രി ചതിച്ചെന്നും മുഖ്യമന്ത്രിയെന്ന സൂര്യന്‍ കെട്ടുപോയെന്നും ജനങ്ങള്‍ മുഖ്യമന്ത്രിയെ വെറുക്കുന്നുവെന്നും മുഖ്യമന്ത്രിയുടെ ഗ്രാഫ് പൂജ്യമായെന്നും അന്‍വര്‍ പറഞ്ഞു. ശശി കാട്ടുകള്ളനാണെന്നും ശശി മുഖ്യമന്ത്രിയെ വികൃതമാക്കിയെന്നും എല്ലാം മുഖ്യമന്ത്രിയുടെ അറിവോടെയെന്നും അന്‍വര്‍ ആരോപിച്ചു. പാര്‍ട്ടിയില്‍ റിയാസ് മാത്രം പോരെന്നും മുഖ്യമന്ത്രിയെ നയിക്കുന്നത് ഉപജാപകസംഘമാണെന്നും പിണറായി വിജയന്‍ അവസാന കമ്മ്യൂണിസ്റ്റ് മുഖ്യമന്ത്രിയാകുമെന്നും സിപിഎം നേതാക്കളുടെ കാലില്‍ ചങ്ങലയെന്നും പാര്‍ട്ടി സെക്രട്ടറി എം.വി.ഗോവിന്ദന്‍ നിസഹായവസ്ഥയിലാണെന്നും അന്‍വര്‍ തുറന്നടിച്ചു. ആഭ്യന്തരം പരാജയമെന്നും മുഖ്യമന്ത്രിക്ക് ആഭ്യന്തര വകുപ്പ് ഭരിക്കാന്‍ യോഗ്യതയില്ലെന്നും എ.ഡി.ജി.പിയെ സംരക്ഷിക്കുന്നത് റിയാസിന് വേണ്ടിയാണെന്നും പറഞ്ഞ അന്‍വര്‍ കോടിയേരി ഉണ്ടായിരുന്നെങ്കില്‍ ഇങ്ങനെ സംഭവിക്കില്ലായിരുന്നുവെന്നും കൂട്ടിച്ചേര്‍ത്തു.

🔹നിലമ്പൂർ എംഎൽഎ പിവി അൻവറിൻ്റെ ആരോപണങ്ങൾ തള്ളിക്കളയുകയാണെന്ന് മുഖ്യമന്ത്രി പിണറായി വിജയൻ. പാർട്ടിക്കും മുന്നണിക്കും സർക്കാരിനുമെതിരെയാണ് അൻവർ പറഞ്ഞിട്ടുള്ളത്. മാത്രമല്ല, എൽഡിഎഫിന്റെ ശത്രുക്കൾ വ്യാപകമായി പ്രചരിപ്പിക്കാൻ ഉദ്ദേശിക്കുന്ന കാര്യങ്ങളാണ് അൻവർ പറഞ്ഞതെന്നും അദ്ദേഹം പറഞ്ഞു. എൽഡിഎഫിനെയും, സർക്കാരിനെയും അപമാനിക്കാനുള്ള ശ്രമമാണ് നടത്തുന്നത്. എല്ലാ ആരോപണങ്ങൾക്കും മറുപടി നൽകുമെന്നും എന്നാൽ അതിപ്പോഴല്ലെന്നും സിപിഎം പോളിറ്റ് ബ്യൂറോ യോഗത്തിൽ പങ്കെടുക്കാനെത്തിയ മുഖ്യമന്ത്രി ദില്ലിയിൽ മാധ്യമപ്രവർത്തകരോട് വ്യക്തമാക്കി.

🔹ഭരണകക്ഷി എംഎൽഎ സർക്കാരിനെതിരെ ഗുരുതര ആരോപണങ്ങൾ ഉന്നയിച്ചുവെന്നും മുഖ്യമന്ത്രി ചോദ്യങ്ങളിൽ നിന്നും ഒഴിഞ്ഞു മാറുകയാണെന്നും പ്രതിപക്ഷ നേതാവ് വിഡി സതീശൻ. മുഖ്യന്റെ ഓഫിസിൽ ഉപജാപക സംഘം ഉണ്ടെന്നു ഞങ്ങൾ പറഞ്ഞതാണ്. എ‍ഡിജിപി-ആർഎസ്എസ് നേതാക്കളെ കണ്ടത് യുഡിഎഫ് ആണ് പുറത്ത് കൊണ്ടു വന്നത്. യുഡിഎഫ് പറഞ്ഞത് ഭരണ കക്ഷി എംഎൽഎ ആവർത്തിച്ചുവെന്നും വിഡി സതീശൻ പറഞ്ഞു. അൻവർ ഉയർത്തുന്ന വിഷയങ്ങൾക്ക് പിന്തുണ ഉണ്ട്. എന്നാൽ അദ്ദേഹം എൽഡിഎഫിലാണ്. അതുകൊണ്ട് അദ്ദേഹത്തെ കൊണ്ടു വരുന്ന കാര്യം ചർച്ച ചെയ്തിട്ടില്ലെന്നും സതീശൻ പ്രതികരിച്ചു.

🔹നടിയെ ആക്രമിച്ച കേസുമായി ബന്ധപ്പെട്ടുള്ള രണ്ടാംഘട്ട വിചാരണ എറണാകുളം പ്രിന്‍സിപ്പല്‍ സെഷന്‍സ് കോടതിയില്‍ തുടങ്ങി. നടന്‍ ദിലീപ്, പള്‍സര്‍ സുനി, മാര്‍ട്ടിന്‍ മണികണ്ഠന്‍ എന്നിവര്‍ കോടതിയിലെത്തി. പ്രോസിക്യൂഷന്‍ ഹാജരാക്കിയ തെളിവുകളും സാക്ഷി മൊഴികളും പ്രകാരം പ്രതികളോട് കോടതി ചോദ്യങ്ങള്‍ ചോദിക്കുന്ന നടപടിയാണ് തുടങ്ങിയിരിക്കുന്നത്.

🔹സംസ്ഥാനത്തെ ട്രഷറികളില്‍ ഒക്ടോബര്‍ ഒന്നിന് രാവിലെ പണമിടപാട് ആരംഭിക്കാന്‍ വൈകുമെന്ന് ട്രഷറി വകുപ്പ് . സെപ്റ്റംബര്‍ 30ന് പാദവര്‍ഷം അവസാനിക്കുന്നതിനാല്‍, പിറ്റേദിവസം ഏജന്‍സി ബാങ്കുകളില്‍ നിന്നും പണം ലഭ്യമായ ശേഷം മാത്രമേ ഇടപാടുകള്‍ ആരംഭിക്കാന്‍ സാധിക്കു എന്ന് ട്രഷറി വകുപ്പ് പുറത്തിറക്കിയ പത്രക്കുറിപ്പില്‍ വ്യക്തമാക്കി.

🔹പൂക്കോട് വെറ്ററിനറി കോളേജ് വിദ്യാര്‍ത്ഥി ജെ.എസ്. സിദ്ധാര്‍ത്ഥന്റെ മരണത്തിന് കാരണക്കാരായ കോളേജ് ഡീനിനേയും ഹോസ്റ്റല്‍ അസിസ്റ്റന്റ് വാര്‍ഡനെയും തിരികെ പ്രവേശിപ്പിക്കാനുള്ള തീരുമാനം തടയണമെന്ന് ആവശ്യപ്പെട്ട് സേവ് യൂണിവേഴ്സിറ്റി ക്യാമ്പയിന്‍ കമ്മിറ്റി ഗവര്‍ണര്‍ക്ക് നിവേദനം നല്‍കി. ഹൈക്കോടതി റിട്ട: ജസ്റ്റിസ് ഹരിപ്രസാദിന്റെ റിപ്പോര്‍ട്ടില്‍ ഡീനും അസിസ്റ്റന്റ് വാര്‍ഡനും കുറ്റക്കാരാണെന്നും അവര്‍ക്കെതിരെ നടപടിയെടുക്കണമെന്നും ആവശ്യപ്പെട്ടിരുന്നു.

🔹നടന്‍ സിദ്ദിഖിന്റെ മൂന്‍കൂര്‍ ജാമ്യാപേക്ഷക്കെതിരെ അഭിഭാഷകന്‍ അജീഷ് കളത്തില്‍ സുപ്രീംകോടതിയില്‍ തടസ ഹര്‍ജി നല്‍കി. ഹേമ കമ്മറ്റി റിപ്പോര്‍ട്ടുമായി ബന്ധപ്പെട്ട് ദേശീയ വനിതാ കമ്മീഷനടക്കം പരാതി നല്‍കിയ വ്യക്തിയാണ് അജീഷ്.

🔹സെക്രട്ടറിയേറ്റിലെ ഒരു വിഭാഗം ഉദ്യോഗസ്ഥര്‍ക്ക് ഇന്നലെ ശമ്പളം ലഭിച്ചു. ട്രഷറിയുടെ ഭാഗത്ത് നിന്ന് ഗുരുതര പിഴവ് സംഭവിച്ചുവെന്നും 46 ലക്ഷം രൂപയുടെ ശമ്പള ബില്ല് അബദ്ധത്തില്‍ ട്രഷറി ഓഫീസര്‍ ഒപ്പിട്ടതാണെന്നും വിശദീകരണം.

🔹പാലക്കാട് റെയില്‍വെ സ്റ്റേഷനില്‍ കഞ്ചാവുമായി രണ്ട് ഇതര സംസ്ഥാന തൊഴിലാളികള്‍ പിടിയിലായി. പാലക്കാട് എക്സൈസ് എന്‍ഫോഴ്‌സ്‌മെന്റ് സ്‌പെഷ്യല്‍ സ്‌ക്വാഡും റെയില്‍വേ പ്രൊട്ടക്ഷന്‍ ഫോഴ്‌സും ചേര്‍ന്ന് നടത്തിയ പരിശോധനയിലാണ് 14.22 കിലോഗ്രാം കഞ്ചാവ് പിടിച്ചെടുത്തത്. പോലീസ്‌കൂടുതല്‍ അന്വേഷണം തുടങ്ങിയിട്ടുണ്ട്.

🔹പാലക്കാട് അട്ടപ്പാടിയില്‍ ആദിവാസി യുവതിയെ അടിച്ച് കൊന്ന കേസില്‍ ഭര്‍ത്താവിന് ജീവപര്യന്തം തടവ്. അട്ടപ്പാടി തേക്കുമുക്കിയൂര്‍ സ്വദേശി വള്ളിയെ കൊലപ്പെടുത്തിയ കേസിലാണ് വിധി. ഭര്‍ത്താവ് രംഗസ്വാമിക്ക് ജീവപര്യന്തം തടവും ഒരു ലക്ഷം രൂപ പിഴയും ശിക്ഷ വിധിച്ചു. മണ്ണാര്‍ക്കാട് പ്രത്യേക കോടതിയുടേതാണ് വിധി.

🔹തൃശൂരിൽ വൻ എ ടി എം കവർച്ച. ഷോർണൂർ റോഡ്, കോലഴി, മാപ്രാണം എന്നിവിടങ്ങളിലാണ് കവർച്ചുണ്ടായത്. കാറിലെത്തിയ സംഘം ഗ്യാസ് കട്ടർ ഉപയോഗിച്ച് എടിഎമ്മിലെ പണം കവരുകയായിരുന്നു. 60 ലക്ഷത്തോളം രൂപ നഷ്ടപ്പെട്ടതായാണ് പ്രാഥമിക നിഗമനം. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്.

🔹ബിജെപി എംഎല്‍എ എന്‍.മുനിരത്ന നായിഡു സംസ്ഥാന നിയമസഭയായ വിധാന്‍ സൗധയിലും കാറിലും വച്ച് തന്നെ ബലാത്സംഗം ചെയ്തിട്ടുണ്ടെന്ന് യുവതിയുടെ മൊഴി.മുനിരത്ന തന്റെ ഉടമസ്ഥതയിലുള്ള മുത്യാല നഗറിലുള്ള ഗോഡൗണില്‍ കൊണ്ടുപോയി ബലാത്സംഗം ചെയ്തെന്നും ഇവര്‍ പറയുന്നു.സാമൂഹിക പ്രവര്‍ത്തകയാണ് പരാതിക്കാരി. ഔദ്യോഗിക വാഹനത്തിലാണ് ബലാത്സംഗം നടന്നതെന്നാണ് മൊഴിയില്‍ പറയുന്നത്.
സംഭവം പുറത്തറിയാതിരിക്കാന്‍ ഭീഷണിപ്പെടുത്തിയെന്നും വിവിധ സ്വകാര്യ റിസോര്‍ട്ടുകളില്‍ ആളുകളെ ഹണിട്രാപ്പ് ചെയ്യാന്‍ നിര്‍ബന്ധിച്ചെന്നും ജീവനു ഭീഷണിയുള്ളതിനാല്‍ ഹണി ട്രാപ്പ് അടക്കം ചെയ്യാന്‍ നിര്‍ബന്ധിതയായെന്നും യുവതി പൊലീസിനോട് പറഞ്ഞു.
എന്നാല്‍ മുനിര്തന എല്ലാ ആരോപണങ്ങളും നിഷേധിച്ചു. നഷ്ടപ്പെട്ടുവെന്ന് എംഎല്‍എ അവകാശപ്പെടുന്ന മൊബൈല്‍ ഫോണ്‍ കണ്ടെത്താന്‍ അന്വേഷണ സംഘം ശ്രമിക്കുന്നുണ്ട്. മുനിരത്ന ആ ഫോണില്‍ നിന്ന് വിഡിയോ കോളുകള്‍ വിളിച്ചിട്ടുണ്ടെന്ന് ഇരയായ യുവതി ആരോപിക്കുകയുണ്ടായി.ബലാത്സംഗം, ഹണി ട്രാപ്പ് കേസുകളില്‍ അറസ്റ്റിലായതിനെ തുടര്‍ന്ന് പ്രത്യേക അന്വേഷണ സംഘത്തിന്റെ കസ്റ്റഡിയിലാണ് മുനിരത്‌ന.

🔹ഞായറാഴ്ച തിരുവനന്തപുരം നഗരത്തിൽചില പ്രദേശങ്ങളിൽ ജലവിതരണം ഭാഗികമായി തടസ്സപ്പെടും. കേരള വാട്ടർ അതോറിറ്റിയുടെ അരുവിക്കരയിലുള്ള 86 എം എൽ ഡി ജലശുദ്ധീകരണശാലയിൽ അടിയന്തര അറ്റകുറ്റപ്പണികൾ നടക്കുന്നതിനാൽ ചില പ്രദേശങ്ങളിൽ ജലവിതരണം തടസപ്പെടുന്നത്. രാവിലെ 10 മണി മുതൽ വൈകുന്നേരം 6 മണി വരെ ഭാഗിഗമായായിരിക്കും ജലവിതരണം തടസപ്പെടുക. ഉപഭോക്താക്കൾ വേണ്ട മുൻകരുതൽ സ്വീകരിക്കേണ്ടതാണെന്ന് കേരള വാട്ടർ അതോറിറ്റി അറിയിച്ചു.

🔹തൃശൂര്‍ കുതിരാന്‍ ദേശീയപാതയില്‍ സ്വര്‍ണ്ണം കവര്‍ന്ന സംഭവത്തില്‍ പരാതിക്കാരന്റെ വാഹനം ഉപേക്ഷിച്ച നിലയില്‍ കണ്ടെത്തി. കേസ് അന്വേഷണത്തിന് പ്രത്യേക സംഘത്തെ നിയോഗിച്ചു. ഒല്ലൂര്‍ ഡിവൈഎസ്പിയുടെ നേതൃത്വത്തില്‍ നാല് സ്‌ക്വാഡുകള്‍ രൂപീകരിച്ചാണ് അന്വേഷണം നടക്കുന്നത്.

🔹സംസ്ഥാനത്തെ തെരഞ്ഞെടുത്ത പത്ത് വെറ്ററിനറി ആശുപത്രികള്‍ സ്മാര്‍ട്ട് ആക്കുമെന്ന് മൃഗസംരക്ഷണ വകുപ്പ് മന്ത്രി ജെ. ചിഞ്ചു റാണി. പെരുമ്പാവൂര്‍ ഒക്കല്‍ മൃഗാശുപത്രിയുടെ പുതിയ കെട്ടിടം ഉദ്ഘാടനം ചെയ്യുകയായിരുന്നു മന്ത്രി.

🔹സംസ്ഥാനത്ത് നാളെ മുതല്‍ ഒറ്റപ്പെട്ട ശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. നാളെ തിരുവനന്തപുരം, കൊല്ലം, പത്തനംതിട്ട, ഇടുക്കി ജില്ലകളിലും ഞായറാഴ്ചയും തിങ്കളാഴ്ചയും പത്തനംതിട്ട, ഇടുക്കി, എറണാകുളം, തൃശൂര്‍, കോഴിക്കോട്, വയനാട്, കണ്ണൂര്‍ ജില്ലകളിലും യെല്ലോ അലര്‍ട്ട് പ്രഖ്യാപിച്ചിട്ടുണ്ട്.

🔹രാജ്യത്ത് വീണ്ടും ട്രെയിന്‍ അട്ടിമറിയ്ക്ക് ശ്രമമെന്ന് സൂചന. ഗുജറാത്തില്‍ റെയില്‍വേ പാളത്തില്‍ സ്ഥാപിച്ച ഇരുമ്പ് ദണ്ഡില്‍ ട്രെയിന്‍ ഇടിച്ചു. ട്രെയിന്‍ ഇരുമ്പ് ദണ്ഡില്‍ ഇടിച്ചതിനെ തുടര്‍ന്ന് മണിക്കൂറുകളോളം ട്രെയിന്‍ ഗതാഗതം തടസപ്പെട്ടു. വിശദമായ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.

🔹ഉത്തര്‍പ്രദേശിലെ എല്ലാ ഭക്ഷണ കേന്ദ്രങ്ങളിലും സിസിടിവി നിര്‍ബന്ധമാക്കി യുപി സര്‍ക്കാര്‍. ഭക്ഷണം വിതരണം ചെയ്യുന്ന സ്ഥലങ്ങളില്‍ മാത്രമല്ല പാകം ചെയ്യുന്ന ഇടങ്ങളിലും സിസിടിവി സ്ഥാപിക്കണം. ശുചിത്വമില്ലാത്ത സാഹചര്യങ്ങളില്‍ ഭക്ഷണം പാകം ചെയ്യുന്നുവെന്നും മായം ചേര്‍ക്കുന്നുവെന്നുമുള്ള വിവിധ റിപ്പോര്‍ട്ടുകള്‍ പുറത്തുവന്നതിന് പിന്നാലെയാണ് പുതിയ തീരുമാനം.

🔹കുട്ടികള്‍ക്കെതിരെ ലൈംഗികാതിക്രമം നടത്തിയ 70കാരനായ പൂജാരി അറസറ്റില്‍. തമിഴ്നാട് തേനിയിലാണ് സംഭവം. പ്രതിയെ 15 ദിവസത്തേക്ക്റിമാന്‍ഡ് ചെയ്തു. തേനി പെരിയകുളത്തെ ഭഗവതി അമ്മന്‍ ക്ഷേത്രത്തിലാണ് സംഭവമുണ്ടായത്.

🔹471 ദിവസത്തെ ജയില്‍വാസത്തിന് ശേഷം തമിഴ്നാട് മുന്‍മന്ത്രി സെന്തില്‍ ബാലാജി പുറത്തേക്ക്. ബാലാജിക്ക് സുപ്രീം കോടതി ജാമ്യം അനുവദിച്ചു. ബാലാജിയെ സ്വാഗതം ചെയ്യുന്നതായി എക്സില്‍ കുറിച്ച മുഖ്യമന്ത്രി സ്റ്റാലിന്‍, അന്വേഷണ ഏജന്‍സികള്‍ ഭരിക്കുന്നവരുടെ ചട്ടുകം ആകുമ്പോള്‍ സുപ്രീം കോടതിയില്‍ മാത്രമാണ് പ്രതീക്ഷയെന്നും പറഞ്ഞു.

🔹10 മിനിട്ടിനുള്ളില്‍ 11 റോക്കറ്റുകള്‍ തൊടുത്തുവിട്ട് ഇസ്രായേലിനെതിരെ വീണ്ടും റോക്കറ്റാക്രമണം നടത്തി ഹിസ്ബുല്ല. റഫേല്‍ ആയുധ ഫാക്ടറിയ്ക്ക് സമീപം മിസൈല്‍ ആക്രമണം നടത്തിയതിന് പിന്നാലെയാണ് ഹിസ്ബുല്ല റോക്കറ്റാക്രമണവും നടത്തിയിരിക്കുന്നത്. ഇതില്‍ ആദ്യം വിക്ഷേപിക്കപ്പെട്ട റോക്കറ്റിനെ നിഷ്‌ക്രിയമാക്കിയതായി ഇസ്രായേല്‍ പ്രതിരോധ സേന അറിയിച്ചു. ഇന്നലെ മാത്രം മൂന്ന് തവണയാണ് ഇസ്രേയേലിനെതിരെ ഹിസ്ബുല്ല ആക്രമണം നടത്തിയത്. അതേസമയം, ലെബനനിലേയ്ക്ക് പ്രവേശിക്കാന്‍ ഇസ്രായേല്‍ സൈന്യം തയ്യാറെടുക്കുന്നതായാണ് റിപ്പോര്‍ട്ട്. ഹിസ്ബുല്ലയുടെ അടിസ്ഥാന സൗകര്യങ്ങള്‍ പൂര്‍ണമായും തകര്‍ക്കുക എന്നതാണ് ഇസ്രായേലിന്റെ ലക്ഷ്യം. എന്നാല്‍, ഇസ്രായേല്‍ ആക്രമണം ശക്തമാക്കിയാല്‍ ലെബനനെ എല്ലാ വിധത്തിലും പിന്തുണയ്ക്കുമെന്ന് ഇറാന്‍ മുന്നറിയിപ്പ് നല്‍കിയിട്ടുണ്ട്.

🔹ഐഎസ്എല്ലില്‍ ചെന്നൈയിന്‍ എഫ്‌സിയെ എതിരില്ലാത്ത ഒരു ഗോളിന് കീഴടക്കി മുഹമ്മദന്‍ സ്‌പോര്‍ട്ടിങ് ക്ലബ്ബ്. ഐഎസ്എല്ലിലെ തങ്ങളുടെ ആദ്യ ജയമാണ് മുഹമ്മദന്‍സ് ഇന്നലെ സ്വന്തമാക്കിയ്ത്.

🔹ബംഗ്ലാദേശിനെതിരായ ഇന്ത്യയുടെ രണ്ടാം ക്രിക്കറ്റ് ടെസ്റ്റ് ഇന്നുമുതല്‍ കാന്‍പൂരിലെ ഗ്രീന്‍പാര്‍ക്ക് സ്റ്റേഡിയത്തില്‍. രണ്ട് ടെസ്റ്റുകള്‍ മാത്രമുള്ള പരമ്പരയിലെ ആദ്യമത്സരം ഇന്ത്യ സ്വന്തമാക്കിയിരുന്നു.

🔹സോഷ്യല്‍ മീഡിയയെ ഇളക്കി മറിച്ച് ‘മുറ’ ചിത്രത്തിലെ ടൈറ്റില്‍ ട്രാക്ക്. സൂപ്പര്‍ ഹിറ്റ് ഗാനങ്ങള്‍ ഒരുക്കി ഇന്ത്യന്‍ സിനിമയെ വിസ്മയിപ്പിക്കാറുള്ള അനിരുദ്ധ് രവിചന്ദറാണ് ഗാനം തന്റെ പേജിലൂടെ പുറത്തുവിട്ടത്. ഗാനം യൂട്യൂബ് ട്രെന്‍ഡിങ് ലിസ്റ്റില്‍ 15-ാമതായി തുടരുന്നുണ്ട്. ‘അടുത്തോട്ടടുക്കണ്ട’ എന്ന് പേരിട്ടിരിക്കുന്ന ഗാനരംഗത്തില്‍ മാസ് ലുക്കിലാണ് സുരാജ് വെഞ്ഞാറമൂടും യുവതാരങ്ങളെയും പ്രത്യക്ഷപ്പെട്ടിരിക്കുന്നത്. ക്രിസ്റ്റി ജോബിയുടെ സംഗീതത്തില്‍ മുറയുടെ ഗാന രചനയും ആലാപനവും നിര്‍വഹിച്ചിരിക്കുന്നത് റൈക്കോ ആണ്. കപ്പേളയ്ക്ക് ശേഷം മുഹമ്മദ് മുസ്തഫ സംവിധാനം ചെയ്യുന്ന ചിത്രമാണ് മുറ. സുരാജ് വെഞ്ഞാറമ്മൂടും ഹൃദു ഹാറൂണുമാണ് ചിത്രത്തിലെ കേന്ദ്ര കഥാപാത്രങ്ങള്‍. മാലാ പാര്‍വതി, കനി കുസൃതി, കണ്ണന്‍ നായര്‍, ജോബിന്‍ ദാസ്, അനുജിത് കണ്ണന്‍, യെദു കൃഷ്ണാ, വിഘ്നേശ്വര്‍ സുരേഷ്, കൃഷ് ഹസ്സന്‍, സിബി ജോസഫ് എന്നിവരാണ് മുറയിലെ പ്രധാന കഥാപാത്രങ്ങളെ അവതരിപ്പിക്കുന്നത്. ഒക്ടോബര്‍ 18ന് ആണ് ചിത്രം റിലീസ് ചെയ്യുന്നത്.

തയ്യാറാക്കിയത്:
കപിൽ ശങ്കർ