🌹 രണ്ടു മോഷ്ടാക്കൾ 🌹 (മിനിക്കഥ) ✍ സ്റ്റാൻലി എം.മങ്ങാട്

ഗ്രാമത്തിലെ കുപ്രസിദ്ധനായ മോഷ്ടാവാണ് പഴയത്തു രാജേഷ്. കാർഷിക വിളകൾ മാത്രമല്ല പശു , ആട്, എന്നീ മൃഗങ്ങളേയും രാജേഷ് മോഷ്ടിക്കാറുണ്ട്.

എന്നും സന്ധ്യയാകുന്നതോടെ രാജേഷ് കള്ളുഷാപ്പിലെത്തി അന്തിക്കള്ളുമോന്തും. പിന്നീട് പത്തുമണിവരെ ഷാപ്പിൽ വരുന്നവരുമായി സൊറ പറഞ്ഞിരിക്കും. ഇതിനിടെ ഒന്നുരണ്ടു കെ.പി.ഏ.സി നാടകഗാനങ്ങൾ പാടും. പ്രത്യേകിച്ച് കെ.എസ്. ജോർജിന്റെ ഗാനങ്ങളോടാണ് രാജേഷിന് പ്രിയം. പത്തുമണിയോടെ ഷാപ്പിൽ നിന്നിറങ്ങി കണ്ടുവച്ചിരുന്ന സാധനങ്ങൾ മോഷ്ടിച്ചെടുക്കും.

ഒരിക്കൽ ഷാപ്പിലെത്തിയ സുഗുണൻ എന്നൊരാളെ രാജേഷ് പരിചയപ്പെട്ടു. അയാൾ പട്ടണത്തിലെ മോഷ്ടാവായിരുന്നു. ഗ്രാമങ്ങളിലേക്കാൾ വിലപിടിപ്പുള്ള വസ്തുക്കൾ മോഷ്ടിക്കാൻ പറ്റിയ സ്ഥലമാണ് പട്ടണമെന്ന് സുഗുണൻ പറഞ്ഞു.

അതോടെ രാജേഷിന്റെ ചിന്ത പട്ടണത്തെക്കുറിച്ചായി. വേണ്ട സഹായങ്ങൾ സുഗുണൻ ചെയ്തു കൊടുക്കാമെന്ന് പറഞ്ഞതോടെ ഒരു ബസ്സിൽ കയറി പഴയത്തു രാജേഷ് പട്ടണത്തിലെത്തി.

ഒരു സായംസന്ധ്യയിലാണ് രാജേഷ് പട്ടണത്തിൽ ബസ്സിറങ്ങിയത്. പകലേത് ? രാത്രിയേത് ? എന്നറിയാത്ത തരത്തിൽ നഗരം മുഴുവൻ നിയോൺ വിളക്കുകൾ പ്രകാശിക്കുന്നു. പഴയത്തു രാജേഷ് ചോദിച്ചു :
” ഒരു കള്ളനു മോഷ്ടിക്കാൻ പറ്റാത്ത രീതിയിൽ വൈദ്യുതിവിളക്കുകൾ പ്രകാശിക്കുകയാണല്ലോ.. പിന്നെ എങ്ങനെ മോഷ്ടിക്കും. ?”

അപ്പോഴേക്കും സുഗുണൻ പറഞ്ഞു :
” ഇവിടെ രാത്രിയും പകലും ഒരുപോലെയാണ്. ”
“എന്തിനാണ് നിങ്ങൾ പകലിനെ ഇത്രയും നീട്ടിക്കൊണ്ടു
പോകുന്നത് ?”
രാജേഷ് ചോദിച്ചു.

അവർ ഇരുവരും ബസ് സ്റ്റാൻഡ്
കഴിഞ്ഞു മെല്ലെ നടക്കുമ്പോൾ രാജേഷ് വീണ്ടും ചോദിച്ചു:
“ഇവിടെ എങ്ങനെ മോഷ്ടിക്കാനാ… ഇത്രയും വെളിച്ചത്തിൽ ? ”

” ഇവിടെ ഗ്രാമത്തിലെപ്പോലെ കാർഷികവിളകളും , വീട്ടു മൃഗങ്ങളുമല്ല മോഷ്ടിക്കുക ”
സുഗുണൻ പറഞ്ഞു.

“പിന്നെ ?”

” ബാങ്കുകൾ, സ്വർണ്ണക്കടകൾ, ഒറ്റയ്ക്ക് താമസിക്കുന്ന വിധവകളുടെ വീടുകൾ, വഴിയാത്രക്കാരുടെ ബാഗുകൾ ആഭരണങ്ങൾ എന്നിവയാണ് മോഷ്ടിക്കുക ”
സുഗുണന്റെ ഉത്തരം കേട്ടു രാജേഷ് പറഞ്ഞു :
” വിധവകളെയും, വഴി യാത്രക്കാരെയും ഉപദ്രവിക്കരുത് ! ”

പിന്നീട് ചിരിച്ചു കൊണ്ട് രാജേഷ് ചോദിച്ചു :
” ഇവിടുത്തെ ചില പ്രത്യേകതകൾ സുഗുണൻ ശ്രദ്ധിച്ചിട്ടുണ്ടോ ? ഇവിടെ രാത്രിയും പകലും കൊതുകുകൾ കടിക്കുന്നുണ്ട്. പണ്ട് രാത്രി മാത്രം കടിച്ചിരുന്ന കൊതുകുകൾ പകൽ കടിക്കുന്നത് എന്തുകൊണ്ടാ…?”
രാജേഷിന്റെ ചോദ്യത്തിന് സുഗുണൻ ഉത്തരം കൊടുത്തില്ല.
പിന്നീട് രാജേഷ് തന്നെ പറഞ്ഞു :
“നിങ്ങൾ രാത്രിയുടെ ദൈർഘ്യം കുറച്ചതുകൊണ്ടാ…”

തെരുവു വിളക്കുകളുടെ ഇടയിലൂടെ നടക്കുമ്പോൾ വീണ്ടും രാജേഷ് പറഞ്ഞു :
പൂക്കളായ നാലുമണിയും, പത്തുമണിയുമല്ലാതെ മറ്റെല്ലാപ്പൂക്കളും രാത്രി വിരിയുന്നതാ… ഇവിടെ അതെന്താ.. വിരിയാത്തത്‌ ? നിങ്ങൾ രാത്രിയുടെ ദൈർഘ്യം കുറച്ചതു കൊണ്ടാ.. അതുകൊണ്ടാ നിങ്ങൾക്ക് പ്ലാസ്റ്റിക്ക് പൂക്കൾ ധാരാളം ഉപയോഗിക്കേണ്ടിവരുന്നത് !. ”

രാജേഷിന്റെ ഉത്തരം കേട്ടു സുഗുണനും വിട്ടില്ല. അയാൾ ചോദിച്ചു :
“നിങ്ങളുടെ ഗ്രാമത്തിൽ ഉഷസ്സാകുന്നു , സന്ധ്യയാകുന്നു. അവിടെ വൈദ്യുതി വിളക്കുകൾ ഇല്ലാതെ രാത്രി നിങ്ങൾ വിഷമിക്കില്ലേ.?

രാജേഷ് പറഞ്ഞു :
” ഇല്ല , ഞങ്ങളുടെ ഗ്രാമത്തിൽ പകലുകൾ പകലും, രാത്രികൾ രാത്രിയുമാണ്.! ഞങ്ങൾ പ്രകൃതി നിയമങ്ങൾ അനുസരിച്ചു ജീവിക്കുന്നു

അല്പം കഴിഞ്ഞപ്പോൾ സുഗുണൻ ചോദിച്ചു :
“നിനക്ക് ഇവിടെ മോഷ്ടിക്കണമെന്നില്ലേ ?”
“ഇല്ല. വിധവകളെയും വഴിയാത്രക്കാരെയും ഉപദ്രവിക്കാൻ എനിക്കാവില്ല. ”

ഇത്രയും പറഞ്ഞു മുഴുപ്പിക്കുന്നതിനുമുമ്പ് കടന്നു വന്ന ബസ്സിൽ കയറി പഴയത്തു രാജേഷ് പട്ടണം വിട്ടു.

സ്റ്റാൻലി എം.മങ്ങാട്✍