🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 30 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

അരുതാത്ത വ്യാഖ്യാനങ്ങൾക്കു മുതിരാതിരിക്കാം
———————————————————————-

ഒരു രാജ്യത്തെ രാജാവ്, വില്ലാളിവീരനും, ആയോധന കലയിൽ നിപുണനും, തികഞ്ഞ ആത്മവിശ്വാസം ഉള്ളവനും ആയിരുന്നു. ഒരിക്കൽ നായാട്ടിനിറങ്ങിയ അദ്ദേഹം, അവിശ്വസനീയമായ ഒരു കാഴ്ച കണ്ടു. വനാതിർത്തിയിലെ മരങ്ങളിൽ, ആരോ കൃത്യമായി അമ്പെയ്തു കൊള്ളിച്ചിരിക്കുന്നു. മരത്തടിയിൽ ചെറിയ വൃത്തം വരച്ച്, ഓരോ അമ്പും, അതിനുള്ളിൽത്തന്നെ സൂക്ഷ്മതയോടെ എയ്തു തറപ്പിച്ചിരിക്കുന്നു. ഇത്രയധികം സൂക്ഷ്മതയോടെ അമ്പെയ്യാൻ കഴിവുള്ള അയാൾക്കു്, തൻ്റെ നേരേയും അമ്പെയ്യാൻ കഴിയുമെന്നു രാജാവു ഭയപ്പെട്ടു. രാജാവു തൻ്റെ കിങ്കരരെ അയച്ച് , നാടു മുഴുവൻ അയാളെ അന്വേഷിപ്പിച്ചു. എന്നാൽ ആർക്കും അയാളെ കണ്ടെത്താനായില്ല. അടുത്ത ദിവസം, കൊട്ടാരവളപ്പിലെ മരത്തിലും അമ്പുകൾ കണ്ട്, രാജാവിനുറക്കം നഷ്ടപ്പെട്ടു. ഭക്ഷണത്തിൽ താൽപര്യമില്ലാതായി. വൈകാതെ അദ്ദേഹം രോഗശയ്യയിലായി.

അങ്ങനെയാരിക്കെ, ഒരു ദിവസം അപെയ്ത്തുകാരൻ പട്ടാളക്കാരുടെ പിടിയിലായി. അയാളെക്കണ്ട രാജാവ് ഞെട്ടിപ്പോയി. ഒരു ഏഴു വയസ്സുകാരൻ. രാജാവവനോടു ചോദിച്ചു: “നീ എങ്ങനെ ഇത്ര കൃത്യമായി അമ്പെയ്യുന്നു?” അവൻ പറഞ്ഞു: “ഞാൻ ആദ്യം മരത്തിൽ അമ്പെയ്തു തറയ്ക്കും. പിന്നീടു് ആണികൊണ്ട്, അമ്പിനു ചുറ്റും, ചെറുവൃത്തം വരയ്ക്കും!”

സംഭവങ്ങളല്ല, അവയുടെ വ്യാഖ്യാനങ്ങളാണ്, ഒരാളിൽ, സന്തോഷമോ, സംഘർഷമോ  സൃഷ്ടിക്കുന്നത്. ദുർവ്യാഖ്യാനങ്ങൾ മനസ്സിനെയും ചിന്തകളെയും നശിപ്പിക്കും. അന്യരുടെ പ്രവൃത്തിയേക്കുറിച്ചുള്ള അതിരു കടന്ന ആകാംക്ഷ, സ്വന്തം ചിന്തകളെ വഴിതെറ്റിക്കുന്നുവെങ്കിൽ, അത് അപകടകാരിയാണ്. എന്തിനേയും സംശയത്തോടെ കാണുന്ന മനസ് , രോഗാതുരമാണ്. അവിടെ നല്ല ചിന്തകൾ രൂപം കൊള്ളുകയോ, കർമ്മ പദ്ധതികൾ ഉടലെടുക്കുകയോ ചെയ്യുകയില്ല. അതിനെ അതിജീവിക്കാൻ എല്ലാവർക്കും കഴിയണം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര