📱വാർത്തകൾ ഒറ്റനോട്ടത്തിൽ📱 – 2024 | ഒക്ടോബർ 27 | ഞായർ ✍ കപിൽ ശങ്കർ

🔹പിണറായി സര്‍ക്കാര്‍ കഴിഞ്ഞ എട്ടുവര്‍ഷത്തിനിടെ 1.8 ലക്ഷം പാര്‍ട്ടി ബന്ധുക്കള്‍ക്ക് പിന്‍വാതില്‍ നിയമനം നല്‍കിയെന്ന വാര്‍ത്ത ഞെട്ടിക്കുന്നതാണെന്ന് രമേശ് ചെന്നിത്തല . ഇത് കേരളത്തിലെ യുവജനങ്ങളോടുള്ള ചതിയാണെന്നും ഇത്തരത്തില്‍ അനധികൃത നിയമനം ലഭിച്ച മുഴുവന്‍ പേരെയും ഒഴിവാക്കി എംപ്ളോയ്മെന്റ് എക്സ്ചേഞ്ച് വഴി അര്‍ഹരാവയവര്‍ക്ക് നിയമനം നല്‍കണമെന്നും ഇത് അടിയന്തിരമായി നടപ്പാക്കണം എന്നും രമേശ് ചെന്നിത്തല ആവശ്യപ്പെട്ടു.

🔹എഡിഎം നവീന്‍ ബാബുവിന്റെ മരണത്തില്‍ പിപി ദിവ്യയെ അറസ്റ്റ് ചെയ്യണമെന്ന് ആവശ്യപ്പെട്ട് ജില്ലാ വികസന സമിതിയില്‍ പ്രമേയം. കോണ്‍ഗ്രസ് അംഗങ്ങളുടെ പ്രതിഷേധത്തെ തുടര്‍ന്നായിരുന്നു കളക്ടര്‍ പ്രമേയം അംഗീകരിച്ചത്. യാത്രയയപ്പ് ചടങ്ങിലേക്ക് ദിവ്യ എത്തുമെന്ന കാര്യം കളക്ടര്‍ക്ക് അറിയാമായിരുന്നു എന്ന പ്രോസിക്യൂഷന്‍ വാദത്തെക്കുറിച്ച് പ്രതികരിക്കാനില്ലെന്നും താന്‍ തുടരണോ എന്ന കാര്യം സര്‍ക്കാര്‍ തീരുമാനിക്കട്ടെയെന്നും കളക്ടര്‍ അരുണ്‍ കെ വിജയന്‍ പറഞ്ഞു.

🔹സിപിഎം നേതാവും മുന്‍ എംപിയുമായ എന്‍.എന്‍.കൃഷ്ണദാസിന്റെ മാധ്യമപ്രവര്‍ത്തകരെ അധിക്ഷേപിച്ച നടപടി അങ്ങേയറ്റം അപലപനീയമെന്ന് കേരള പത്രപ്രവര്‍ത്തക യൂണിയന്‍. ഹീനമായ പ്രസ്താവന പിന്‍വലിച്ച് മാപ്പു പറയാന്‍ കൃഷ്ണദാസ് തയ്യാറാകണമെന്ന് യൂണിയന്‍ ഭാരവാഹികള്‍ ആവശ്യപ്പെട്ടു.

🔹എഡിഎം നവീന്‍ ബാബുവിനെതിരായ കൈക്കൂലി ആരോപണത്തിലെ പരാതിക്കാരനായ പ്രശാന്തിനെ സസ്പെന്റ് ചെയ്തു. പരിയാരം മെഡിക്കല്‍ കോളേജില്‍ സര്‍വീസിലിരിക്കെ ബിസിനസ് നടത്തിയതും അനധികൃത അവധിയെടുത്തതും അടക്കം ചൂണ്ടിക്കാട്ടിയാണ് സസ്പെന്റ്ചെയ്തത്. പ്രശാന്തിനെ ജോലിയില്‍ നിന്ന് പിരിച്ചുവിടുമെന്ന് നേരത്തെ ആരോഗ്യമന്ത്രി പറഞ്ഞിരുന്നു.

🔹വെടിക്കെട്ട് അല്‍പം വൈകിയതാണോ പൂരം കലക്കലെന്നും കള്ളം പ്രചരിപ്പിക്കാന്‍ ആവേശം കൂടുതല്‍ ലീഗിനെന്നും മുഖ്യമന്ത്രി പിണറായി വിജയന്‍. തൃശൂര്‍ പൂരം കലങ്ങിയിട്ടില്ലെന്നും ആകെ സംഭവിച്ചത് വെടിക്കെട്ട് അല്‍പം വൈകി എന്നതാണെന്നും ഇതിന്റെ പേരാണോ പൂരം കലക്കലെന്നും പിണറായി വിജയന്‍ ചോദിച്ചു. ലീഗിന് വര്‍ഗീയ ശക്തികളുമായി കൂട്ടു കൂടാന്‍ കഴിയില്ലെന്ന് പറയാന്‍ സാധിക്കില്ലെന്ന് പറഞ്ഞ മുഖ്യമന്ത്രി മലപ്പുറം ജില്ലയിലെ കേസുകളുമായി ബന്ധപ്പെട്ട് ലീഗ് അസത്യം പ്രചരിപ്പിക്കുകയാണെന്നും ശരി അല്ലാത്തത് പ്രചരിപ്പിച്ച് മലപ്പുറത്തെ അപകീര്‍ത്തിപ്പെടുത്തുകയാണ് ലീഗ് ചെയ്യുന്നതെന്നും പറഞ്ഞു. ജമാഅത്തെ ഇസ്ലാമിയുടെ ലക്ഷ്യം ഇസ്ലാമിക രാഷ്ട്രമാണെന്നും ജമാ അത്തെ ഇസ്ലാമിക്ക് രാജ്യത്തിന് പുറത്തുള്ള ഭീകര സംഘടനകളുമായി ബന്ധം ഉണ്ടെന്നും ആര്‍എസ്എസും ജമാ അത്തെ ഇസ്ലാമിയും ഒരേ തൂവല്‍ പക്ഷികളാണെന്നും അതേസമയം ലീഗ് കമ്മ്യൂണിസ്റ്റ് വിരുദ്ധതക്കായി ഇത്തരം വര്‍ഗീയ കക്ഷികളുമായി കൂട്ടു കൂടുന്നുവെന്നും മുഖ്യമന്ത്രി പറഞ്ഞു. പി ജയരാജന്റെ ‘കേരളം, മുസ്ലിം രാഷ്ട്രീയം, രാഷ്ട്രീയ ഇസ്ലാം’ എന്ന പുസ്തകം പ്രകാശനം ചെയ്തു സംസാരിക്കുകയായിരുന്നു പിണറായി വിജയന്‍.

🔹സുരേഷ് ഗോപി പാര്‍ട്ടി പരിപാടിയില്‍ അപമാനിച്ചെന്ന് ചങ്ങനാശ്ശേരി മണ്ഡലം ജനറല്‍ സെക്രട്ടറി കണ്ണന്‍ പായിപ്പാട് പ്രധാനമന്ത്രിക്കു പരാതി നല്‍കി. വെളളിയാഴ്ച ചങ്ങനാശേരിയില്‍ നടന്ന പരിപാടിയില്‍ സുരേഷ് ഗോപി ഒരു മണിക്കൂര്‍ നേരത്തെ എത്തിയിരുന്നെങ്കിലും വേദിയില്‍ ഇരിക്കാന്‍ കൂട്ടാക്കിയില്ലെന്നും, അതോടൊപ്പം നിവേദനം നല്‍കാന്‍ എത്തിയവരെ ഞാന്‍ നിങ്ങളുടെ എംപി അല്ലെന്ന് പറഞ്ഞ് അധിക്ഷേപിച്ചുവെന്നും കണ്ണന്‍ ആരോപിക്കുന്നു.

🔹പാലക്കാട് സ്ഥാനാര്‍ത്ഥിയായി ഡിസിസി നിര്‍ദ്ദേശിച്ചത് കെ.മുരളീധരനെ എന്ന് വ്യക്തമാക്കുന്ന കത്ത് പുറത്ത് . ഡിസിസി പ്രസിഡന്റ് എ.തങ്കപ്പന്‍ ദേശീയ നേതൃത്വത്തിന് നല്‍കിയ കത്താണ് പുറത്തായത്. ബിജെപിയെ തുരത്താന്‍ കെ.മുരളീധരനെ പാലക്കാട് മത്സരിപ്പിക്കണമെന്ന് കത്തില്‍ ഡിസിസി പ്രസിഡന്റ് ആവശ്യപ്പെട്ടിരുന്നു. ഡിസിസി ഭാരവാഹികള്‍ ഐക്യകണ്ഠേന എടുത്ത തീരുമാനപ്രകാരമാണ് ആവശ്യം ഉന്നയിക്കുന്നതെന്നും കത്തില്‍ വ്യക്തമാക്കിയിരുന്നു.

🔹കേരളത്തില്‍ ഖനനമേഖലയുടെ സര്‍വ്വേയ്ക്കും ഇനി ഡ്രോണ്‍. മൈനിങ്ങ് ആന്‍ഡ് ജിയോളജി വകുപ്പ് കെല്‍ട്രോണിന്റെ സഹായത്തോടെ വികസിപ്പിച്ചെടുത്ത ഡ്രോണ്‍ ലിഡാര്‍ സര്‍വ്വേ പ്രവര്‍ത്തനമാരംഭിച്ചു. മൈനിങ്ങ് ആന്‍ഡ് ജിയോളജി മേഖലയില്‍ വലിയ മാറ്റങ്ങള്‍ കൊണ്ടുവരാന്‍ സാധിച്ചിട്ടുണ്ടെന്നും മന്ത്രി പി രാജീവ് പറഞ്ഞു.

🔹എറണാകുളം പെരുമ്പാവൂര്‍ മണ്ണൂരില്‍ വന്‍ സ്പിരിറ്റ് വേട്ട. തവിടിന്റെ ഇടയില്‍ കടത്താന്‍ ശ്രമിച്ച സ്പിരിറ്റാണ് എക്സൈസ് എന്‍ഫോഴ്സ്മെന്റ് പിടികൂടിയത്. കോട്ടക്കല്‍ സ്വദേശി ബാബു, ചാലക്കുടി സ്വദേശി വിനോദ് എന്നിവരെയാണ് കസ്റ്റഡിയിലെടുത്തത്. 54 കന്നാസ് സ്പിരിറ്റ് ഏകദേശം ആയിരത്തി എണ്ണൂറ് ലിറ്ററിലേറെ സ്പിരിറ്റ് ഉണ്ടാകുമെന്ന് സ്റ്റേറ്റ് എക്സൈസ് എന്‍ഫോഴ്സ്മെന്റ് സ്‌ക്വാഡ് അറിയിച്ചു.

🔹പ്രായപൂര്‍ത്തിയാകാത്ത പെണ്‍കുട്ടിക്കുനേരെ ലൈംഗികാതിക്രമം കാട്ടിയ യുവാവിനെ പെരുനാട് പോലീസ് അറസ്റ്റ് ചെയ്തു. പെരുനാട് മുണ്ടന്‍മല ഉദയഭവനം വീട്ടില്‍ അപ്പു എന്ന് വിളിക്കുന്ന ഉദയകുമാറാ(26)ണ് പിടിയിലായത്. കേസെടുത്തത് അറിഞ്ഞ്, മൊബൈല്‍ ഫോണ്‍ ഓഫാക്കിയശേഷം ഇയാള്‍ ഒളിവില്‍ പോയിരുന്നു.
ഈമാസം 22 ന് വൈകിട്ട് നാലരയോടെ, 17 കാരിയെ വീടിനു സമീപമുള്ള തോടിന്റെ കരയില്‍ വച്ച് കയ്യില്‍ കടന്നുപിടിച്ച് ശരീരത്തിലേക്ക് അടുപ്പിക്കുകയും, പിന്നീട് ലൈംഗികമായി ഉപദ്രവിക്കാന്‍ ശ്രമിക്കുകയുമായിരുന്നു. കുട്ടിയുടെ സഹോദരന്‍ വരുന്നതുകണ്ട് ഇയാള്‍ ഓടി രക്ഷപ്പെട്ടു. വിവാഹം കഴിക്കണമെന്ന് ആവശ്യപ്പെട്ട് പിന്തുടര്‍ന്ന് ശല്യപ്പെടുത്താറുമുണ്ടായിരുന്നു.

🔹പതിനാറുകാരിയെ ജൂലൈ മുതല്‍ ഇന്നലെ വരെയുള്ള കാലയളവില്‍ പല ദിവസങ്ങളിലായി പലതവണ ലൈംഗികപീഡനത്തിന് വിധേയയാക്കിയ കേസില്‍ പ്രതിയെ കോയിപ്രം പൊലീസ് പിടികൂടി. തോട്ടപ്പുഴശ്ശേരി ചിറയറമ്പ് കുറിയന്നൂര്‍ അച്ചാര്‍ ഫാക്ടറി പാറയില്‍ വീട്ടില്‍ വിവേക് വിനോദ്(18) ആണ് അറസ്റ്റിലായത്.
ഇയാളുടെ വീട്ടിലെത്തിച്ചാണ് കുട്ടിയെ ബലം പ്രയോഗിച്ച് ലൈംഗിക പീഡനത്തിന് വിധേയക്കിയത്. ജൂലൈയില്‍ സ്‌കൂള്‍ കലോത്സവത്തിന്റെ ദിവസമാണ് ആദ്യമായി പീഡിപ്പിച്ചത്. ഒടുവില്‍ ഇന്നലെ രാവിലെ സ്‌കൂളിലേക്ക് പോകുന്ന വഴിക്ക് കുട്ടിയെ യുവാവ് സ്വന്തം വീട്ടിലേക്ക് സ്‌കൂട്ടറില്‍ കയറ്റിക്കൊണ്ടുപോയി പീഡിപ്പിക്കുകയും ചെയ്തു.
തുടര്‍ന്ന്, കുട്ടിയുടെ മാതാവ് സ്റ്റേഷനില്‍ എത്തി വിവരം പറയുകയും, അമ്മയുടെ സാന്നിധ്യത്തില്‍ പോലീസ് സ്റ്റേഷനിലെ ശിശു സൗഹൃദ ഇടത്തില്‍ വച്ച് എസ് സി പി ഓ ഷെബി മൊഴി രേഖപ്പെടുത്തുകയും ചെയ്തു. പോലീസ് ഇന്‍സ്പെക്ടറുടെ നേതൃത്വത്തില്‍ അന്വേഷണം നടത്തി പ്രതിയെ വീട്ടില്‍ നിന്നും ഉടനടി കസ്റ്റഡിയിലെടുക്കുകയായിരുന്നു.
സംഭവസ്ഥലത്ത് ശാസ്ത്രീയ അന്വേഷണ സംഘം പരിശോധന നടത്തി. പെണ്‍കുട്ടിയുടെ വൈദ്യപരിശോധന ഉള്‍പ്പെടെയുള്ള നടപടികള്‍ നടത്തി തെളിവുകള്‍ പോലീസ് ശേഖരിച്ചു. പ്രതിയുടെ മൊബൈല്‍ ഫോണ്‍ ബന്തവസ്സിലെടുത്ത് ശാസ്ത്രീയ പരിശോധനക്ക് അയച്ചു, ഇയാളുടെ കുറ്റസമ്മതമൊഴിയും രേഖപ്പെടുത്തി, വൈദ്യപരിശോധന നടത്തി. കുട്ടിയെ കയറ്റിക്കൊണ്ടുപോയ സ്‌കൂട്ടര്‍ പോലീസ് പിടിച്ചെടുത്തു.

🔹ശസ്ത്രക്രിയയില്‍ പരാജയപ്പെട്ടാല്‍ ഡോക്ടര്‍മാരെ ചികിത്സാ പിഴവിന് കുറ്റക്കാരാക്കാന്‍ സാധിക്കില്ലെന്ന് സുപ്രീം കോടതി. എല്ലായ്പ്പോഴും ശസ്ത്രക്രിയ വിജയകരമാകുമെന്ന് പ്രതീക്ഷിക്കാനോ, ശസ്ത്രക്രിയയിലൂടെ രോഗിയുടെ ആരോഗ്യനില മെച്ചപ്പെടാനോ സാധിക്കുമെന്ന് കരുതാനാവില്ലെന്നും ഉത്തരവില്‍ കോടതി ചൂണ്ടിക്കാട്ടിയിട്ടുണ്ട്. നിസാരമായ പരിചരണക്കുറവ്, കണക്കുകൂട്ടലിലെ പിഴവ് അല്ലെങ്കില്‍ അപകടങ്ങള്‍ എന്നിവ മെഡിക്കല്‍ പ്രൊഫഷണലിന്റെ ഭാഗത്ത് നിന്നുള്ള അശ്രദ്ധയ്ക്ക് മതിയായ തെളിവല്ലെന്നും സുപ്രീം കോടതി വ്യക്തമാക്കി. അതിനാല്‍ വ്യക്തമായ തെളിവുണ്ടെങ്കില്‍ മാത്രമേ ഡോക്ടര്‍മാരെ പ്രതിചേര്‍ക്കാവൂ എന്നാണ് സുപ്രീം കോടതി വ്യക്തമാക്കിയിരിക്കുന്നത്.

🔹ഒഡീഷയില്‍ 21 കാരിയെ കൂട്ടബലാത്സംഗം ചെയ്ത കേസില്‍ മൂന്ന് പ്രതികള്‍ അറസ്റ്റില്‍. ഒക്ടോബര്‍ 20ന് വൈകുന്നേരം യുവതി ഫത്തേഗര്‍ രാമക്ഷേത്രത്തില്‍ നിന്ന് മടങ്ങുമ്പോഴാണ് ബലാത്സംഗം ചെയ്യപ്പെട്ടത്.
നയാഗര്‍ ജില്ലയിലാണ് യുവതി ആക്രമിക്കപ്പെട്ടത്. യുവതിയുടെ പരാതിയില്‍ പ്രതികളെ അറസ്റ്റ് ചെയ്തിട്ടുണ്ടെന്നും വിശദമായ അന്വേഷണം നടക്കുകയാണെന്നും ഖണ്ഡപദ എസ്.ഡി.പി.ഒ ബിമല്‍ കുമാര്‍ ബാരിക് പറഞ്ഞു.
രാമക്ഷേത്രത്തില്‍ നിന്ന് മടങ്ങുന്നതിനിടയില്‍ ഒപ്പമുണ്ടായിരുന്ന പ്രതിശ്രുത വരനെയും യുവതിയെയും പിതാഖൈ വനത്തിന് സമീപത്ത് വെച്ച് ഒരു സംഘം ആളുകള്‍ തടയുകയായിരുന്നു. തുടര്‍ന്ന് യുവാവിന്റെ കഴുത്തില്‍ കത്തിവെച്ച് ഭീഷണിപ്പെടുത്തി യുവതിയെ കാട്ടിലേക്ക് വലിച്ചിഴച്ച് കൊണ്ടുപോകുകയായിരുന്നു. പിന്നാലെ ബലാത്സംഗത്തിന്റെ ദൃശ്യങ്ങള്‍ പ്രതികള്‍ ഫോണില്‍ പകര്‍ത്തുകയും സോഷ്യല്‍ മീഡിയയിലൂടെ പ്രചരിപ്പിക്കുകയും ചെയ്തിരുന്നു. ഈ ദൃശ്യങ്ങള്‍ വ്യാപകമായി ഷെയര്‍ ചെയ്യപ്പെടുകയും നിരവധി ആളുകള്‍ കാണുകയുമുണ്ടായി. ഇതിനെ തുടര്‍ന്ന് ഒക്ടോബര്‍ 24ന് പ്രതികള്‍ക്കെതിരെ എഫ്.ഐ.ആര്‍ രജിസ്റ്റര്‍ ചെയ്യുകയായിരുന്നു.

🔹വിമാനങ്ങള്‍ക്കു നേരെയുള്ള വ്യാജബോംബ് ഭീഷണിയില്‍ സാമൂഹികമാധ്യമങ്ങള്‍ക്ക് കര്‍ശനനിര്‍ദേശവുമായി കേന്ദ്രം. വ്യാജസന്ദേശങ്ങള്‍ നിയന്ത്രിക്കാനുള്ള നടപടികള്‍ സ്വീകരിക്കണമെന്നാണ് ഐടി മന്ത്രാലയത്തിന്റെ ഉത്തരവ്. തെറ്റായ സന്ദേശങ്ങള്‍ ശ്രദ്ധയില്‍പ്പെട്ടാല്‍ 72 മണിക്കൂറിനുള്ളില്‍ അധികാരികളെ അറിയിക്കണമെന്നാണ് നിര്‍ദേശം. അത് അറിയിക്കാത്ത പക്ഷം ഐടി ആക്ട് പ്രകാരം കുറ്റകൃത്യമായി കണക്കാക്കുമെന്ന മുന്നറിയിപ്പും ഐടിമന്ത്രാലയം കമ്പനികള്‍ക്ക് നല്‍കിയിട്ടുണ്ട്.

🔹വായുമലിനീകരണ തോതിൽ മാറ്റം വരാതെ രാജ്യ തലസ്ഥാനം. വായു ഗുണനിലവാര സൂചിക ഏറ്റവും മോശം നിലയിൽ തുടരുന്നു. ജനജീവിതത്തെ ശ്വാസംമുട്ടിച്ച് ദില്ലിയിലെ വിവിധ ഇടങ്ങളിൽ പുകപടലം രൂപപ്പെട്ടു. അതേസമയം സർക്കാർ ജാഗ്രത നിർദ്ദേശങ്ങൾ പുറപ്പെടുവിച്ചിട്ടുണ്ട്. വിവിധ മേഖലകളിൽ ഗതാഗത ഘടനയിൽ മാറ്റം വരുത്തും. വായു നിലവാര സൂചിക കുറഞ്ഞ മേഖലകളിലേക്കുള്ള യാത്രകൾ ഒഴിവാക്കണം. പൊതു ഇടങ്ങളിൽ മാലിന്യവും മരങ്ങളും കത്തിക്കുന്നത് വിലക്കി. ദീപാവലി പ്രമാണിച്ച് വായു മലിനീകരണം വർദ്ധിക്കുമെന്നാണ് സൂചന. അതിനിടയിൽ വായു മലിനീകരണത്തെ ചൊല്ലിയുള്ള രാഷ്ട്രീയ പോരും മുറുകുകയാണ്.
രണ്ട് ദിവസം മുമ്പ് ആം ആദ്മിക്കെതിരെ യമുനാനദിയിലെ വിഷപ്പത നുരഞ്ഞുപൊന്തിയ മലിനജലത്തില്‍ മുങ്ങി പ്രതിഷേധിച്ച ദില്ലി ബി.ജെ.പി. അധ്യക്ഷന്‍ വീരേന്ദ്ര സച്ദേവയെ ശരീരം ചൊറിഞ്ഞുതടിച്ച് ആശുപത്രിയില്‍ പ്രവേശിപ്പിച്ചിരുന്നു. യമുനാ ശുദ്ധീകരണത്തിന് ദില്ലി സര്‍ക്കാര്‍ പദ്ധതി പ്രഖ്യാപിച്ചിട്ടും ഫലപ്രദമായില്ലെന്നാണ് ആരോപണം. അതേ സമയം ബിജെപി ഭരിക്കുന്ന അയല്‍സംസ്ഥാനങ്ങള്‍ വ്യവസായ കേന്ദ്രങ്ങളില്‍നിന്നുള്ള മലിനജലം നദിയിലേക്ക് തള്ളുന്നതാണ് മലിനീകരണത്തിന് കാരണമെന്നാണ് എഎപിയുടെ വാദം.

🔹ഫിലിപ്പീന്‍സില്‍ ട്രാമി ഉഷ്ണമേഖലാ കൊടുങ്കാറ്റില്‍ വന്‍ നാശനഷ്ടം. മണ്ണിടിച്ചിലിലും വെള്ളപ്പൊക്കത്തിലുമായി ഇതുവരെ 81 പേര്‍ മരിച്ചു. 3,20,000 പേരെ കൊടുങ്കാറ്റിനെ തുടര്‍ന്ന് മാറ്റിത്താമസിപ്പിച്ചു. മധ്യ ഫിലിപ്പീന്‍സിലെ ബിക്കോള്‍ മേഖലയിലാണ് വെള്ളപ്പൊക്കത്തിലും മണ്ണിടിച്ചിലിലും കൂടുതല്‍ മരണമുണ്ടായത്. ചിലയിടത്ത് 24 മണിക്കൂറിനുള്ളില്‍ പെയ്തത് ഒന്നോ രണ്ടോ മാസം പെയ്യേണ്ട മഴയാണ്. ഇത് മിന്നല്‍ പ്രളയത്തിന് കാരണമായതെന്നാണ് റിപ്പോര്‍ട്ടുകള്‍.

🔹ഇന്നലെ പുലര്‍ച്ചെ ഇറാനെ ലക്ഷ്യമിട്ട് ഇസ്രയേല്‍ നടത്തിയ ആക്രമണത്തെ അപലപിച്ച് പാകിസ്താന്‍. മിഡില്‍ ഈസ്റ്റില്‍ സംഘര്‍ഷം രൂക്ഷമാകുന്നതിന്റെ പൂര്‍ണ ഉത്തരവാദിത്വം ഇസ്രയേലിനാണെന്ന് പാകിസ്താന്‍ വിദേശകാര്യമന്ത്രാലയം ആരോപിച്ചു.

🔹പാകിസ്താനില്‍ ചാവേറാക്രമണത്തില്‍ എട്ട് പേര്‍ കൊല്ലപ്പെട്ടു. ഖൈബര്‍ പഖ്തൂണ്‍ഖ്വ പ്രവിശ്യയിലെ മിര്‍ അലി പട്ടണത്തിലായിരുന്നു ആക്രമണം. പ്രദേശത്ത് നിര്‍ത്തിയിട്ടിരുന്ന മോട്ടോര്‍സൈക്കിള്‍ റിക്ഷയുടെ പിന്നില്‍ നിന്ന് ചാവേര്‍ പൊട്ടിത്തെറിച്ചുവെന്നാണ് എ.എഫ്.പി റിപ്പോര്‍ട്ട് ചെയ്യുന്നത്.

🔹ന്യൂസീലന്‍ഡിനു മുന്നില്‍ ഇന്ത്യയ്ക്ക് പരമ്പര തോല്‍വി. 113 റണ്‍സിനാണ് പുണെ ടെസ്റ്റില്‍ ഇന്ത്യ അടിയറവ് പറഞ്ഞത്. രണ്ടാം ഇന്നിങ്‌സില്‍ കിവീസ് ഉയര്‍ത്തിയ 359 റണ്‍സ് വിജയലക്ഷ്യത്തിലേക്ക് ബാറ്റെടുത്ത ഇന്ത്യ 245 റണ്‍സിന് പുറത്തായി. ഒന്നാം ഇന്നിങ്‌സില്‍ ഏഴു വിക്കറ്റ് വീഴ്ത്തിയതിനു പിന്നാലെ രണ്ടാം ഇന്നിങ്‌സിലും ആറു വിക്കറ്റ് നേടിയ മിച്ചല്‍ സാന്റ്‌നറാണ് ഇന്ത്യയെ തകര്‍ത്തത്. 1955-56 മുതല്‍ ഇന്ത്യയില്‍ ടെസ്റ്റ് പരമ്പര കളിക്കുന്ന ന്യൂസീലന്‍ഡിന്റെ ഇന്ത്യന്‍ മണ്ണിലെ ആദ്യ ടെസ്റ്റ് പരമ്പര വിജയമാണിത്. 2012 ല്‍ ഇംഗ്ലണ്ടിനോടേറ്റ പരമ്പര തോല്‍വിക്ക് ശേഷം നാട്ടിലെ ഇന്ത്യയുടെ ആദ്യ ടെസ്റ്റ് പരമ്പര തോല്‍വിയാണിത്.

🔹നസ്ലെന്‍ നായകനായി എത്തുന്ന ‘ഐ ആം കാതലന്‍’ സിനിമയുടെ ട്രെയിലര്‍ പുറത്തുവിട്ടു. ഗിരീഷ് എ ഡിയാണ് സംവിധാനം. നസ്ലെനൊപ്പം കഥാപാത്രങ്ങളായി ലിജോമോള്‍ ജോസ്, ദിലീഷ് പോത്തന്‍, അന്‍ഷിമ അനില്‍കുമാര്‍ വിനീത് വാസുദേവന്‍, സജിന്‍ ചെറുകയില്‍, വിനീത് വിശ്വം, അര്‍ഷാദ് അലി, ഷിന്‍സ് ഷാന്‍, ശരണ്‍ പണിക്കര്‍, അര്‍ജുന്‍ കെ, സനത്ത് ശിവരാജ് എന്നിവര്‍ എത്തുന്നു. തിരക്കഥ സജിന്‍ ചെറുകയില്‍. ഗോകുലും ഗോപാലനും ഡോ. പോള്‍ വര്‍ഗീസും കൃഷ്ണമൂര്‍ത്തിയും ചേര്‍ന്ന് നിര്‍മിക്കുമ്പോള്‍ റിലീസ് നവംബര്‍ ഏഴിന് ആണ്. നസ്ലെനും മമിതയും പ്രേമലുവില്‍ പ്രധാന കഥാപാത്രങ്ങളായപ്പോള്‍ ഗിരീഷ് എ ഡി ആണ് സംവിധാനം ചെയ്തത്. പല വമ്പന്‍മാരെയും ഞെട്ടിച്ചാണ് പ്രേമലു ആഗോള കളക്ഷനില്‍ 136 കോടി നേട്ടമുണ്ടാക്കിയത്.

🔹പുതുമുഖം സിനോജ് മാക്സ്, ആദി ഷാന്‍, അഞ്ചല്‍, നൈറ നിഹാര്‍ എന്നിവരെ പ്രധാന കഥാപാത്രങ്ങളാക്കി സന്ദീപ് അജിത് കുമാര്‍ സംവിധാനം ചെയ്ത ചിത്രമാണ് ‘ക്രൗര്യം’. ചിത്രത്തിലെ ഒരു വീഡിയോ ഗാനം പുറത്തെത്തി. കണ്‍മുനകളില്‍ എന്നാരംഭിക്കുന്ന ഗാനത്തിന് വരികള്‍ എഴുതിയിരിക്കുന്നതും സംഗീതം പകര്‍ന്നിരിക്കുന്നതും അനു കുരിശിങ്കല്‍ ആണ്. വിധു പ്രതാപ് ആണ് ആലാപനം. വിജയന്‍ വി നായര്‍, കുട്ട്യേടത്തി വിലാസിനി, റോഷില്‍ പി രഞ്ജിത്ത്, നിസാം ചില്ലു, ഗാവന്‍ റോയ്, നിമിഷ ബിജോ, പ്രഭ വിജയമോഹന്‍, ഇസ്മായില്‍ മഞ്ഞാലി, ശ്രീലക്ഷ്മി ഹരിദാസ്, ഷൈജു ടി വേല്‍ എന്നിവരാണ് മറ്റ് കഥാപാത്രങ്ങളെ അവതരിപ്പിക്കുന്നത്. പ്രദീപ് പണിക്കരുടേതാണ് തിരക്കഥയും സംഭാഷണവും. അഖില്‍ ജി ബാബു, അനു കുരിശിങ്കല്‍ എന്നിവരുടെ വരികള്‍ക്ക് അനു കുരിശിങ്കല്‍ സംഗീതം നല്‍കി.

തയ്യാറാക്കിയത്:
കപിൽ ശങ്കർ