📱വാർത്തകൾ ഒറ്റനോട്ടത്തിൽ📱 – 2024 | സെപ്റ്റംബർ 16 | തിങ്കൾ ✍ കപിൽ ശങ്കർ

🔹പ്രവാചകന്‍ മുഹമ്മദ് നബിയുടെ ജന്മദിനം ആഘോഷിച്ച് മുസ്ലിം സഹോദരങ്ങള്‍ . വിപുലമായ പരിപാടികളാണ് മദ്‌റസകളിലും പള്ളികളിലും ഒരുക്കിയിരിക്കുന്നത്. മദ്‌റസകള്‍ കേന്ദ്രീകരിച്ച് കുട്ടികളുടെ റാലികള്‍ നടന്നു. വൈകുന്നേരം കുട്ടികളുടെ കലാപരിപാടികളും അരങ്ങേറും. ഇതിനോടൊപ്പം തന്നെ മൗലിദ് പാരായണവും അന്നദാനവും ഉണ്ടാകും. പ്രവാചകന്‍ പകര്‍ന്ന വെളിച്ചം സ്വന്തം ജീവിതത്തില്‍ പകര്‍ത്താന്‍ വിശ്വാസികളെ ഓര്‍മിപ്പിക്കുന്ന ദിനം കൂടിയാണ് നബി ദിനം.

🔹തിരുവോണ ദിവസം എച്ച്ഐവി, ക്യാൻസർ ബാധിതർക്കും തെരുവോരങ്ങളിൽ കഴിയുന്ന രോഗികൾക്കും ഉച്ചഭക്ഷണവും ആവശ്യവസ്തുക്കളും വിതരണം ചെയ്ത് മാതൃക കാട്ടി കെയർ ഫോർ മുംബൈ. എച്ച്ഐവി ബാധിച്ചവരടക്കമുള്ള രോഗികളും വാർധക്യം ബാധിച്ചവരുമാണ് നവി മുംബൈ തലോജയിലെ ജ്യോതിസ് കെയർ സെൻ്ററിലെ അന്തേവാസികൾ. അവർക്ക് സ്നേഹത്തിൻ്റെയും കരുതലിൻ്റെയും ഓണസദ്യയേകിയാണ് തിരുവോണ ദിവസത്തെ കെയർ ഫോർ മുംബൈ അടയാളപ്പെടുത്തിയത്.
ടാറ്റ മെമ്മോറിയൽ കാൻസർ സെൻ്ററിന് പുറത്തുള്ള തെരുവോരങ്ങളിൽ കഴിയുന്ന ക്യാൻസർ രോഗികൾക്കും കുടുംബാംഗങ്ങൾക്കുമാണ് സംഘടന ഭക്ഷണവും മറ്റ് അവശ്യവസ്തുക്കളും വിതരണം ചെയ്തത്. കൂടാതെ മുംബൈയുടെ വിവിധ ഭാഗങ്ങളിൽ സാമ്പത്തികമായി പിന്നോക്കം നിൽക്കുന്നവർക്ക് ഓണക്കിറ്റുകളും സംഘടന വിതരണം ചെയ്തു. വയനാട് പുനരധിവാസ പദ്ധതിയുടെ ഭാഗമായി കേരള സർക്കാരുമായി കൈകോർത്ത് 5 വീടുകളും സംഘടന നിർമ്മിച്ച് നൽകുമെന്ന് സെക്രട്ടറി പ്രിയ വർഗീസ് പറഞ്ഞു. കെയർ ഫോർ മുംബൈ പ്രതിനിധികളായ മെറിഡിയൻ വിജയൻ, മുഹമ്മദ് അലി, സതീഷ് കുമാർ തുടങ്ങിവരും പരിപാടിയുടെ ഭാഗമായി.

🔹ഓണക്കാലത്തെ മദ്യവില്‍പനയില്‍ കുറവെന്ന് റിപ്പോര്‍ട്ട്. പത്തു ദിവസത്തെ വില്‍പനയില്‍ കഴിഞ്ഞ തവണത്തേതിനേക്കാള്‍ 14 കോടി രൂപയുടെ കുറവാണ് ഇക്കൊല്ലമുണ്ടായത്. ഇത്തവണ 701 കോടി രൂപയുടേതാണ് മദ്യവില്‍പന. കഴിഞ്ഞ തവണയിത് 715 കോടി രൂപയുടേതായിരുന്നു വില്‍പന. ബാറുകളുടെ എണ്ണം 812 ആയി ഉയര്‍ന്നിട്ടും ഇത്തവണ മദ്യവില്‍പന കുറഞ്ഞു. എന്നാല്‍ ഉത്രാടം ദിനത്തില്‍ മാത്രം മദ്യവില്‍പന കൂടി. കഴിഞ്ഞ തവണത്തേതിനേക്കാള്‍ 4 കോടി രൂപയുടെ വര്‍ധന രേഖപ്പെടുത്തിയെന്നും റിപ്പോര്‍ട്ടിലുണ്ട്.

🔹ഓണക്കാലത്ത് പാല്‍, തൈര്, മറ്റ് പാലുല്‍പ്പന്നങ്ങള്‍ എന്നിവയുടെ വില്‍പ്പനയില്‍ സര്‍വകാല റെക്കോര്‍ഡുമായി മില്‍മ. തിരുവോണത്തിന് മുമ്പുള്ള ആറ് ദിവസളിലായി സര്‍ക്കാര്‍ ഉടമസ്ഥതയിലുള്ള സഹകരണസംഘം വഴി 1,33,47,013 ലിറ്റര്‍ പാലും 14,95,332 കിലോ തൈരുമാണ് വിറ്റഴിച്ചത്.

🔹പ്രോഗ്രസീവ് ഫിലിം മേക്കേഴ്സ് എന്ന പേരില്‍ മലയാള സിനിമയില്‍ പുതിയ സംഘടന വരുന്നു. സംവിധായകരായ ആഷിക്ക് അബു, അഞ്ജലി മേനോന്‍, ലിജോ ജോസ് പെല്ലിശ്ശേരി, രാജീവ് രവി, നടി റിമ കല്ലിങ്കല്‍ തുടങ്ങിയവരുടെ നേതൃത്വത്തിലാണ് പുതിയ സംഘടന രൂപീകരിക്കുന്നത്. സംഘടനയെ കുറിച്ചുളള വിവരങ്ങളടങ്ങിയ കത്ത് സിനിമ പ്രവര്‍ത്തകര്‍ക്ക് നല്‍കി തുടങ്ങി. തൊഴിലാളികളുടെ ശാക്തീകരണം ലക്ഷ്യമിട്ടാണ് സംഘടനയെന്നും പുത്തന്‍ സിനിമ സംസ്‌കാരം രൂപീകരിക്കുമെന്നുമാണ് കത്തിലെ വാഗ്ദാനം.

🔹കൊല്ലം: മൈനാഗപ്പള്ളി ആനൂര്‍ക്കാവില്‍ സ്‌കൂട്ടര്‍ യാത്രികരെ കാര്‍ ഇടിച്ചുവീഴ്ത്തി. റോഡില്‍ വീണ സ്ത്രീയുടെ ശരീരത്തിലൂടെ കയറ്റിയിറക്കി കാര്‍ ഓടിച്ചവര്‍ രക്ഷപ്പെട്ടു. പരിക്കേറ്റ് ചികിത്സയിലായിരുന്ന മൈനാഗപ്പള്ളി സ്വദേശിനി കുഞ്ഞുമോള്‍ മരിച്ചു. സ്‌കൂട്ടര്‍ ഓടിച്ച ഫൗസിയ്ക്ക് പരിക്കേറ്റു. കാര്‍ പോലീസ് കസ്റ്റഡിയില്‍ എടുത്തു.

🔹വണ്ടാനം: ആലപ്പുഴ മെഡിക്കല്‍ കോളേജില്‍ വനിതാ ഡോക്ടര്‍ക്കുനേരെ രോഗിയുടെ കയ്യേറ്റം. ചികിത്സയ്‌ക്കെത്തിയ തകഴി സ്വദേശി ഷൈജു ഡോക്ടറെ മര്‍ദിച്ചു.ശസ്ത്രക്രിയ അത്യാഹിതവിഭാഗം ഹൗസ് സര്‍ജന്‍ ഡോ. അഞ്ജലിക്ക് മര്‍ദനത്തില്‍ പരിക്കേറ്റു. നെറ്റിയില്‍ തുന്നലിടാന്‍ ശ്രമിക്കുന്നതിനിടെയായിരുന്നു ആക്രമണം. രോഗി മദ്യലഹരിയിലായിരുന്നുവെന്നും ഇയാള്‍ തന്റെ കൈ പിടിച്ചുതിരിച്ചുവെന്നും ഡോക്ടര്‍ പറഞ്ഞു.
നെറ്റിയില്‍ മുറിവുമായാണ് ഷൈജു ആശുപത്രിയില്‍ ചികിത്സതേടിയത്. ആശുപത്രിയില്‍ പരിഭ്രാന്തി സൃഷ്ടിച്ച ഷൈജുവിനെ സുരക്ഷാജീവനക്കാര്‍ പിടിച്ചുമാറ്റി. ബഹളത്തിനിടെ ഇയാള്‍ കടന്നുകളഞ്ഞുവെന്നാണ് വിവരം. പോലീസ് തിരച്ചില്‍ ആരംഭിച്ചു.

🔹ലഖ്‌നൗ: യുവാവിനെ കൊലപ്പെടുത്തി മൃതദേഹം വെട്ടിനുറുക്കിയ സംഭവത്തില്‍ സുഹൃത്ത് അറസ്റ്റില്‍. ഉത്തര്‍പ്രദേശിലെ ബരേയ്‌ലി മീര്‍ഗഞ്ച് സ്വദേശി ശിവംകുമാറിനെ(22)യാണ് സുഹൃത്തായ 22-കാരന്‍ കൊലപ്പെടുത്തിയത്. കസ്റ്റഡിയിലെടുക്കാനുള്ള ശ്രമത്തിനിടെ പ്രതി പോലീസിന് നേരേ വെടിയുതിര്‍ത്തിരുന്നു. തുടര്‍ന്ന് ഏറ്റുമുട്ടലിനൊടുവില്‍ വെടിവെച്ച് വീഴ്ത്തിയശേഷമാണ് ഇയാളെ പോലീസ് പിടികൂടിയത്.
കഴിഞ്ഞ ബുധനാഴ്ചയാണ് ക്ഷീരകര്‍ഷകനായ ശിവംകുമാറിനെ കാണാതായത്. പിറ്റേദിവസം റെയില്‍പാളത്തിനരികിലെ തോട്ടത്തില്‍ യുവാവിന്റെ മൃതദേഹം വെട്ടിനുറുക്കിയനിലയില്‍ കണ്ടെത്തി. തുടര്‍ന്ന് സിസിടിവി ദൃശ്യങ്ങളും ശിവംകുമാറിന്റെ ഫോണ്‍വിളി വിവരങ്ങളും പരിശോധിച്ചശേഷമാണ് രണ്ടുദിവസത്തിനുള്ളില്‍ പോലീസ് പ്രതിയെ പിടികൂടിയത്.
പെയിന്റിങ് തൊഴിലാളിയായ പ്രതിയും കൊല്ലപ്പെട്ട ശിവംകുമാറും ബാല്യകാല സുഹൃത്തുക്കളാണെന്ന് പോലീസ് പറഞ്ഞു. അഞ്ച് വര്‍ഷം മുന്‍പ് ശിവംകുമാര്‍ നിര്‍ബന്ധിച്ച് പ്രതിയുമായി ലൈംഗികബന്ധത്തിലേര്‍പ്പെട്ടു. അന്ന് ശിവംകുമാറില്‍നിന്ന് ഉപദ്രവം നേരിട്ടതില്‍ പ്രതിക്ക് പകയായി. ഇതിന് പ്രതികാരംചെയ്യണമെന്ന് തീരുമാനിക്കുകയും ശിവംകുമാറിനെ കൊലപ്പെടുത്തുകയുമായിരുന്നു.

🔹ഇന്ദോര്‍: മധ്യപ്രദേശിലെ ഇന്ദോറില്‍ ഗര്‍ഭിണിയായ യുവതിയെ ലൈംഗികമായി പീഡിപ്പിച്ചെന്ന കേസില്‍ സൈനികന്‍ അറസ്റ്റിലായി. അഞ്ച് മാസം ഗര്‍ഭിണിയായ യുവതിയാണ് ഹോട്ടല്‍മുറിയില്‍വെച്ച് പീഡിപ്പിച്ചെന്ന് ആരോപിച്ച് സുഹൃത്തായ സൈനികനെതിരേ മഹിളാ പോലീസ് സ്‌റ്റേഷനില്‍ പരാതി നല്‍കിയത്. തുടര്‍ന്ന് പോലീസ് കേസെടുക്കുകയും സൈനികനെ പിടികൂടുകയുമായിരുന്നു.

🔹ഡല്‍ഹി മുഖ്യന്ത്രി സ്ഥാനം രാജിവയ്ക്കാനുള്ള അരവിന്ദ് കെജ്രിവാളിന്റെ തീരുമാനത്തിന് അംഗീകാരം നല്‍കി പാര്‍ട്ടി. കെജ്രിവാള്‍ നാളെ രാജിവക്കുമെന്ന് എ എ പി അറിയിച്ചു. പാര്‍ട്ടി ആസ്ഥാനത്ത് നടത്തിയ വാര്‍ത്താ സമ്മേളനത്തില്‍ മന്ത്രി സൗരഭ് ഭരദ്വാജാണ് ഇക്കാര്യം അറിയിച്ചത്. സത്യസന്ധത തെളിയിക്കാനാണ് കെജ്രിവാള്‍ രാജിവയ്ക്കുന്നതെന്നും അദ്ദേഹം വിവരിച്ചു. കെജ്രിവാളിന്റെ തീരുമാനത്തെ ദില്ലിയിലെ ജനങ്ങള്‍ പ്രശംസിക്കുകയാണെന്നും ഒരാഴ്ചയ്ക്കുള്ളില്‍ പുതിയ മുഖ്യമന്ത്രി ആരെന്നത് അടക്കമുള്ള എല്ലാ നടപടിക്രമങ്ങളും പൂര്‍ത്തിയാക്കുമെന്നും സൗരഭ് ഭരദ്വാജ് വ്യക്തമാക്കി.

🔹കൊച്ചി: നടുറോഡില്‍ യുവാവിനെ മരിച്ചനിലയില്‍ കണ്ടെത്തി. കൊച്ചി മരോട്ടിച്ചുവടിലാണ് തിരുവോണദിവസം രാവിലെ യുവാവിനെ മരിച്ചനിലയില്‍ കണ്ടത്. പോലീസ് നടത്തിയ അന്വേഷണത്തില്‍ മരിച്ചത് ഇടപ്പള്ളി കൂനംതൈ സ്വദേശി പ്രവീണ്‍ ആണെന്ന് തിരിച്ചറിഞ്ഞിട്ടുണ്ട്.
സംഭവം കൊലപാതകമാണെന്നാണ് സംശയം. യുവാവിന്റെ ശരീരത്തില്‍ മുറിവുകളുണ്ട്. വിശദമായ പരിശോധനയ്ക്കായി ഫൊറന്‍സിക് സംഘം ഉള്‍പ്പെടെ ഉടന്‍ സ്ഥലത്തെത്തു. മരണത്തില്‍ ദുരൂഹതയുണ്ടെന്നും സംഭവവുമായി ബന്ധപ്പെട്ട് അന്വേഷണം ഊര്‍ജിതമാക്കിയിട്ടുണ്ടെന്നും കൊച്ചി ഡി.സി.പി. ജുവനപ്പുടി മഹേഷ് പറഞ്ഞു.

🔹കൊല്ലം: വീട്ടില്‍ അതിക്രമിച്ചുകയറി വയോധികയെ പീഡിപ്പിച്ച കേസിലെ പ്രതി മണിക്കൂറുകള്‍ക്കകം പിടിയില്‍. തങ്കശ്ശേരി കുളപ്പറമ്പ് ജോമോന്‍ വില്ലയില്‍ ജോസഫാ(33)ണ് പോലീസിന്റെ പിടിയിലായത്. ശനിയാഴ്ച രാവിലെ അഞ്ചുമണിയോടെയാണ് സംഭവം. തങ്കശ്ശേരിയില്‍ ഒറ്റയ്ക്കു താമസിക്കുന്ന വയോധികയുടെ വീടിന്റെ അടുക്കളവാതില്‍പൊളിച്ച് അകത്തു കയറുകയായിരുന്നു.ഉറങ്ങിക്കിടക്കുകയായിരുന്ന വയോധികയെ പീഡിപ്പിച്ചശേഷം പ്രതി ഓടിരക്ഷപ്പെട്ടു. വയോധികയുടെ പരാതിയുടെ അടിസ്ഥാനത്തില്‍ പോലീസ് ഉടന്‍ കേസെടുത്തു. തുടര്‍ന്നുള്ള അന്വേഷണത്തിനിടെ കാവനാടുഭാഗത്തുനിന്നാണ് ജോസഫിനെ പിടികൂടിയത്. ശക്തികുളങ്ങര ഹാര്‍ബറില്‍ മീന്‍ പിടിക്കുന്നവരുടെ സഹായിയായി ജോലിചെയ്തുവരുന്നയാളാണ് ജോസഫ്.
കൊല്ലം വെസ്റ്റ് പോലീസ് ഇന്‍സ്‌പെക്ടര്‍ ആര്‍.ഫയാസിന്റെ നേതൃത്വത്തില്‍ എസ്.ഐ. ജോസ് പ്രകാശ്, എ.എസ്.ഐ. ബീന, എസ്.സി.പി.ഒ.മാരായ സുമേഷ്, സുജിത്ത്, സി.പി.ഒ.മാരായ സലീം, സുരേഷ്, ഷെമീര്‍ എന്നിവരടങ്ങിയ സംഘമാണ് പ്രതിയെ പിടികൂടിയത്.

🔹കൊച്ചി: ചോറ്റാനിക്കരയില്‍ നാലു വയസ്സുകാരിയെ കൊലപ്പെടുത്തിയ കേസില്‍ അമ്മയുടെ കാമുകനായിരുന്ന ഒന്നാം പ്രതിയുടെ വധശിക്ഷ ഹൈക്കോടതി റദ്ദാക്കി. കൊലപാതക്കുറ്റം തെളിയിക്കാനായില്ലെന്ന് വിലയിരുത്തിയാണിത്. എറണാകുളം മീമ്പാറ കൊന്നംപറമ്പില്‍ രഞ്ജിത്തിന്റെ വധശിക്ഷയാണ് ജസ്റ്റിസ് എ.കെ. ജയശങ്കരന്‍ നമ്പ്യാരും ജസ്റ്റിസ് വി.എം. ശ്യാംകുമാറും അടങ്ങിയ ഡിവിഷന്‍ ബെഞ്ച് റദ്ദാക്കിയത്.

🔹ഗാസിയാബാദ് (ഉത്തര്‍പ്രദേശ്): ജ്യൂസില്‍ മൂത്രം കലര്‍ത്തി വില്‍പന നടത്തിയെന്ന പരാതിയില്‍ ജ്യൂസ് കച്ചവടക്കാരനെ പോലീസ് അറസ്റ്റ് ചെയ്തു. ഗാസിയാബാദിലെ ഇന്ദ്രാപുരി മേഖലയില്‍ ‘ഖുഷി ജ്യൂസ് കോര്‍ണര്‍’ എന്ന സ്ഥാപനം നടത്തുന്ന ആമിര്‍ ഖാനാണ് അറസ്റ്റിലായത്. ഇയാള്‍ക്കൊപ്പം കച്ചവടത്തില്‍ പങ്കാളിയായ 15-കാരനെയും പോലീസ് കസ്റ്റഡിയിലെടുത്തിട്ടുണ്ട്.

🔹തിരുവനന്തപുരം: മംഗലപുരം ശാസ്തവട്ടത്ത് മൂന്നുപേര്‍ സഞ്ചരിച്ച ബൈക്ക് ഓണാഘോഷപരിപാടിയിലേക്ക് ഇടിച്ചുകയറി ഒരു മരണം. പരിപാടി കണ്ടുകൊണ്ടിരുന്ന ശാസ്തവട്ടം സ്വദേശി സിജു (43) ആണ് മരിച്ചത്.വൈകീട്ട് അഞ്ചരയോടെയായിരുന്നു സംഭവം. ശാസ്തവട്ടത്തെ ക്ലബ്ബിന്റെ ആഭിമുഖ്യത്തില്‍നടന്ന ഓണാഘോഷപരിപാടിയിലേക്ക് മൂന്നുപേര്‍ സഞ്ചരിച്ച ബൈക്ക് പാഞ്ഞുകയറുകയായിരുന്നു. പരിപാടി കാണാന്‍ വലിയ ആള്‍ക്കൂട്ടമുണ്ടായിരുന്നു. ഇതിലേക്കാണ് ബൈക്ക് ഇടിച്ചുകയറിയത്.
ഇടിയുടെ ആഘാതത്തില്‍ സിജു ദൂരേക്ക് തെറിച്ചുവീണു. തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചുവെങ്കിലും ആറരയോടെ മരിച്ചു. ബൈക്ക് ഓടിച്ചിരുന്ന പെരുങ്കൂഴി സ്വദേശി റോഷന്‍ രാജിനും ഗുരുതുര പരിക്കേറ്റു. കൂടെയുണ്ടായിരുന്ന രണ്ടുപേര്‍ക്കും പരിക്കുണ്ട്.

🔹ബെംഗളൂരു: വീട്ടമ്മയെ കൊലപ്പെടുത്തിയ കേസില്‍ മകളും മകളുടെ കാമുകനും അറസ്റ്റിലായി. ബെംഗളൂരു ബൊമ്മനഹള്ളി സ്വദേശി ജയലക്ഷ്മിയെ കൊലപ്പെടുത്തിയ കേസിലാണ് മകള്‍ പവിത്ര(29), കാമുകനായ ലൗവ്‌ലിഷ്(20) എന്നിവരെ പോലീസ് അറസ്റ്റ് ചെയ്തത്. ഇരുവരും കുറ്റം സമ്മതിച്ചതായും പ്രണയബന്ധത്തെ ജയലക്ഷ്മി എതിര്‍ത്തതാണ് കൊലപാതകത്തിന് കാരണമായതെന്നും പോലീസ് പറഞ്ഞു.
കഴിഞ്ഞ ബുധനാഴ്ചയാണ് ജയലക്ഷ്മിയെ വീട്ടില്‍ മരിച്ചനിലയില്‍ കണ്ടത്. അമ്മ കുളിമുറിയില്‍ വീണെന്നും തുടര്‍ന്ന് ബോധരഹിതയായെന്നുമാണ് മകള്‍ പറഞ്ഞിരുന്നത്. കുളിമുറിയില്‍ വീണ അമ്മയെ പിന്നീട് കട്ടിലില്‍ കൊണ്ടുവന്ന് കിടത്തിയെന്നും എന്നാല്‍, ഉടന്‍ മരണം സംഭവിച്ചെന്നുമായിരുന്നു ഇവരുടെ മൊഴി. തുടര്‍ന്ന് സംഭവത്തില്‍ അസ്വാഭാവിക മരണത്തിന് പോലീസ് കേസെടുത്തു. മൃതദേഹം പോസ്റ്റ്‌മോര്‍ട്ടത്തിന് ശേഷം ബന്ധുക്കള്‍ക്ക് വിട്ടുകൊടുക്കുകയുംചെയ്തു. എന്നാല്‍, വെള്ളിയാഴ്ച പോസ്റ്റ്‌മോര്‍ട്ടം റിപ്പോര്‍ട്ട് പുറത്തുവന്നതോടെയാണ് സംഭവത്തില്‍ വഴിത്തിരിവുണ്ടായത്.
ജയലക്ഷ്മി ശ്വാസംമുട്ടിയാണ് മരിച്ചതെന്നാണ് പോസ്റ്റ്‌മോര്‍ട്ടം റിപ്പോര്‍ട്ടിലുണ്ടായിരുന്നത്. ഇതോടെ പോലീസിന് സംശയം ബലപ്പെട്ടു. തുടര്‍ന്ന് മകളായ പവിത്രയെ കസ്റ്റഡിയിലെടുത്ത് വിശദമായി ചോദ്യംചെയ്തതോടെ കൊലപാതകത്തിന്റെ ചുരുളഴിയുകയായിരുന്നു.

🔹തിരുവനന്തപുരം: കേരള ക്രിക്കറ്റ് ലീഗില്‍ ആലപ്പി റിപ്പിള്‍സിനെതിരേ കൊച്ചി ബ്ലൂ ടൈഗേഴ്‌സിന് 25 റണ്‍സ് ജയം. കൊച്ചി ഉയര്‍ത്തിയ 194 റണ്‍സ് വിജയലക്ഷ്യത്തിലേക്ക് ബാറ്റെടുത്ത റിപ്പിള്‍സിന് 20 ഓവറില്‍ ഏഴു വിക്കറ്റ് നഷ്ടത്തില്‍ 168 റണ്‍സെടുക്കാനേ സാധിച്ചുള്ളൂ. 42 പന്തില്‍ നിന്ന് നാലു വീതം സിക്‌സും ഫോറുമടക്കം 65 റണ്‍സെടുത്ത ക്യാപ്റ്റന്‍ മുഹമ്മദ് അസ്ഹറുദ്ദീനാണ് റിപ്പിള്‍സിന്റെ ടോപ് സ്‌കോറര്‍. അസ്ഹറിനൊപ്പം സഹ ഓപ്പണറായി ഇറങ്ങിയ കൃഷ്ണ പ്രസാദ് 33 പന്തില്‍ നിന്ന് 39 റണ്‍സെടുത്തു. ഓപ്പണിങ് വിക്കറ്റില്‍ 98 റണ്‍സ് ചേര്‍ത്ത ഈ സഖ്യം പിരിഞ്ഞതോടെ റിപ്പിള്‍സ് തകര്‍ന്നു.അക്ഷയ് ശിവ് (9), ഇംപാക്റ്റ് പ്ലെയര്‍ അതുല്‍ (6), അക്ഷയ് ടി.കെ (15), അക്ഷയ് ചന്ദ്രന്‍ (0) എന്നിവരെല്ലാം നിരാശപ്പെടുത്തി.
നേരത്തേ ഓപ്പണര്‍ ആനന്ദ് കൃഷ്ണന്റെ സെഞ്ചുറിയാണ് ബ്ലൂ ടൈഗേഴ്‌സിനെ മികച്ച സ്‌കോറിലെത്തിച്ചത്. 20 ഓവറില്‍ മൂന്നു വിക്കറ്റ് നഷ്ടത്തില്‍ 193 റണ്‍സാണ് കൊച്ചി അടിച്ചെടുത്തത്. 66 പന്തില്‍ നിന്ന് പുറത്താകാതെ 138 റണ്‍സാണ് അനന്ദ് അടിച്ചെടുത്തത്. 11 സിക്‌സും ഒമ്പത് ഫോറുമടങ്ങുന്നതായിരുന്നു താരത്തിന്റെ ഇന്നിങ്‌സ്.

🔹ആരാധകര്‍ കാത്തിരുന്ന ദളപതി വിജയ്യുടെ അവസാന ചിത്രത്തിന്റെ പ്രഖ്യാപനം എത്തി. ‘ദളപതി 69’ എന്ന് താല്‍ക്കാലികമായി പേര് നല്‍കിയിരിക്കുന്ന ചിത്രം സംവിധാനം ചെയ്യുന്നത് എച്ച് വിനോദാണ്. ചിത്രത്തിന്റെ നിര്‍മാതാക്കളായ കെവിഎന്‍ പ്രൊഡക്ഷന്‍സാണ് പ്രഖ്യാപനം നടത്തിയത്. ദീപശിഖയും പിടിച്ച് നില്‍ക്കുന്ന കയ്യാണ് പോസ്റ്ററിലുള്ളത്. ‘ജനാധിപത്യത്തിന്റെ ദീപ വാഹകന്‍’ എന്ന ടാഗ് ലൈനിലാണ് പോസ്റ്റര്‍. അനിരുദ്ധാണ് ചിത്രത്തിന് സംഗീതം ഒരുക്കുന്നത്. ഈ വര്‍ഷം ഒക്ടോബറില്‍ ചിത്രീകരണം ആരംഭിക്കുന്ന ചിത്രം 2025 ഒക്ടോബറില്‍ തിയറ്ററിലേക്കെത്തും. കെവിഎന്‍ പ്രൊഡക്ഷന്‍സിന്റെ ബാനറില്‍ വെങ്കട്ട് കെ നാരായണ ആണ് ചിത്രം നിര്‍മിക്കുന്നത്. ദളപതി 69ന് ശേഷം സിനിമയില്‍ നിന്ന് ഇടവേളയെടുക്കാനുള്ള തീരുമാനത്തിലാണ് താരം.

തയ്യാറാക്കിയത്:
കപിൽ ശങ്കർ