🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 04 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

സാമിപ്യം നൽകുന്ന സ്വാന്തനം
—————————————————-

ഇളയ മകനേക്കുറിച്ചായിരുന്നു അമ്മയുടെ പരാതി മുഴുവൻ. രാവിലെ എഴുന്നേൽക്കില്ല. സക്കൂളിൽ പോകാനും പഠിക്കാനും താൽപര്യമില്ല. മീൻ വളർത്തും കോഴി വളർത്തും, അല്ലാത്തപ്പോൾ മറ്റു കുട്ടികളുമായി ശണ്ഠകുടലുമായിരുന്നു മുഖ്യ പരിപാടികൾ.
മൂത്തവൻ മിടുക്കൻ. നല്ല കുട്ടി. പറഞ്ഞാൽ കേൾക്കും. ക്ലാസ്സിൽ ഒന്നാമൻ. മുപ്പതു വർഷങ്ങൾ കഴിഞ്ഞു. മൂത്തയാൾ ജില്ലാ കലക്ടറായി, ഏറെ ദൂരെ ജോലി ചെയ്യുന്നു. എല്ലാം ദിവസവും വിളിച്ച് കാര്യങ്ങൾ അന്വേഷിക്കാറുണ്ട്. അമ്മ ഇപ്പോൾ ഡോക്ടറുടെ മുമ്പിൽ, തൻ്റെ ഊഴവും കാത്തിരിക്കുകയാണ് കോഴി വളർത്തൽക്കാരൻ ഇളയ മകനോടൊപ്പം.

കാലമാണു കളയും വിളയും വേർതിരിക്കുന്നത്. ഒരാഴ്ചത്തെയോ, വർഷത്തെയോ, അനുഭവങ്ങളുടെ വെളിച്ചത്തിൽ ഒന്നിനേയും മുദ്രകുത്തി,തരം തിരിക്കരുത്. നെല്ലിൻ്റെ വിളവല്ല, നെല്ലിയുടേതു്. കാത്തിരിക്കേണ്ടി വരും; കരുതലോടെ.
അരിയളക്കുന്ന പാത്രം കൊണ്ട് ആഴമളക്കാൻ തുനിയരുത്.

കാര്യമന്വേഷിക്കുന്നവരല്ല, കാവലാളാകുന്നവരാണ് യഥാർത്ഥ സഹായികൾ. ഉത്തരവാദിത്തങ്ങളിൽ നിന്ന് അകന്നു നിൽക്കുന്നതിനുള്ള നൂറു ന്യായീകരണങ്ങൾ എല്ലാവർക്കുമുണ്ടാകും. എന്നാൽ, കൂടെ നിൽക്കണമെങ്കിൽ എല്ലാ ന്യായീകരണങ്ങളേയും മറികടക്കുന്ന ഒരു കാരണമെങ്കിലുമുണ്ടാകണം. ആ നൂലിഴയിൽ നിന്നു വേണം ആത്മബന്ധത്തിൻ്റെ നേർരേഖ പുറപ്പെടാൻ. സാമിപ്യമാണു സ്വാന്തനം. കൂട്ടിരിക്കാൻ ഒരാളുണ്ടായിരുന്നെങ്കിൽ കുറച്ചു കൂടി ജീവിക്കാമായിരുന്നുവെന്ന വിതുമ്പലുമായി ലോകത്തോടു വിടപറഞ്ഞ ഏറെപ്പേരുണ്ടാകും?

നേട്ടത്തിനുവേണ്ടിയുള്ള നെട്ടോട്ടത്തിനിടയിൽ ആലോചനയും അടുപ്പവും നഷ്ടപ്പെടുത്തിക്കളയരുത് . ലോകം കീഴടക്കി വരുമ്പോഴേക്കും, തങ്ങളെ വളർത്തി വലുതാക്കിയവർ അവിടെ കാണണമെന്നില്ല. പഠിച്ചു പരീക്ഷയെഴുതി, മിടക്കുതെളിയിക്കാൻ ശേഷിയില്ലാത്തവരേയും, മിടുക്കരായി കാണാൻ നാം പഠിക്കണം. അവരാകും, ഒടുവിൽ സാമിപ്യത്തിൻ്റെ സാന്ത്വനം പകർന്നു തരാൻ കൂടെയുണ്ടാകുക.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര