🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 29 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

ചെറുതാകുന്നതിലെ വലുപ്പം
———————————————

കടലിലെ ചെറിയ തിര, വലിയ തിരയോടു പരാതി പറഞ്ഞു: ”നീ എന്തു വലിയ തിരയാണ്. നിന്നെ കാണുമ്പോൾ തന്നെ ആളുകൾ പേടിച്ചു പുറകോട്ടു മാറും. ഞാൻ ചെറുതായതു കൊണ്ട് അവർ എന്നെ തിരിച്ചോടിക്കും”. വലിയ തിര പറഞ്ഞു: “തിരകൾ ചെറുതെന്നോ വലുതെന്നോ ഇല്ല. എല്ലാം ജലകണികകൾ തന്നെ. കുറച്ചു നേരത്തേക്കുള്ള നമ്മുടെ രൂപം മാത്രമാണത്”.

ഒരാൾക്കും ഒന്നും സ്ഥിരമായില്ല: സ്ഥാനമോ, മാനമോ, ജോലിയോ, ഇഷ്ടങ്ങളോ, ജീവിക്കുന്ന ഇടങ്ങൾ പോലുമോ. എന്നാൽ, ഓരോരുത്തരുടെയും ഇടപെടലുകളും, പ്രതികരണങ്ങളും കണ്ടാൽ, ലോകത്തിൻ്റെ മുഴുവൻ അവകാശികൾ അവർ ആണെന്നു തോന്നിപ്പോകും. സ്ഥാനത്തിൻ്റെയും സമ്പത്തിൻ്റെയും അന്തരത്തിൽ അഭിരമിച്ചു ജീവിക്കുന്ന എല്ലാവരുടേയും കുഴിമാടങ്ങളുടെ വലുപ്പം ഒന്നു തന്നെയായിരിക്കും. എന്നാൽ, സ്വന്തം വലുപ്പം അളന്നെടുത്തു പ്രഖ്യാപിക്കാതെ ജീവിക്കുന്ന എല്ലാവരുടെയും സ്ഥാനം, തലമുറകളുടെ ഹൃദയത്തിലും.

അധികാരിയുടെയും അടിമയുടെയും ജീവിത വേഷങ്ങളെല്ലാം അൽപായുസ്സ്
മാത്രം! സ്വന്തം സാമ്രാജ്യത്തിലെ ചക്രവർത്തിമാരെല്ലാം മറ്റുള്ളവരുടെ അധികാര മണ്ഡലത്തിൽ നിസ്വരായിരിക്കും. രോഗാതുരനായ രാജാവിനു വൈദ്യനോടെന്തെങ്കിലും കല്പിക്കാനാകുമോ? മറിച്ച് , അയാൾ പറയുന്നത് അനുസരിച്ചെങ്കിൽ മത്രമല്ലേ പറ്റൂ. ജീവിതം നമുക്കു കുറച്ചു കൂടി ലളിതമാക്കാനായിരുന്നുവെങ്കിൽ.

പല ചെറുതും വലുതാണെന്നു തുണിയിൽ പുരളുന്ന കറ നമുക്കു പറഞ്ഞു തരും. വലുപ്പമല്ല, വലുതാകാനുള്ള ശേഷിയാണു വലുതെന്ന് വിത്തുകളും. വലുതായത്. ചെറുതായതു കൊണ്ടാണെന്നു കാട്ടിത്തന്നവരാണ്. യഥാർത്ഥ മഹാത്മാക്കൾ ഒരാളുടെ വലുപ്പം തീരുമാനിക്കുന്നത്, അയാൾ ഭീതിപ്പെടുത്തി ഒപ്പം നിർത്തുന്ന ആളുകളുടെ എണ്ണമല്ല, മറിച്ച്, അയാൾ ഒപ്പം ചേർത്തുനിർത്തിയ അശരണരുടെ സംഖ്യയാണ്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര