🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 17 | ശനി ✍ പ്രൊഫസ്സർ എ.വി. ഇട്ടി മാവേലിക്കര

വാദത്തിനായുള്ള വാദങ്ങൾ
———————————————–

മൂന്നു സുഹൃത്തുക്കൾ കൂടി ഒരു സഞ്ചാരത്തിനു പുറപ്പെട്ടു. കൈയ്യിലുണ്ടായിരുന്ന പണത്തിന് അവർ ഒരു കഷണം ഹൽവ വാങ്ങി. എല്ലാവർക്കും കൂടി പങ്കുവയ്ക്കാനുള്ള വലുപ്പം ഹൽവായ്ക്ക് ഇല്ലാഞ്ഞതിനാൽ, ആരെങ്കിലും ഒരാൾ അതു കഴിക്കാൻ തീരുമാനിച്ചു. മൂന്നു പേരും ഹൽവായ്ക്കുള്ള അവകാശവാദം ഉന്നയിച്ചു. ഒരാൾ തൻ്റെ പാണ്ഡിത്യവും, മറ്റേയാൾ തൻ്റെ ജീവിത വിശുദ്ധിയും എടുത്തു പറഞ്ഞു. മൂന്നാമൻ പറഞ്ഞു: എനിക്കു നല്ല വിശപ്പുണ്ട് , അതിനാൽ ഞാൻ കഴിച്ചോളാം.

അവസാനം അവർ ഒരു തീരുമാനത്തിലെത്തി. രാത്രിയിൽ ഏറ്റവും നല്ല സ്വപ്നം കാണുന്ന ആൾക്കു രാവിലെ ഹൽവ കഴിക്കാം. പിറ്റേന്നു രാവിലെ രണ്ടു സുഹൃത്തുക്കളും, തങ്ങളുടെ സ്വപ്ത്തിൽ ദൈവം വന്ന കാര്യം പറഞ്ഞു. മൂന്നാമൻ പറഞ്ഞു: “എൻ്റെ സ്വപ്നത്തിലും ദൈവം വന്നു. വിശന്നിരിക്കുന്ന എന്നോടു് ഹൽവ കഴിക്കാൻ നിർദ്ദേശിച്ചു. ഞാനതു കഴിച്ചു”.

സംവാദ വിഷയങ്ങൾക്കു സംവാദ യോഗ്യതയുണ്ടായിരിക്കണം. കഥയില്ലാത്ത കാര്യങ്ങൾ സംഭാഷണ വിഷയമാകുമ്പോൾ, അവ വാദപ്രതിവാദങ്ങളും, തീരുമാനമില്ലാത്ത വിവാദങ്ങളുമായി മാറും. ഒരാൾ എന്തിനേക്കുറിച്ചാണു ചിന്തിക്കുകയും പറയുകയും ചെയ്യുന്നത് എന്നത് അയാളുടെ ഉൽകൃഷ്ടത വെളിപ്പെടുത്തും. മറ്റുള്ള ആളുകളെക്കുറിച്ചുള്ള സംഭാഷണങ്ങൾ, അപവാദങ്ങളായി മാറരുത്; സംവാദങ്ങൾ വിവാദങ്ങളായും.
ചർച്ചകൾ തീരുമാനങ്ങളിലെത്തുന്നില്ലെങ്കിൽ, അവ അവസാനിപ്പിക്കുകയാണ് ഉത്തമം.

സംവാദങ്ങൾക്കും, സംഭാഷണങ്ങൾക്കും വേണ്ടി ചെലവഴിക്കുന്ന സമയത്തിൻ്റെ ഒരംശമെങ്കിലും, സൽപ്രവൃത്തികൾക്കു വേണ്ടി ഉപയോഗിച്ചിരുന്നുവെങ്കിൽ, ലോകത്തിൽ ഏറെ നന്മകൾ രൂപപ്പെടുമായിരുന്നു.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര