📱വാർത്തകൾ ഒറ്റനോട്ടത്തിൽ📱 – 2024 | ജൂൺ 24 | തിങ്കൾ ✍ കപിൽ ശങ്കർ

🔹പിണറായി മന്ത്രിസഭയില്‍ പുതിയ മന്ത്രിയായി ഒ.ആര്‍ കേളു സത്യപ്രതിജ്ഞ ചെയ്തു. ഗവര്‍ണര്‍ ആരിഫ് മുഹമ്മദ് ഖാന്‍ കേളുവിന് സത്യവാചകം ചൊല്ലിക്കൊടുത്തു. മാനന്തവാടി എംഎല്‍യായ കേളുവിന് പട്ടിക ജാതി പട്ടിക വര്‍ഗ വകുപ്പാണ് ലഭിക്കുക. മുഖ്യമന്ത്രി പിണറായി വിജയനും പ്രതിപക്ഷ നേതാവ് വിഡി സതീശനും പ്രതിപക്ഷ ഉപനേതാവ് പികെ കുഞ്ഞാലിക്കുട്ടിയും അടക്കമുള്ളവര്‍ സത്യപ്രതിജ്ഞാ ചടങ്ങില്‍ പങ്കെടുത്തു. മന്ത്രിയായി സത്യപ്രതിജ്ഞ ചെയ്ത ഒ.ആര്‍ കേളു സെക്രട്ടേറിയേറ്റിലെത്തി ചുമതലയേറ്റു. വയനാട്ടിലെ വന്യജീവി ആക്രമണങ്ങള്‍ സംബന്ധിച്ചുള്ള വിഷയങ്ങള്‍ ഗൗരമായി കാണുമെന്നും പ്രത്യേക ഉദ്യോഗസ്ഥനെ നിയമിച്ച് അതിനായി കമ്മിറ്റി രൂപീകരിച്ച് പ്രവര്‍ത്തിക്കാനുള്ള നടപടികള്‍ നടക്കുകയാണെന്നും ചുമതലയേറ്റ ശേഷം മന്ത്രി പറഞ്ഞു. വയനാട്ടുകാരുടെ പ്രതീക്ഷക്ക് ഒത്തുയര്‍ന്ന് പ്രവര്‍ത്തിക്കാനാകുമെന്നാണ് പ്രതീക്ഷയെന്നും മന്ത്രി പ്രതികരിച്ചു.

🔹കണ്ണൂരില്‍ വീണ്ടും ബോംബ് കണ്ടെടുത്തു. ന്യൂ മാഹി പെരിങ്ങാടിയില്‍ തലശ്ശേരി-മാഹി ബൈപ്പാസിന്റെ സര്‍വീസ് റോഡരികിലാണ് സ്റ്റീല്‍ ബോംബ് കണ്ടെത്തിയത്. കഴിഞ്ഞ ദിവസം കൂത്തുപറമ്പിലും സ്റ്റീല്‍ ബോംബുകള്‍ കണ്ടെടുത്തിരുന്നു. അതിനിടെ പാനൂര്‍ ചെണ്ടയാട് റോഡില്‍ സ്ഫോടകവസ്തു പൊട്ടിത്തെറിച്ചത് പരിഭ്രാന്തി പരത്തി. പൊട്ടിയത് ഏറുപടക്കമെന്നാണ് പൊലീസ് പറയുന്നത്.

🔹വിദേശത്ത് ജോലി വാഗ്ദാനം ചെയ്ത് യുവാവിനെ കടത്തിക്കൊണ്ട് പോയ കേസില്‍ മുഖ്യപ്രതി അറസ്റ്റില്‍. കൊല്ലം വെള്ളിമണ്‍ സ്വദേശി പ്രവീണാണ് പിടിയിലായത്. കിളിക്കൊല്ലൂര്‍ സ്വദേശി അമല്‍ അശോകിന്റെ പരാതിയിലാണ് കൊല്ലം ഈസ്റ്റ് പൊലീസ് പ്രതിയെ പിടികൂടിയത്. വിയറ്റ്നാമില്‍ പരസ്യ കമ്പനിയില്‍ ജോലി വാഗ്ദാനം ചെയ്ത് 22,0000 രൂപയാണ് യുവാവില്‍ നിന്ന് പ്രതി കൈക്കലാക്കിയത്.

🔹സംസ്ഥാനത്ത് പ്ലസ് വൺ ക്ലാസുകൾ ഇന്ന് ആരംഭിക്കും. തിരുവനന്തപുരം കോട്ടൺഹിൽ സ്കൂളിൽ മന്ത്രി വി ശിവൻകുട്ടിയുടെ നേതൃത്വത്തിൽ വിദ്യാർത്ഥികളെ സ്വീകരിക്കും. സംസ്ഥാനത്തെ 2076 സർക്കാർ, എയിഡഡ്, അൺ എയിഡഡ് ഹയർസെക്കൻ്ററി സ്കൂളുകളിലാണ് ഇന്ന് പ്ലസ് വൺ ക്ലാസുകൾ ആരംഭിക്കുന്നത്.
ഇത്തവണ നേരത്തെയാണ് ക്ലാസുകൾ തുടങ്ങുന്നത്. കഴിഞ്ഞ വർഷം ജുലെെ 5 ന് ആയിരുന്നു ക്ലാസുകൾ ആരംഭിച്ചത്. ഏകദേശം മൂന്നേകാൽ ലക്ഷം വിദ്യാർത്ഥികൾ സ്ഥിരപ്രവേശനം നേടിയിട്ടുണ്ട്. ഇനിയും അഡ്മിഷൻ ലഭിക്കാനുള്ളവർക്ക് സപ്ലിമെൻ്ററി അലോട്മെൻ്റ് സമയത്ത് അഡ്മിഷൻ ലഭിക്കുമെന്നും അത് വളരെവേഗം പൂർത്തിയാക്കുമെന്നും വിദ്യാഭ്യാസ വകുപ്പ് അറിയിച്ചു.

🔹മര്‍ച്ചന്റ് നേവിയില്‍ ജോലി വാഗ്ദാനം നല്‍കി പണം തട്ടിയ കേസില്‍ മുഖ്യപ്രതി അറസ്റ്റില്‍ . പട്ടണക്കാട് പാറയില്‍ വാര്‍ഡില്‍ പുതുപ്പറമ്പത്ത് വെളിവീട്ടില്‍ ജിത്തു സേവിയറെയാണ് പുന്നപ്ര പൊലീസ് പിടികൂടിയത്. മര്‍ച്ചന്റ് നേവിയില്‍ മാസം 50,000 രൂപ ശമ്പളം ലഭിക്കുന്ന സ്ഥിര ജോലി നല്‍കാമെന്ന് വിശ്വസിപ്പിച്ച് പുന്നപ്ര സ്വദേശിയായ സെഫിനില്‍നിന്നും 8 ലക്ഷം രൂപ തട്ടിയ കേസിലാണ് ഇയാള്‍ പിടിയിലായത്.

🔹വയനാട് കേണിച്ചിറയിൽ കൂട്ടിലായ കടുവക്ക്‌ ആരോഗ്യ പ്രശ്നങ്ങളുണ്ടെന്ന് വനം വകുപ്പ്‌. ഇന്നലെ രാത്രി പിടിയിലായ കടുവയെ മുത്തങ്ങയിലേക്ക്‌ മാറ്റി.നാല് ദിവസമായി വളർത്തുമൃഗങ്ങളെ കൊന്ന് പ്രദേശത്തെ ആശങ്കയിലാക്കിയ കടുവ ഇന്നലെ രാത്രി പതിനൊന്ന് മണിയോടെയാണ്‌ കൂട്ടിലായിരുന്നു. എടക്കാട്ട് കിഴക്കയിൽ കുര്യാക്കോസിൻ്റെ വീടിന് സമീപം സ്ഥാപിച്ച കൂട്ടിൽ കടുവ അകപ്പെട്ടുകയായിരുന്നു. ഇന്നലെ തന്നെ കടുവയെ മയക്കുവെടി വച്ച് പിടികൂടാനുള്ള ശ്രമങ്ങൾ തുടങ്ങിയിരുന്നു.കൂട്ടിലാവുന്നതിന്‌ മുൻപ്‌‌ ‌ രണ്ട്‌ പശുക്കൾ കൊല്ലപ്പെട്ട മാളിയേക്കൽ ബെന്നിയുടെ വീടിന്റെ തൊഴുത്തിൽ വീണ്ടും കടുവയെത്തി. ഇതിന്റെ ദൃശ്യങ്ങൾ വീട്ടുകാർ പകർത്തിയിരുന്നു.ക്ഷീര കർഷകർ ഏറെയുള്ള മേഖലയിൽ ജനങ്ങൾ വലിയ ആശങ്കയിലായിരുന്നു.കടുവയെ പിടികൂടിയതിന്റെ ആശ്വാസത്തിലാണ്‌ നാട്ടുകാർ. കടുവയെ മുത്തങ്ങയിലെ മൃഗ പരിപാലന കേന്ദ്രത്തിലേക്ക്‌‌ മാറ്റിയിട്ടുണ്ട്‌. 10 വയസ്സുള്ള ആൺകടുവയാണിത്‌.വനം വകുപ്പിന്റെ സെൻസസിൽ തോൽപ്പെട്ടി 17 എന്ന് രേഖപ്പെടുത്തിയ കടുവക്ക്‌ ശാരീരിക പ്രശ്നങ്ങളും പ്രായാധിക്യത്തിന്റെ അവശതകളുമുണ്ട്‌‌.വിദഗ്ദ പരിശോധനക്ക്‌ ശേഷമേ
തുടർ തീരുമാനങ്ങൾ വനം വകുപ്പ്‌ സ്വീകരിക്കൂ.

🔹കൊച്ചി മാടവനയിൽ ബൈക്ക് യാത്രികന്റെ മരണത്തിനിടയാക്കിയ അപകടത്തിന് കാരണം കല്ലട ബസിന്റെ അമിതവേഗം. അപകടത്തെ തുടർന്ന് ബസ് ഡ്രൈവർ തെങ്കാശി സ്വദേശി പാൽപാണ്ടിക്കെതിരെ പൊലീസ് മനപൂർവമല്ലാത്ത നരഹത്യയ്ക്ക് കേസെടുത്തു. അപകടകരമാം വിധം വാഹനം ഓടിച്ചതിനും കേസുണ്ട്.ബസ് അമിതവേഗത്തിൽ ഓടിച്ചത് മരണമുണ്ടാകുമെന്ന ഉറപ്പോടെയെന്ന് പൊലീസ് പറഞ്ഞു. അപകടത്തിൽ മരിച്ച വാഗമൺ ഉളുപ്പുണ്ണി സ്വദേശി ജിജോ സെബാസ്റ്റ്യന്റെ പോസ്റ്റ്മോർട്ടം ഇന്ന് നടക്കും. ജിജോ ജോലി ചെയ്തിരുന്ന വസ്ത്രവ്യാപാര സ്ഥാപനത്തിൽ പൊതുദർശനത്തിന് ശേഷം മൃതദേഹം ജന്മനാട്ടിലേക്ക് കൊണ്ടുപോകും. സംസ്കാരം ചൊവ്വാഴ്ച നടക്കും.

🔹ചാവക്കാട് കടപ്പുറത്ത് കടല്‍ക്ഷോഭത്തില്‍ കെട്ടിടം തകര്‍ന്നു വീണു. കടല്‍ ഭിത്തി കെട്ടാത്തതില്‍ പ്രതിഷേധിച്ച് പ്രദേശവാസികള്‍ റോഡ് ഉപരോധിച്ചു. അഞ്ചങ്ങാടി വളവില്‍ ഹസ്സന്റെ ഉടമസ്ഥതയിലുള്ള കെട്ടിടമാണ് തകര്‍ന്നത്. കടല്‍ കരയിലേക്ക് ഇരച്ചു കയറുകയായിരുന്നു.

🔹ഭാരതപ്പുഴയിലെ വെള്ളയാങ്കല്ല് തടയണയില്‍ വീണ്ടും പോത്തിന്റെ ജഡം കണ്ടെത്തി. കഴിഞ്ഞ ദിവസം ഏഴ് പോത്തുകളാണ് ഭാരതപ്പുഴയില്‍ ചത്തുപൊങ്ങിയത്. പട്ടാമ്പി മുതല്‍ തൃത്താല വെള്ളിയാങ്കല്ല് വരെയുള്ള ഭാഗത്താണ് സംഭവം. പാവറട്ടി കുടിവെള്ള സംഭരണിയിലാണ് കന്നുകാലികള്‍ ചത്തുപൊങ്ങിയത്.

🔹നിയന്ത്രണം വിട്ട് പെട്രോൾ ടാങ്കർ റോഡിലേക്ക് മറിഞ്ഞു. തിരുവനന്തപുരം കിളിമാനൂർ തട്ടത്ത് മല ജംഗ്ഷനിലാണ് അപകടം. ഫയർഫോഴ്സ് യൂണിറ്റുകൾ സ്ഥലത്തെത്തി.എറണാകുളത്ത് നിന്നും തിരുവനന്തപുരത്ത് വന്ന ടാങ്കർ ലോറിയാണ് മഴയിൽ നിയന്ത്രണം വിട്ട് മറിഞ്ഞത്.എറണാകുളം സ്വദേശികളായ ഡ്രൈവർ അനുരാജ് ക്ലീനർ ബിനു എന്നിവരെ മെഡിക്കൽ കോളെജിൽ പ്രവേശിപ്പിച്ചു.
മണലയത്ത് പച്ചയിൽ വച്ച് കുഴിയിലേക്ക് മറിയുകയായിരുന്നു. പെട്രോൾ ചെറുതായി ലീക്ക് ആകുന്നുണ്ട്. റോഡിന് സമീപത്തോടെ ഒഴുകുന്ന തോട്ടിൽ ആണ് പെട്രോൾ ഒഴുകുന്നത്.ഗതാഗതത്തിന് തടസമില്ല. വെഞ്ഞാറമൂട് ഫയർഫോഴ്സ് സ്ഥലത്ത് ഉണ്ട്. വലിയ ക്രെയിൻ എത്തിച്ച് ലോറി ഉയര്‍ത്താനാണ് നീക്കം. ഐ. ഒ സി യിൽ വിവരം അറിയിച്ചു, അവർ എത്തിയാൽ പെട്രോൾ മാറ്റാൻ ഉള്ള നടപടി ക്രമങ്ങൾ നടക്കും.

🔹ഹരിപ്പാട് താലൂക്ക് ആശുപത്രി സൂപ്രണ്ടിനെതിരെ ഗുരുതര ആരോപണവുമായി രോഗിയുടെ കുടുംബം. ആശുപത്രി സൂപ്രണ്ട് കൈക്കൂലി വാങ്ങിയെന്നും, തുക കുറഞ്ഞതിനാല്‍ രോഗിയെ നോക്കിയില്ലെന്നുമാണ് ആരോപണം. കാലിന് മൈനര്‍ ശസ്ത്രക്രിയ നടത്താനെത്തിയ ഹരിപ്പാട് സ്വദേശി അനിമോന്റെ കുടുംബത്തിന്റേതാണ് പരാതി.

🔹ഏഴുമാസം ഗര്‍ഭിണിയായ യുവതിയെ ഭര്‍ത്താവ് കൊലപ്പെടുത്തി. പാലക്കാട് കരിമ്പ വെട്ടം പടിഞ്ഞാകരയില്‍ സജിതയാണ് (26) കൊല്ലപ്പെട്ടത്. സംഭവത്തില്‍ ഭര്‍ത്താവ് നിഖിലിനെ (28) സേലത്തുനിന്നും കസ്റ്റഡിയിലെടുത്തു. നിഖില്‍ സജിതയെ കഴുത്ത് ഞെരിച്ച് കൊലപ്പെടുത്തിയെന്നാണ് പൊലീസിന്റെ പ്രാഥമിക നിഗമനം.

🔹വടക്കന്‍ പറവൂരില്‍ സ്‌കൂട്ടര്‍ മറിഞ്ഞ് അമ്മയും മകനും മരിച്ചു. നായരമ്പലം കുടുങ്ങാശ്ശേരി തെക്കേവീട്ടില്‍ ക്ലയിസന്റെ ഭാര്യ ബിന്ദു (44), മകന്‍ ആല്‍വിന്‍ (12) എന്നിവരാണ് മരിച്ചത്. അപകടത്തില്‍ പരിക്കേറ്റ ക്ലയിസന്‍ ചികിത്സയിലാണ്. ഇന്നലെ രാത്രി എട്ടിനായിരുന്നു സംഭവം.

🔹കൊച്ചി മാടവനയില്‍ ദേശീയപാതയില്‍ അന്തര്‍സംസ്ഥാന സ്വകാര്യ ബസ് മറിഞ്ഞ് ഒരാള്‍ മരിച്ചു. അപകടത്തില്‍ 12 പേര്‍ക്ക് പരിക്കേറ്റു. നിയന്ത്രണം വിട്ട ബസ് തെന്നിമറിഞ്ഞ് മുകളിലേക്ക് വീണാണ് ബൈക്ക് യാത്രക്കാരനായ ഇടുക്കി വാഗമണ്‍ സ്വദേശി ജിജോ സെബാസ്റ്റ്യന്‍ മരിച്ചത്. സിഗ്നലില്‍ പെട്ടെന്ന് ബ്രേക്കിട്ടതാണ് ബസ് മറിയാന്‍ കാരണമെന്നാണ് കരുതുന്നത്.

🔹കാസര്‍കോട് സംസ്ഥാനപാതയിലെ കളനാട് ഓവര്‍ബ്രിഡ്ജിന് സമീപം ബൈക്ക് നിയന്ത്രണം വിട്ട് തെങ്ങിലിടിച്ച് മറിഞ്ഞ് യുവാവ് മരിച്ചു. ചളിയങ്കോട് സ്വദേശി സാലിയുടെ മകന്‍ സിദ്ധീഖാണ് മരിച്ചത്. പൊലീസെത്തി യുവാവിനെ കാസര്‍കോട് ജനറല്‍ ആശുപത്രിയിലെത്തിച്ചെങ്കിലും മരിച്ചിരുന്നു.

🔹നീറ്റ് യുജി പരീക്ഷാ ക്രമക്കേടില്‍ പ്രത്യേക അന്വേഷണ സംഘത്തെ നിയോഗിച്ചെന്ന് സിബിഐ. കേസിന്റെ അന്വേഷണത്തിനായി സംഘാംഗങ്ങള്‍ ബിഹാര്‍, ഗുജറാത്ത് സംസ്ഥാനങ്ങളിലേക്ക് യാത്ര തിരിച്ചു. എന്‍ടിഎ അടക്കം എല്ലാ സര്‍ക്കാര്‍ സ്ഥാപനങ്ങളിലെയും ഉദ്യോഗസ്ഥരുടെ പങ്കും അന്വേഷണ പരിധിയിലുണ്ടെന്ന് സിബിഐ വാര്‍ത്താക്കുറിപ്പില്‍ വ്യക്തമാക്കി.

🔹വിവാദമായതിനെ തുടര്‍ന്ന് 1563 പേര്‍ക്കായി വീണ്ടും നടത്തിയ നീറ്റ്-യു.ജി പരീക്ഷയെഴുതിയത് 813 പേര്‍ മാത്രം. സുപ്രീം കോടതി വിധിയെ തുടര്‍ന്നാണ് ഗ്രേസ് മാര്‍ക്ക് നല്‍കപ്പെട്ട 1563 പേര്‍ക്കായി വീണ്ടും നീറ്റ് പരീക്ഷ നടത്തിയത്. അതേസമയം നീറ്റ്-യു.ജി. പരീക്ഷയില്‍ ക്രമക്കേട് നടത്തിയ 63 വിദ്യാര്‍ഥികളെ ഡീബാര്‍ ചെയ്തതായി എന്‍.ടി.എ. അറിയിച്ചു.

🔹മാഫിയകള്‍ക്കും അഴിമതിക്കാര്‍ക്കും രാജ്യത്തെ വിദ്യാഭ്യാസ സംവിധാനം തീറെഴുതി കൊടുത്തുവെന്നും കുട്ടികളുടെ ഭാവി യോഗ്യതയില്ലാത്തവരുടെയും അത്യാഗ്രഹികളുടെയും കൈയിലെത്തിയതാണ് പേപ്പര്‍ ചോര്‍ച്ചയ്ക്ക് കാരണമെന്നും കോണ്‍ഗ്രസ് നേതാവ് പ്രിയങ്ക ഗാന്ധി ആരോപിച്ചു. പരീക്ഷ പോലും മര്യാദയ്ക്ക് നടത്താനാകാത്തവരാണ് ബിജെപി സര്‍ക്കാരെന്നും മോദി കാഴ്ച കണ്ടിരിക്കുകയാണെന്നും പ്രിയങ്ക ഗാന്ധി ആരോപിച്ചു.

🔹ഛത്തീസ്ഗഡിലെ സുഖ്മ ജില്ലയില്‍ നക്സലൈറ്റുകള്‍ നടത്തിയ ആക്രമണത്തില്‍ മലയാളിയുള്‍പ്പെടെ രണ്ടു ജവാന്മാര്‍ക്കു വീരമൃത്യു. തിരുവനന്തപുരം നന്ദിയോട് പൊട്ടന്‍ചിറ ഫാം ജംക്ഷനില്‍ ആര്‍.വിഷ്ണു (35), ശൈലേന്ദ്ര (29) എന്നീ കമാന്‍ഡോകളാണ് കൊല്ലപ്പെട്ടത്.

🔹കള്ളക്കുറിച്ചിയില്‍ വിഷമദ്യ ദുരന്തം ഉണ്ടായ സ്ഥലത്ത് ദുരന്തബാധിതരെ സന്ദര്‍ശിച്ച് മക്കള്‍ നീതി മയ്യം അധ്യക്ഷന്‍ നടന്‍ കമല്‍ ഹാസന്‍. തമിഴ്നാട്ടില്‍ മരുന്ന് കടകളേക്കാള്‍ ഒരു തെരുവില്‍ ടാസ്മാക് കടകളുണ്ടെന്ന് കമല്‍ഹാസന്‍ വിമര്‍ശിച്ചു. സമ്പൂര്‍ണ മദ്യനിരോധനം പ്രായോഗികമല്ല, അത് മാഫിയകളെ വളര്‍ത്തുകയേ ഉള്ളൂ. ഇപ്പോഴുണ്ടായ ദുരന്തത്തിന് ഇത് വരെ ഭരണത്തിലിരുന്ന എല്ലാ സര്‍ക്കാരുകളും ഉത്തരവാദികളാണെന്നും കമല്‍ഹാസന്‍ പറഞ്ഞു.

🔹കഴിഞ്ഞ ദിവസത്തെ മഴയെ തുടര്‍ന്ന് ആറ് മാസം മുന്‍പ് പ്രധാനമന്ത്രി നരേന്ദ്ര മോദി ഉദ്ഘാടനം ചെയ്ത അയോധ്യ ധാം ജംഗ്ഷന്‍ റെയില്‍വേ സ്റ്റേഷന്റെ ചുറ്റുമതില്‍ ഇടിഞ്ഞു വീണു. 20 മീറ്റര്‍ നീളത്തിലാണ് മതില്‍ പൊളിഞ്ഞു വീണത്. 240 കോടിയോളം രൂപ ചെലവിട്ടാണ് കെട്ടിടം പുതുക്കി പണിതത്. മതില്‍ ഇടിഞ്ഞതോടെ അയോധ്യ നിര്‍ദയമായി കൊള്ളയടിക്കപ്പെട്ടെന്ന് സമാജ്വാദി പാര്‍ടി നേതാവ് ഐപി സിങ് പ്രതികരിച്ചു. എന്നാല്‍ മതില്‍ അയോധ്യ ധാം സ്റ്റേഷന്റെ പ്രധാന കെട്ടിടത്തിന്റെ ഭാഗമല്ലെന്ന് റെയില്‍വെ അധികൃതര്‍ അറിയിച്ചു.

🔹മേഘവിസ്ഫോടനത്തെ തുടര്‍ന്നുണ്ടായ മിന്നല്‍ പ്രളയത്തില്‍ അരുണാചല്‍ പ്രദേശില്‍ വന്‍ നാശനഷ്ടം. ഷിയോമിയാ ജില്ലയിലെ മേച്ചുക്ക മേഖലയിലാണ് മേഘവിസ്ഫോടനം ഉണ്ടായത്. പ്രളയത്തില്‍ രണ്ട് വൈദ്യുത നിലയങ്ങള്‍ പൂര്‍ണ്ണമായും തകരാറിലായതോടെ പ്രദേശത്തെ വൈദ്യുത വിതരണം തടസ്സപ്പെട്ടു. വന്‍കൃഷിനാശമുണ്ടാവുകയും ഒട്ടേറെ വീടുകള്‍ ഒലിച്ചു പോവുകയും ചെയ്തിട്ടുണ്ട്.

🔹ഐസ്ആര്‍ഒയുടെ പുനരുപയോഗിക്കാവുന്ന വിക്ഷേപണ വാഹനം ആര്‍എല്‍വിയുടെ മൂന്നാം ലാന്‍ഡിംഗ് പരീക്ഷണം വിജയകരമായി. കര്‍ണാടകയിലെ ചിത്രദുര്‍ഗയിലെ ഡിആര്‍ഡിഒ എയറോനോട്ടിക്കല്‍ ടെസ്റ്റ് റേഞ്ചില്‍ വച്ച് ഇന്നലെ രാവിലെ നടന്ന പരീക്ഷണത്തില്‍ രാവിലെ 7.10 ഓടെ പുഷ്പക് ലാന്‍ഡ് ചെയ്തു. സ്വയം ദിശയും വേഗവും നിയന്ത്രിച്ച് പേടകം റണ്‍വേയില്‍ ഇറങ്ങുകയായിരുന്നു.

🔹ദേശീയ ഉത്തേജക വിരുദ്ധ ഏജന്‍സിയുടെ നടപടിയെ തുടര്‍ന്ന് ബജ്റംഗ് പൂനിയക്ക് വീണ്ടും സസ്പെന്‍ഷന്‍. പരിശോധനക്കായി മൂത്ര സാംപിള്‍ നല്‍കിയില്ലെന്ന് ചൂണ്ടിക്കാട്ടി ഇപ്പോള്‍ വീണ്ടും ബജ്റംഗ് പൂനിയയെ താല്‍ക്കാലികമായി സസ്പെന്‍ഡ് ചെയ്തിരിക്കുകയാണ്. സസ്പെന്‍ഷനെതിരെ ജൂലൈ 11നകം വിശദീകരണം നല്‍കാനാണ് നാഡ ബജ്റംഗ് പൂനിയക്ക് അയച്ച നോട്ടീസില്‍ ഇപ്പോള്‍ ആവശ്യപ്പെട്ടിരിക്കുന്നത്.

🔹ടി20 ക്രിക്കറ്റ് ലോകകപ്പിലെ സൂപ്പര്‍ എട്ടില്‍ ഓസ്ട്രേലിയക്കെതിരായ മത്സരത്തില്‍ അഫ്ഗാനിസ്ഥാന് 21 റണ്‍സിന്റെ ചരിത്ര വിജയം. അന്താരാഷ്ട്ര ക്രിക്കറ്റില്‍ ഓസ്‌ട്രേലിയയ്‌ക്കെതിരേ അഫ്ഗാന്റെ ആദ്യ ജയമാണിത്. ആദ്യം ബാറ്റ് ചെയ്ത അഫ്ഗാന്‍ 6 വിക്കറ്റ് നഷ്ടത്തില്‍ 148 റണ്‍സെടുത്തു. മറുപടി ബാറ്റിംഗിനിറങ്ങിയ ഓസ്ട്രേലിയക്ക് 19.2 ഓവറില്‍ 127 റണ്‍സെടുക്കാനേ സാധിച്ചുള്ളൂ. തോറ്റാല്‍ പുറത്താകുന്ന കളിയില്‍ ജയിച്ചതോടെ അഫ്ഗാനിസ്താന്‍ സെമി സാധ്യതകള്‍ സജീവമാക്കിയിരിക്കുകയാണ് അഫ്ഗാനിസ്ഥാന്‍.
ടി20 ക്രിക്കറ്റ് ലോകകപ്പിലെ സൂപ്പര്‍ എട്ടിലെ മറ്റൊരു മത്സരത്തില്‍ അമേരിക്കയെ പത്ത് വിക്കറ്റിന് നിലം പരിശാക്കി ഇംഗ്ലണ്ട്. ആദ്യം ബാറ്റ് ചെയ്ത അമേരിക്ക 115 റണ്‍സെടുക്കുന്നതിനിടെ എല്ലാവരും പുറത്തായി. ഹാട്രിക്കോടെ നാല് വിക്കറ്റെടുത്ത ക്രിസ് ജോര്‍ദാനാണ് അമേരിക്കയെ തകര്‍ത്തെറിഞ്ഞത്. മറുപടി ബാറ്റിംഗിനിറങ്ങിയ ഇംഗ്ലണ്ട് 38 പന്തില്‍ 83 റണ്‍സെടുത്ത ജോസ് ബട്ലറുടെ മികവില്‍ വിക്കറ്റൊന്നും നഷ്ടപ്പെടുത്താതെ ലക്ഷ്യത്തിലെത്തി.
ടി20 ലോകകപ്പ് സൂപ്പര്‍ എട്ടില്‍ ഇന്ത്യ ഇന്ന് ഓസ്‌ട്രേലിയയെ നേരിടും. സെമി ഫൈനലിലേക്കുള്ള സുഗമമായ പ്രവേശനം ഉറപ്പാക്കണമെങ്കില്‍ ഇന്ത്യക്ക് ഇന്ന് ജയിച്ചേ തീരൂ.

🔹നാഗചൈതന്യ നായകനായി വേഷമിട്ട് വരാനിരിക്കുന്ന ചിത്രമാണ് ‘തണ്ടേല്‍’. നായിക സായ് പല്ലവിയാണ്. ആന്ധ്രാപ്രദേശില്‍ 2018ല്‍ നടന്ന സംഭവമാണ് ചിത്രത്തിന്റെ പ്രമേയം. സ്വന്തം അവകാശങ്ങള്‍ക്കായി പോരാടുന്ന യുവതിയായ കഥാപാത്രമായിട്ടാണ് സായ് പല്ലവിയാണ് തണ്ടേലില്‍ നായികയാകുന്നത്. മത്സ്യത്തൊഴിലാളികളുടെ ജീവിതം പ്രമേയമാക്കി ഒരുങ്ങുന്ന ചിത്രത്തില്‍ നാഗചൈതന്യയുടെ ജോഡിയായിട്ടാണ് സായ് പല്ലവി വേഷമിടുന്നത്. നായകനായ നാഗചൈതന്യക്ക് പ്രതിഫലം ഏഴ് കോടിയായിരിക്കും എന്ന് വ്യക്തമായിട്ടുണ്ടെങ്കിലും സായ് പല്ലവിക്ക് ലഭിക്കുന്ന തുക എത്രയെന്ന് പുറത്തുവിട്ടിട്ടില്ല എന്നാണ് ടോളിവുഡ് ഡോട് കോമിന്റെ റിപ്പോര്‍ട്ട്. സംവിധായകന്‍ ചന്ദൂ മൊണ്ടേടിയുടെ പുതിയ ചിത്രമായ തണ്ടേലില്‍ നാഗചൈതന്യക്ക് വലിയ പ്രതീക്ഷകളാണ് ഉള്ളത് എന്നതിനാല്‍ ആരാധകരും ആവേശത്തോടെയാണ് കാത്തിരിക്കുന്നത്. പ്രേമം എന്ന ഹിറ്റ് മലയാള ചിത്രത്തിലൂടെ പ്രേക്ഷകരുടെ പ്രിയങ്കരിയായി മാറിയ നായിക സായ് പല്ലവി നാഗചൈതന്യ നായകനാകുന്ന തണ്ടേലിന് പുറമേ തമിഴിലും ഒരു പ്രധാന വേഷത്തില്‍ എത്താന്‍ തയ്യാറെടുത്തിരിക്കുകയാണ്. ശിവകാര്‍ത്തികേയന്‍ നായകനായി വേഷമിടുന്ന അമരന്‍ എന്ന ചിത്രത്തിലാണ് സായ് പല്ലവി പ്രാധാന്യമുള്ള നായികയാകുന്നത്.

തയ്യാറാക്കിയത്:
കപിൽ ശങ്കർ