🌹 “ഇന്നത്തെ ചിന്താവിഷയം” 🌹 – 2025 | ജനുവരി 14 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

അറിവും ആധികാരികതയും ഉള്ളവർആയിരിക്കാം
………………………………..

പരിമിതമായ അറിവുകളുടെയും അനുഭവങ്ങളുടെയും പരിധിക്കുള്ളിൽ നിന്നാണ് പലരും പലപ്പോഴും, വസ്തുനിഷ്ഠമെന്നു പറഞ്ഞ്, വ്യാഖ്യാനങ്ങളും വിശകലനങ്ങളും നടത്തുന്നത്. അതുമൂലം, വികൃതങ്ങളായ വസ്തുതകളും, മുറിവേറ്റ വ്യക്തിത്വങ്ങളുമാണു രൂപപ്പെടുക.

ആഴവും ആകാശവും ഒരുമിക്കുന്നിടത്തു നിന്നാണ് ആധികാരികത ഉടലെടുക്കുന്നത്. അരികിൽ നിന്നു കൊണ്ട് എന്നു പറഞ്ഞു നടത്തുന്ന അവകാശവാദങ്ങൾക്ക്, യാഥാർത്ഥ്യങ്ങളുമായി പുലബന്ധം പോലും കാണണമെന്നില്ല. നാം ഉരുവിടുന്ന വാക്കുകൾ, സൂക്ഷ്മവും, നിരീക്ഷണ വിധേയവുമായിരുന്നെങ്കിൽ, എത്രയോ പ്രശ്നങ്ങൾ ഒഴിവാക്കപ്പെടുമായിരുന്നു.

ഒരു ആധികാരികതയുമില്ലാതെ സംസാരിക്കുന്ന അധികാരികളും, അവർ പറയുന്നതു മാത്രം വിശ്വസിക്കുന്ന അണികളും ചേർന്നാൽ, ആ തലമുറയിൽപ്പിന്നെ സത്യമറിയുന്ന ആരും ഉണ്ടാകണമെന്നില്ല. പറഞ്ഞു പഠിക്കുന്നവരും, പഠിച്ചു പറയുന്നവരും തമ്മിലുള്ള വ്യത്യാസം, ആധികാരികതയുടേതാണ് . പറഞ്ഞു പഠിക്കുന്നവർക്ക്, സ്വന്തം അഭിപ്രായങ്ങളോ നിലപാടുകളോ ഉണ്ടാകണമെന്നില്ല. എന്നാൽ, പഠിച്ചു പറയുന്നവർക്ക്, വൈകാരികതയേക്കാൾ വസ്തുതകളായിരിക്കും പ്രധാനം. എല്ലാ ശരികളും പറയണമെന്നില്ല. ശരിയല്ലാത്തതൊന്നും പറയാതിരുന്നാൽ മാത്രം മതി. ലോകം നേർരേഖയിൽ സഞ്ചരിച്ചു കൊള്ളും.

പകുതി മാത്രമറിഞ്ഞു പ്രചരിപ്പിക്കുന്നവ, പരദൂഷണമാകുമെന്നു മാത്രമല്ല, അവയിൽ വസ്തുതാ വിരുദ്ധമായവ പുതു തലമുറയുടെ അറിവിനെ വികലമാക്കുകയും ചെയ്യും. ഒന്നുമറിയാതെയും, പാതി മാത്രമറിഞ്ഞും നിരത്തുന്ന എല്ലാ വാദഗതികളും അപൂർണ്ണവും അപകടകരവുമായിരിക്കും. എല്ലാം അറിയുന്നവരായി ആരുമുണ്ടാകില്ല. പക്ഷെ, അറിയുന്ന കാര്യങ്ങളിൽ, ആത്മാർത്ഥതയും, ആധികാരികതയും ഉണ്ടായിരിക്കണം.

എന്തെങ്കിലും അറിയുന്നതുകൊണ്ട്, എല്ലാമറിയാം എന്നു ഭാവിക്കുന്നവരാണു സത്യത്തെ വിരൂപമാക്കുന്നത്. അറിവില്ലായ്മ അംഗീകരിക്കുകയാണ് ശരിയായ അറിവിൻ്റെ ആരംഭം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര