🌹 “ഇന്നത്തെ ചിന്താവിഷയം” 🌹 – 2025 | ജനുവരി 12 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

എതിർപ്പിന് അതിൻ്റേതായ യുക്തി ഉണ്ടായിരിക്കണം
————————————————————————–

സന്യാസിയെക്കണ്ടു സങ്കടം പറയുവാൻ ഒരാളെത്തി. “ഞാൻ എന്തു പറഞ്ഞാലും
ആളുകൾ കളിയാക്കിച്ചിരിക്കും. നാട്ടിൽ ജീവിക്കാനാകുന്നില്ല”, അയാൾ ആവലാതിപ്പെട്ടു.

സന്യാസി അയാളോടു പറഞ്ഞു: “ഞാൻ പറയുന്നതുപോലെ ചെയ്താൽ, നിങ്ങളുടെ പ്രശ്നം പരിഹരിക്കപ്പെടും. ഇന്നു മുതൽ, എല്ലാറ്റിനേയും എതിർക്കുക. സൂര്യൻ്റെ മനോഹാരികതയെക്കുറിച്ച് ആരെങ്കിലും പറഞ്ഞാൽ, അതിൻ്റെ അസഹനീയമായ
ചൂടിനേക്കുറിച്ചു പറയുക. ഈശ്വരനേക്കുറിച്ചു പറഞ്ഞാൽ, നിങ്ങളൊരു നിരീശ്വരവാദിയാകുക. ആരെന്തു പറഞ്ഞാലും, നിഷേധ നിലപാടു മാത്രമേ, സ്വീകരിക്കാവൂ! എഴുദിവസം കഴിഞ്ഞ്, എന്നെ വന്നു കാണുക”.

ഒരാഴ്ച കഴിഞ്ഞ്, അയാൾ സന്യാസിയെ കാണാനെത്തി. ഒപ്പം ഒരു പറ്റം ആളുകളും ഉണ്ടായിരുന്നു. അവരെല്ലാം, അയാളുടെ ബുദ്ധിശക്തിയിൽ അത്ഭുതപ്പെട്ട് , അയാളെ അനുഗമിച്ചവരായിരുന്നു.

നിഷേധ സമീപനങ്ങൾക്ക് , പെട്ടെന്നു ആൾക്കൂട്ട ശ്രദ്ധ പിടിച്ചുപറ്റുവാനാകും. ബദൽ ചിന്തകളിലേക്കും, പ്രവൃത്തികളിലേക്കും ആളുകൾ പെട്ടന്ന്
ആകർഷിക്കപ്പെടും: അവ തെറ്റാണെങ്കിലും,
ശരിയാണെങ്കിലും? ആരാലും ശ്രദ്ധിക്കപ്പെടാതിരിക്കുന്നവർ, ഒരു കാരണവുമില്ലാതെ, എന്തിനേയും ഏതിനേയും എതിർത്തു തുടങ്ങിയാൽ, സാവധാനം അവർ ആരാധനാ മൂർത്തികളായി മാറും.

എതിർക്കപ്പെടാൻ പാടില്ലാത്തതായി ഒന്നുമില്ല. പക്ഷെ, എന്തുകൊണ്ടെതിർക്കുന്നു
എന്നതിന്, ഒരു യുക്തി ഉണ്ടായിരിക്കണം. പൂർണ്ണമായ ശരി, ഒന്നിലും ഉണ്ടാകില്ല. എത്ര ശരിയെന്നു കരുതുന്നവയും, തെറ്റായി വ്യാഖ്യാനിക്കപ്പെടുകയും
എതിർക്കപ്പെടുകയും ചെയ്യാം. എതിർപ്പുകൾ തെറ്റല്ല. പക്ഷെ, നിഷേധം ഒരു തന്ത്രമായി സ്വീകരിക്കുന്നവർക്കു നൽകുന്ന പ്രോത്സാഹനവും പിന്തുണയും, ഗുണകരമായിരിക്കില്ല. അതു ക്രീയാത്മകത ഇല്ലാതാക്കുമെന്നു മാത്രമല്ല, അപകടങ്ങൾക്കു വഴിയൊരുക്കുകയും ചെയ്യാം. അതിൽ നാം പെട്ടു പോകരുത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര