🌹 “ഇന്നത്തെ ചിന്താവിഷയം” 🌹 – 2025 | ജനുവരി 09 | വ്യാഴവും ✍ പ്രൊഫസ്സർ എ.വി. ഇട്ടി മാവേലിക്കര

നിസ്വാർത്ഥ സ്നേഹം കാണിക്കാൻ ആകട്ടെ
—————————————————————.

ആ നാട്ടിൽ ഒരു വൻമരം ഉണ്ടായിരുന്നു. ഒരു കുട്ടിയും. അവർ തമ്മിൽ വലിയ ചങ്ങാത്തത്തിലായിരുന്നു. കുട്ടിക്കു പഴങ്ങൾ പറിക്കാൻ, മരം ചില്ലകൾ താഴ്ത്തിക്കൊ
ടുക്കുകയും, കളിക്കാൻ പൂക്കളും ഇലകളും വഴിത്തിക്കൊടുക്കുകയും ചെയ്തിരുന്നു. എന്നാൽ, കുട്ടി വളർന്നു വലുതായ്പ്പോൾ, മരത്തെ മറന്നു. ഒരിക്കൽ മരം പറഞ്ഞു: “നിന്നെയിപ്പോൾ കാണാനില്ലല്ലോ?” ”’ഞാനെന്തിനാ നിൻ്റെയടുത്തു വരുന്നത് ? നിൻ്റെ കയ്യിൽ പണമുണ്ടോ?” അയാൾ ചോദിച്ചു! മരം പഞ്ഞു: ”എൻ്റെ പൂക്കളും പഴങ്ങളും വിറ്റാൽ പണം കിട്ടും”. അയാൾ അതുപോലെ ചെയ്തു പണം സമ്പാദിച്ചു.

ചില വർഷങ്ങൾക്കു ശേഷം, മരം അയാളോടു ചോദിച്ചു: “എൻ്റെ കൊമ്പിൽ ഊഞ്ഞാലാടാമോ?” അയാൾ പറഞ്ഞു: “ഞാനൊരു വീടുണ്ടാക്കുന്ന തിരക്കിലാണ് “. മരം പറഞ്ഞു: “എൻ്റെ ശിഖരങ്ങൾ വെട്ടി, വീടുണ്ടാക്കിക്കൊള്ളൂ”. ആയാൾ അങ്ങനെ വീടു പണിതു. വർഷങ്ങൾക്കു ശേഷം വീണ്ടും കണ്ടപ്പോൾ, മരം ചോദിച്ചു: “എന്നെയൊന്നു കെട്ടിപ്പിടിക്കാമോ?” അയാൾ പറഞ്ഞു: “നിന്നോടു സംസാരിച്ചുകൊണ്ടു നിൽക്കാൻ സമയമില്ല. ഒരു ബോട്ടുണ്ടാക്കാനുള്ള മരം തേടി, ഞാനീ നാടുവിടുകയാണ് ”. “എന്നെവെട്ടി ബോട്ടുണ്ടാക്കിക്കൊള്ളൂ”, മരം പറഞ്ഞു. ആയാൾ മരം വെട്ടി ബോട്ടുണ്ടാക്കി, യാത്രയായി. പിന്നീടു തിരിച്ചു വന്നുമില്ല. മരം
കുറ്റിയായി അവശേഷിച്ചു.

സ്നേഹത്തിനും സ്വാർത്ഥതയ്ക്കും രണ്ടു ഭാവങ്ങളാണ് . ഒന്നിനു നൽകലിൻ്റേതും, മറ്റേതിനു വാങ്ങലിൻ്റേതും. സ്നേഹത്തിനു തൻകാര്യ ഭാവമില്ല; വിട്ടുവീഴ്ചയും വിട്ടു നൽകലും മാത്രമേയുള്ളൂ. പടർന്നു പന്തലിക്കുന്ന സ്നേഹ ബന്ധങ്ങൾക്കിടയിൽ, ചിന്തകളുടെ വൈരുദ്ധ്യമല്ല, വികാരങ്ങളുടെ ഇഴയടുപ്പമാണുണ്ടാകുക. തന്നിലേക്കു വലിച്ചടുപ്പിക്കുന്നതല്ല, താഴേക്ക് ഇറങ്ങി വരുന്നതാണു സ്നേഹം.

പകരമൊന്നും പ്രതീക്ഷിക്കാത്ത സ്നേഹം മാത്രമേ, വിശുദ്ധമാകൂ. ആവശ്യമുള്ളപ്പോൾ മാത്രം സ്നേഹിക്കുന്നവരുണ്ടാകും. ഉള്ളിൽ വിരോധം വച്ചുപുലർത്തി, പുറമേ സ്നേഹഭാവം പ്രകടിപ്പിക്കുന്നവരുമുണ്ടാകും. നൽകുന്നതിന്നുസരിച്ചു തിരിച്ചു കിട്ടിയില്ലെങ്കിൽ, പലർക്കും സ്നേഹം നിലനിർത്തുക വിഷമമാകും. എല്ലാവരുടെ മുമ്പിലും, ഒന്നും തിരിച്ചാഗ്രഹിക്കാതെ, സ്നേഹത്തിൻ്റെ വിത്തുകൾ വിതറാനാകുമ്പോഴാണ് സ്നേഹം, സ്നേഹമാകുന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര