🌹 “ഇന്നത്തെ ചിന്താവിഷയം” 🌹 – 2025 | ജനുവരി 08 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

പ്രതിഫലേച്ഛ കൂടാതെ ചെയ്യുന്ന
നന്മകൾ മാത്രമാണ് ആദരിക്കപ്പെടേണ്ടത്
—————————————————————–

ഒരു സഞ്ചാരി, ഒരു ഗ്രാമത്തിലെത്തി. ഒരു വയോധികൻ, വഴിയോരത്തു വൃക്ഷത്തൈകൾ നടുന്നതു കണ്ട്‌, സഞ്ചാരി അദ്ദേഹത്തോടു ചോദിച്ചു: “ഈ മരങ്ങൾ പാതി വളർച്ച എത്തുന്നതു പോലും കാണാനുള്ള ഭാഗ്യം തങ്കൾക്കുണ്ടായി എന്നു വരില്ല. പിന്നെന്തിനാണ്, ഇത്രയും കഷ്ടപ്പെട്ട് ഇവ നടുന്നത് ?”

വയോധികൻ പറഞ്ഞു: “ഈ കാണുന്ന ചെടികളും മരങ്ങളുമെല്ലാം, മറ്റാരോ നട്ടതാണ്. ആർക്കാണ് ഇവ പ്രയോജനപ്പെടുക എന്നു ചിന്തിക്കാതെയാണവർ അതെല്ലാം ചെയ്തത്. ആർക്കെങ്കിലും പ്രയോജനപ്പെടുമെന്ന് അവർ വിശ്വസിച്ചു. അതേ വിശ്വാസമാണ് എനിക്കുമുള്ളത്. ആർക്കെങ്കിലും ഒരിക്കൽ ഇതു പ്രയോജനപ്പെടും!”

പ്രതിഫലേച്ഛ കൂടാതെ ചെയ്യുന്ന സത്കർമ്മങ്ങളാണ് ഏറെ ആദരണീയം. തീർത്തും നിസ്സാര ദൗത്യങ്ങളെപ്പോലും, പർവതീകരിച്ചു പ്രദർശിപ്പിച്ചു പേരെടുക്കുന്നവരേക്കാൾ, അദൃശ്യരായി നിന്നുകൊണ്ടു നന്മ ചെയ്യുന്നവരുടെ പ്രവൃത്തികളാകും സമൂഹത്തിനു കൂടുതൽ ഗുണകരം.നാം നമ്മുടെ ശേഷ്ഠത പ്രഘോഷിക്കുമ്പോൾത്തന്നെ, അതിനു കാരണമായ പ്രവൃത്തികളുടെ വിശുദ്ധി നഷ്ടപ്പെട്ടിരിക്കും.

തങ്ങൾ സ്വീകരിക്കേണ്ടി വരുന്ന സത്കർമ്മങ്ങളുടെ ഇരകളാകേണ്ടി വരുന്നവരുടെ കാര്യം അവഗണിക്കാനാവില്ല. മറ്റുള്ളവരുടെ ഇല്ലായ്മയും വല്ലായ്മയും മുതലെടുത്ത് , ക്യാമറകൾ സാക്ഷിയാക്കി, അവർക്കു വെച്ചുവിളമ്പി പേരു സമ്പാദിക്കുന്നതിലും
ഉത്തമം, അവരെ പട്ടിണി കിടക്കാൻ, അനുവദിക്കുന്നതായിരിക്കും. അവരെ സംബന്ധിച്ചടത്തോളം, ആത്മാഭിമാനം വിറ്റു വയറു നിറക്കുന്നതിനേക്കാൾ ഏറെ സ്വീകാര്യം, വിശന്നു കഴിയുന്നതായിരിക്കും. പ്രതിഫലേച്ഛ കൂടാതെ ചെയ്യുന്ന സത്കർമ്മങ്ങളായിരിക്കും, ഈശ്വര ദൃഷ്ടിയിൽ വിലയുള്ളതും ആദരിക്കപ്പെടുന്നതും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര