🌹 “ഇന്നത്തെ ചിന്താവിഷയം” 🌹 – 2025 | ജനുവരി 07 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

ഭയമെന്ന അടിമത്വത്തിൽ നിന്നു മോചനം പ്രാപിക്കാം
——————————————————————————

അരോഗ ദൃഢഗാത്രനായിരുന്നു ഡയോജനീസ്. ആളുകളെ പിടികൂടി, അടിമകളാക്കി വിൽക്കുന്ന ഒരു സംഘം, ഒരിക്കൽ അദ്ദേഹത്തെ വളഞ്ഞു. ഡയോജനീസിൻ്റെ ആകാരം കണ്ടിട്ട്, അവർ ഒന്നു ഭയന്നു. ഡയോജനീന് അവരോടു പറഞ്ഞു: “പേടിക്കേണ്ട. ഞാൻ എതിർക്കയില്ല”. നിങ്ങൾക്കെന്നെ ചങ്ങലയ്ക്കിടാം” അവർ അദ്ദേഹത്തെ ചങ്ങലയ്ക്കിട്ട്, അടിമച്ചന്തയിലെത്തിച്ചു.

അടിമച്ചന്തയിലെത്തിയപ്പോൾ മുതൽ, ഡയോജനീസ് വിളിച്ചു പറയാനാരംഭിച്ചു: “ഒരു യജമാനനെ വിൽക്കാനുണ്ട്. അടിമകളാരെങ്കിലുമുണ്ടെങ്കിൽ, വന്നു വാങ്ങിക്കൊള്ളൂ. “താങ്കളെന്താണ് ഇങ്ങനെ സംസാരിക്കുന്നതെന്നു ചോദിച്ച അടിമക്കച്ചവടക്കാരോട് , അദ്ദേഹം പറഞ്ഞു: “യജമാനൻ എന്നും യജമാനൻ തന്നെ. സ്വാതന്ത്ര്യം അടിമത്തത്തിൽ നിന്നുള്ള മോചനമല്ല. അടിമത്തത്തെ മറികടക്കലാണ് !”

അടിമത്തം ഒരു മനോഭാവമാണ്: അതു ഭയത്തിൻ്റെയോ, മുഖസ്തുതിയുടെയോ, സഹതാപത്തിൻ്റെയോ ആകാം. ദാസ്യഭാവത്തിൻ്റെ ജീർണ്ണസുഖങ്ങൾ അനുഭവിച്ചവർക്ക്, അതിനോട് എന്നും മമതയുണ്ടാകും. അതിൽ നിന്നും രക്ഷപെടണമെന്ന ആഗ്രഹം പോലും, അവർക്കുണ്ടാകണമെന്നില്ല!

എല്ലാ അടിമത്വവും, പ്രത്യക്ഷത്തിൽ സ്വാതന്ത്ര്യം എന്നു തോന്നിപ്പിക്കുന്ന ചില കാര്യങ്ങൾ അനുവദിച്ചു തരും. കഴിക്കുന്ന ഭക്ഷണവും, ശ്വസിക്കുന്ന വായുവും, ആരുടെയോ ഔദാര്യമാണെന്നു പറഞ്ഞവർ വിശ്വസിപ്പിക്കും. ചില പാരിതോഷികങ്ങളും സ്ഥാനമാനങ്ങളും നമ്മുടെ കൈക്കുമ്പിളിൽ വച്ചുതരും.

ഒളിച്ചോടിയല്ല സ്വാതന്ത്ര്യം പ്രാപിക്കണ്ടത്. എന്തിൻ്റെയെങ്കിലും സ്വാധീനത്തിൽ നിന്നു രക്ഷപെടാൻ, ഒളിച്ചോടുന്നതു സ്വാതന്ത്ര്യമല്ല; അതു ഭീരുത്വത്തിൻ്റെ പടുകുഴിയിലേക്കുള്ള വീഴ്ചയാണ്. എന്തിനേയാണോ ഒരാൾ ഭയക്കുന്നത്, അതോടൊപ്പം ജീവിച്ച്, ആ ഭയത്തെ മറികടക്കണം. അല്ലെങ്കിൽ, ഭയമെന്ന അടിമത്വം സന്തത സഹചാരിയായി കൂടെ ഉണ്ടായിരിക്കും. തനതു ശീലങ്ങളും,
സ്വന്തമായ അഭിപ്രായങ്ങളും, ഈടുറ്റ പ്രവർത്തന ശൈലികളും സ്വന്തമായി ഉള്ളവർക്കു മാത്രമേ, സ്വാതന്ത്ര്യം അനുവിക്കാനാകൂ. അവരെ ആർക്കും ഭയപ്പെടുത്തി, അടിമകളാക്കാനാകയില്ല.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര