🌹 “ഇന്നത്തെ ചിന്താവിഷയം” 🌹 – 2025 | ജനുവരി 06 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

നഷ്ടങ്ങളിൽ നിന്നും
പാഠങ്ങൾ ഉൾക്കൊള്ളാൻ ആകണം
——————————————————

രാജാവു വേഷ പ്രച്ഛന്നനായി നടക്കുമ്പോഴെല്ലാം, ഒരു മരച്ചുവട്ടിൽ, ധ്യാന നിമഗ്നനായി ഇരിക്കുന്ന ഒരു യുവാവിനെ കാണാറുണ്ടായിരുന്നു. ഒരു ദിവസം രാജാവയാളെ, തൻ്റെ കൊട്ടാരത്തിലേക്കു ക്ഷണിച്ചു. വിസമ്മതമൊന്നും പറയാതെ, അയാൾ ക്ഷണം സ്വീകരിച്ചു. രാജാവ് അയാൾക്ക് കൊട്ടാരത്തിലെ എല്ലാ സുഖ സൗകര്യങ്ങളും നൽകി. അയാൾ അത്ര വിശുദ്ധനൊന്നുമല്ല എന്നു രാജാവുറപ്പിച്ചു. അല്ലെങ്കിൽ, അയാൾ ക്ഷണിച്ചപ്പോഴേ കൂടെപ്പോരില്ലായിരുന്നു. താൻ നൽകിയ സുഖ സൗകര്യങ്ങളൊന്നും, ആസ്വദിക്കില്ലായിരുന്നു.

ഒരു ദിവസം രാജാവയാളോടു ചോദിച്ചു:
“നീയും ഞാനും തമ്മിലുള്ള വ്യത്യാസം എന്താണ് ? നമ്മൾ രണ്ടു പേരും കൊട്ടാരത്തിൽ എല്ലാ സുഖ സൗകര്യങ്ങളോടും ജീവിക്കുന്നു”. അയാൾ രാജാവിനേയും കൂട്ടി പുറത്തിറങ്ങയിട്ടു പറഞ്ഞു:
” ചോദ്യത്തിനുത്തരം പറയുവാൻ, രാജ്യത്തിൻ്റെ ആതിർത്തി വരെ നമുക്കു പോകണം”. രാജാവു സമ്മതിച്ചു.

അതിർത്തിയിലെത്തിയപ്പോൾ, യുവാവു പറഞ്ഞു: “ഞാൻ ഇനിയും മുമ്പോട്ടു പോകും. താങ്കൾക്കു വരാൻ കഴിയുമോ? രാജാവു നിഷേധിച്ചു: ”അതെൻ്റെ രാജ്യമല്ല. എനിക്കു സ്വന്തമായി രാജ്യവും, ഭരണാധികാരവും, കുടുംബവും എല്ലാം ഉണ്ട്‌ . അവയെല്ലാം വിട്ട് , എനിക്കു വരാൻ പറ്റില്ല!” യുവാവു പറഞ്ഞു: “ഇതാണു നമ്മൾ തമ്മിലുള്ള വ്യത്യാസം. എനിക്കു സ്വീകരിച്ചതു പോലെ തന്നെ ഉപക്ഷിക്കാനും കഴിയും. താങ്കൾക്കതാകില്ല!”

എന്തിനോടൊക്കെ, അമിതമായ അടുപ്പം നാം പുലർത്തുന്നുവോ, അവയുടെയൊക്കെ അടിമകളായിരിക്കും നാം. എന്തിനോടൊക്കെ നാം അടുപ്പം പുലർത്തുന്നുവോ, അവയെല്ലാമായിരിക്കും, നമ്മുടെ ജീവിതത്തിൻ്റെ ഗതിയും, ദിശയും നിശ്ചയിക്കുക. അടുപ്പത്തിനിടയിലെ അകലവും, അകലത്തിനിടയിടെ അടുപ്പുമാണ്, ബന്ധങ്ങളുടെ ദൃഢത തീരുമാനിക്കുന്നത്. എന്തിനോടൊക്കെയാണ് അകലാൻ പറ്റാത്തത്, അതെല്ലാം ആകർഷണ കേന്ദ്രങ്ങളായിരിക്കും. എന്തിനോടൊക്കെയാണ് അടുക്കാൻ പറ്റാത്തത്, അവയെല്ലാം വികർഷണ കേന്ദ്രങ്ങളുമായിരിക്കും.

നഷ്ടപ്പെടും എന്നുറപ്പുള്ളവയോടെല്ലാം, ഒരു നഷ്ടബോധവും കൂടാതെ ബൈ പറഞ്ഞു മുമ്പോട്ടു പോകാൻ കഴിയുന്നവർക്കു മാത്രമേ, ജീവിത യാഥാർത്ഥ്യങ്ങളുമായി എളുപ്പത്തിൽ പൊരുത്തപ്പെടാനാകൂ. അവർക്കു മാത്രമേ നഷ്ടങ്ങളിൽ നിന്നും പാoങ്ങൾ ഉൾക്കൊള്ളാനുമാകൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര