🌹 “ഇന്നത്തെ ചിന്താവിഷയം” 🌹 – 2025 | ജനുവരി 03 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

സ്വപ്നങ്ങളെ യാഥാർത്ഥ്യവൽക്കരിക്കാൻ ആകട്ടെ
————————————————————————–

മൂന്നു പേർ ഒരു സംഭാഷണത്തിലായിരുന്നു. ആദ്യത്തെയാൾ പറഞ്ഞു: ”സ്വപ്നത്തിൽ, ഒരു കോടി രൂപാ ലഭിച്ചാൽ ഞാൻ ലോകം മുഴുവൻ ചുറ്റിക്കറങ്ങും; നിങ്ങളോ?”
രണ്ടാമൻ പറഞ്ഞു: “പണമുണ്ടാക്കാനായി, ഞാൻ യാത്ര ചെയ്തു മടുത്തു. അതുകൊണ്ട്, ഒരു കോടി കിട്ടിയാൽ, ഞാൻ വീട്ടിൽത്തന്നെ വിശ്രമിക്കും!” “ഞാൻ വീണ്ടും കിടന്നുറങ്ങും. ഒരു സ്വപ്നം കൊണ്ട് ഒരു കോടി കിട്ടുമെങ്കിൽ, മറ്റൊരു സ്വപ്നം കൂടി കണ്ടാൽ രണ്ടു കോടിയാകുമല്ലോ?”, അല്പം പരിഹാസത്തോടെ മൂന്നാമൻ പറഞ്ഞു!

ഭാവനകളെ താലോലിച്ചാണു ഭൂരിഭാഗം ആളുകളും സംതൃപ്തിയടയുന്നത്. ഭാവനകൾക്ക് പണവും അദ്ധ്വാനവും ആവശ്യമില്ലല്ലോ? ആയിതീരണമെന്നും,
ചെയ്തു തീർക്കണമെന്നും ആഗ്രഹിച്ച എന്തെല്ലാം കാര്യങ്ങൾ, ഇപ്പോഴും ഓരോരുത്തരുടെയും ഭാവനയിൽ ഉറങ്ങുന്നുണ്ടാകും? സ്വപ്നം കാണുന്നതു തെറ്റല്ല; കണ്ട സ്വപനങ്ങളെ, അവിടെത്തന്നെ ഉറക്കിക്കിടത്തുന്നതാണു തെറ്റ് !

എങ്ങനെയെങ്കിലും ഒരത്ഭുതം സംഭവിച്ചു ജീവിതം മെച്ചപ്പെടാൻ കാത്തിരിക്കുന്നവർ, ഏറെയാണ്. അവരുടെ ഏക ആശ്വാസം, ഇടയ്ക്കിടെ സ്വപ്നം കണ്ടു, ചാരാതാർത്ഥ്യമടയുക എന്നതാണ്. നടക്കാതെ പോകുന്ന കാര്യങ്ങളെ മനസ്സിലിട്ടു താലോലിക്കാനുള്ള മാർഗ്ഗമാകരുതു സ്വപനം. മറിച്ച്, നടത്തിയെ
ടുക്കേണ്ട കാര്യങ്ങൾക്ക് ഊർജ്ജം പകരുന്ന പണിശാലകളാകണം അവ.

കണ്ട സ്വപ്നങ്ങളും, പങ്കുവച്ച സ്വപ്നങ്ങളും, കഴിവിൻ്റെയോ, മികവിൻ്റെയോ, അടയാളങ്ങളല്ല. പൂർത്തീകരിച്ചെടുന്ന സ്വപ്നങ്ങൾ മാത്രമാണ് ഒരാളിൻ്റെ കഴിവുകളുടെ വെളിപ്പെടുത്തൽ. വലിയ സ്വപ്നങ്ങളെക്കുറിച്ചു പറഞ്ഞു നടക്കുന്ന പലരും, ചെറിയ കാര്യങ്ങൾ പോലും, ചെയ്തെടുക്കാത്തവരാണ്. കണ്ട സ്വപ്നങ്ങളുടെ എണ്ണമോ, വണ്ണമോ അല്ല ഒരാളുടെ മികവിൻ്റെ തെളിവ്. മറിച്ച്, പൂർത്തീകരിച്ചതോ, തുടങ്ങി വച്ചതോ ആയ പ്രവൃത്തികൾ മാത്രമാണ്, ഒരാളിൻ്റെ കാഴ്ചപ്പാടുകളുടെയും, കർമ്മോത്സുകതയുടെയും അടയാളപ്പെടുത്തൽ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര