🌹 “ഇന്നത്തെ ചിന്താവിഷയം” 🌹 – 2025 | ജനുവരി 02 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

നമുക്ക് പുനർജനിക്കാൻ ഇടയാകട്ടെ
————————————————————-

ശ്രീ ബുദ്ധൻ അയൽ നാട്ടിലെ രാജാവുമായി സംഭാഷണത്തിലായിരുന്നു. അപ്പോൾ, ഒരു വയോധികൻ ബുദ്ധൻ്റെ അടുത്തെത്തി പറഞ്ഞു: “ഞാൻ അങ്ങയുടെ അനുഗ്രഹം തേടി വന്നതാണ് “. ബുദ്ധൻ അയാളോടു ചോദിച്ചു: “എത്ര വയസ്സായി?” വയോധികൻ പറഞ്ഞു: “നാല് !” ബുദ്ധൻ അയാളുടെ തലയിൽ കൈവെച്ചനുഗ്രഹിച്ചു പറഞ്ഞയച്ചു.

ഇതെല്ലാം വീക്ഷിച്ചു കൊണ്ടിരുന്ന രാജാവ്, ബുദ്ധനോടു ചോദിച്ചു: “നിങ്ങൾ പരസ്പരം കളിയാക്കുകയായിരുന്നുവോ? അയാൾക്കു നാലു വയസ്സോ?” ബുദ്ധൻ പറഞ്ഞു: “ആ ചോദ്യം താങ്കൾക്കു വേണ്ടിയായിരുന്നു. താങ്കൾ ഇത്രയും നേരം എന്നോടു ചോദിച്ചതു മുഴുവൻ, വിഡ്ഢിച്ചോദ്യങ്ങൾ മാത്രമായിരുന്നു. ഞങ്ങൾ പ്രായമായി കണക്കാക്കുന്നത്, ഒരാൾ ഗുരുവിനു മുമ്പിൽ എല്ലാം സമർപ്പിച്ച്, സ്വയം മാറാൻ തീരുമാനിച്ചതിനു ശേഷമുള്ള വർഷങ്ങളാണ്. ആ വയോധികൻ്റെ 70 വർഷവും പ്രയോജനരഹിതമായിരുന്നു. താങ്കളും പുനർജനിക്കാൻ നോക്ക്, എന്നിട്ടു ചോദ്യങ്ങൾ ചോദിക്ക് ”

പ്രായമാകുന്നവരെല്ലാം, വളരണമെന്നില്ല. എല്ലാവർക്കും പ്രായമേറും. എന്നാൽ, വിചിന്തനവും വിവേകവും ഉളളവർ മാത്രമേ, വളർച്ച പ്രാപിക്കൂ. ജീവിച്ചു തീർത്ത ദിനങ്ങളുടെ എണ്ണം നോക്കി, പ്രായവും പക്വതയും അളന്നെടുക്കുന്നതു വിഡ്ഢിത്തമാണ്. തിരുത്തലുകൾക്കും മാറ്റങ്ങൾക്കും വിധേയമാകാത്ത ജീവിതത്തിൽ, ഒരു പരിവർത്തനവും സംഭവിക്കില്ല.

രണ്ടു ദിവസങ്ങൾ ഒരാളുടെ ജീവിതത്തിൽ, വളരെ പ്രധാനമാണ്: ഒന്ന് , അയാൾ ജനിച്ച ദിനം. രണ്ട്, അയാൾ പുനർജനിച്ച ദിനം! മരണശേഷമുള്ള പുനർജന്മത്തെക്കുറിച്ചു ചിന്തിക്കുന്നതിനേക്കാൾ നല്ലത്, ജീവിച്ചിരിക്കുമ്പോൾ, എത്ര തവണ പുനർജനനം സാദ്ധ്യമായി എന്നതാണ് ! അപ്പോൾ, ജീവിതം ആത്മസംതൃപ്തവും, പരോപകാരപ്രദവും ആകും.

പുനർജനിക്കണം: വീണിടത്തു നിന്ന് ; അവഹേളിക്കപ്പെട്ടിടത്തു നിന്ന്; ആത്മവിശ്വാസം തകർന്നിടത്തു നിന്ന്; ഒരു വഴിയും കാണാതെ ഒളിച്ചിരിക്കേണ്ടി വന്നയിടത്തു നിന്ന്; അപകർഷതാ ബോധത്തിൽ നിന്ന്! എത്ര തവണ ഒരാൾ പുനർജനിക്കുന്നുവോ, അത്രയും വിശിഷ്ടവും, വിശുദ്ധവും ആയിരിക്കും, അയാളുടെ ജീവിതം.

സർവ്വേശ്വരൻ സഹായിക്കട്ടെ..

പുതുവർഷം എല്ലാവർക്കും പുനർജനനങ്ങളുടെ വർഷമായിരിക്കട്ടെ..

സന്തോഷവും ഐശ്വര്യവും നിറഞ്ഞ ഒരു പുതു വർഷം എല്ലാവർക്കും നേരുന്നു.

നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര