🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 23 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

സ്വന്തം വ്യക്തിത്വം കാത്തു സൂക്ഷിക്കാൻ ആകട്ടെ
————————————————————————–

കടുവാക്കുഞ്ഞു ജനിച്ചപ്പോൾത്തന്നെ അതിൻ്റെ അമ്മ വിട പറഞ്ഞു. പിന്നീട് ഒരു ആട്ടിൻപറ്റമാണ് അതിനെ വളർത്തിയത്. ആ കൂട്ടത്തിൽച്ചേർന്നു, പുല്ലു മാത്രം തിന്ന്, അതും ഒരു സസ്യഭുക്കായി വളർന്നു. ഒരിക്കൽ ഒരു വയസ്സൻ കടുവ, ആ ആട്ടിൻ പറ്റത്തെ കാണാനിടയായി. കുട്ടത്തിലൊരു കടുവാക്കുട്ടിയെ കണ്ട് അത്ഭുതപ്പെട്ട വയസ്സൻ കടുവ, അതിനെ കോരിയെടുത്തു ദൂരേയ്ക്കു് ഓടി. ഒരു നദിക്കരയിലാണതു ചെന്നു നിന്നത്. നദിയിലെ വെള്ളത്തിനഭി മുഖമായി, അതു കടുവാക്കുഞ്ഞിനെ നിർത്തി.

വെള്ളത്തിലെ പ്രതിബിംബത്തിൽ അന്നാദ്യമായി, കടുവാക്കുഞ്ഞു സ്വന്ത
രൂപം കണ്ടു. തൻ്റെ കണ്ണും മൂക്കും, നഖവും എല്ലാം, ആടുകളിൽ നിന്നും വ്യത്യസ്ഥമാണെന്ന തിരിച്ചറിവിൽ, അന്നു മുതൽ അതു യഥാർത്ഥ കടുവയേപ്പോലെ,
പെരുമാറാൻ തുടങ്ങി.

ഒരാൾ ചെന്നുപെടുന്ന സൗഹൃദങ്ങൾക്കും സാഹചര്യങ്ങൾക്കും, അപ്പുറത്തേക്ക്, അയാൾക്കു വളരാനാകില്ല. താൻ ജീവിക്കുന്ന സാഹചര്യങ്ങളാകും, അയാളുടെ ശാരിരിക, മാനസിക ശേഷിയും മനോഭാവവും തീരുമാനിക്കുക. ഒരാളെ മനസ്സിലാക്കാൻ, അയാളുടെ ഏറ്റവും അടുത്ത അഞ്ചു സുഹൃത്തുക്കൾ ആരൊക്കെ എന്നു തിരിച്ചറിഞ്ഞാൽ മതി. ആ സൗഹൃദ വലയത്തിൻ്റെ സ്വാധീനത്തിൽനിന്നാകും, അയാളുടെ കാഴ്ചപ്പാടുകളും, കർമ്മബോധവും രൂപപ്പെടുക.

ചങ്ങാതിക്കൂട്ടത്തിൻ്റെ നിഷ്ഠകൾക്കും, ശീലങ്ങൾക്കുമനുസരിച്ചു നിൽക്കാത്തവരെല്ലാം, ആ കൂട്ടത്തിൽ നിന്നും നിഷ്ക്കാസനം ചെയ്യപ്പെടും. ആത്മബോധം പോലും പണയം വെച്ച് , അതിൽ തുടരാൻ അത് ആളുകളെ പ്രേരിപ്പിക്കും. താൻ ആരാണെന്നു തിരിച്ചറിയാൻ പോലും അനുവദിക്കാത്ത കൂട്ടുകെട്ടുകളിൽ അകപ്പെട്ടു പോകുന്നതു കൊണ്ടാണ്, അനർഹമായ സ്ഥാനങ്ങളിൽ ആരും അറിയാതെ പലർക്കും ജീവിക്കേണ്ടി വരുന്നത്. സ്വന്തം ജന്മത്തോടു കാണിക്കുന്ന ഏറ്റവും വലിയ അവഹേളനമായിരിക്കും അത്. അതിൽ നിന്നും മോചനം പ്രാപിക്കുന്നവർക്കു മാത്രമേ, തങ്ങളുടെ വ്യക്തിത്വം കാത്തു സൂക്ഷിക്കാൻ ആകൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര