🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 20 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

കെട്ടുകാഴ്ചയാകുന്ന അധികാരം
———————————————-

രാജാവിനെ കാണാൻ, അദ്ദേഹത്തിൻ്റെ ഗുരു എത്തി. നടുത്തളത്തിൽ ഇറങ്ങിച്ചെന്ന്, അദ്ദേഹത്തെ വണങ്ങിയപ്പോൾ, രാജാവു കണ്ട കാഴ്ച, അദ്ദേഹത്തെ അത്ഭുതപ്പെടുത്തി. ഗുരു തൻ്റെ തലയിൽ, ചെരൂപ്പ് എടുത്തു വച്ചിരിക്കുന്നു! രാജാവു ചോദിച്ചു: “അങ്ങ് , കാലിൽ ഇടേണ്ട ചെരുപ്പ് എന്തിനാണു തലയിൽ വച്ചിരിക്കുന്നത് ?”
ഗുരു തിരിച്ചു ചോദിച്ചു: “താങ്കൾ എന്തിനാണ് കിരീടം തലയിൽ വച്ചിരിക്കുന്നത് ? രാജാവു പറഞ്ഞു: “ഞാൻ അധികാരിയായതുകൊണ്ടും, മറ്റുള്ളവരേക്കാൾ ഉന്നതനായതുകൊണ്ടുമാണ് കിരീടം തലയിൽ അണിഞ്ഞിരിക്കുന്നത് !”
ഗുരു ശാന്തനായി പ്രതിവചിച്ചു: “ഞാൻ എല്ലാവരിലും താണവനായതുകൊണ്ടാണ്, തലയിൽ ചെരുപ്പുകൾ വച്ചിരിക്കുന്നത് !”

തനിക്കു സ്ഥാനവും അധികാരവുമുണ്ടെന്നു മറ്റുള്ളവർ മനസ്സിലാക്കത്തക്ക രീതിയിൽ, അവയെ പ്രദർശിപ്പിക്കാനാണ് എല്ലാവർക്കുമിഷ്ടം. സ്ഥാനപ്പേരുകളും അകമ്പടി സേവകരും, വാഹനവ്യൂഹങ്ങളുമെല്ലാം ചേർന്നുള്ള ഒരു പ്രകടനമാകും അങ്ങനെയുള്ളവർ കാഴ്ചവെക്കുക. എല്ലാ സ്ഥാനങ്ങളുടെയും ആത്യന്തിക ലക്ഷ്യം സേവനമാണ്. പക്ഷെ, ഓരോ സ്ഥാനത്തു മിരിക്കുന്നവർ, അവരുടെ സേവനങ്ങളെക്കുറിച്ചു പ്രസംഗിക്കുകയും, അടയാളങ്ങളുടെയും വേഷങ്ങളുടെയും, ആധികാരികതയിൽ മാത്രം വിശ്വസിക്കുകയും ചെയ്യുമ്പോൾ, വാക്കിലും പ്രവർത്തിയിലും വൈരുദ്ധ്യമാണുണ്ടാകുന്നത്.

അധികാരവും സേവനവും രണ്ടു പരസ്പര വിരുദ്ധ മനോഭാവങ്ങളാണ്. സേവനത്തിനു വേണ്ടി അധികാരത്തിൽ എത്തുന്നുവെന്നത് ഒരു തന്ത്രം മാത്രമാണ്. സേവനത്തിനു സ്ഥാനം ആവശ്യമില്ല. സ്ഥാനത്ത് എത്തിയതുകൊണ്ട്, സേവകരായ ഒരു വ്യക്തികളുമില്ല.

സേവനം ചെയ്യാനും, സ്വയം താഴാനും കഴിയുന്ന അധികാരികൾ, സ്ഥാനത്തിൻ്റെ കാലാവധി കഴിഞ്ഞ ശേഷവും ആദരിക്കപ്പെടും. സ്ഥാനത്തെത്താൻ വേണ്ടി സേവക വേഷവും, സ്ഥാനത്ത് എത്തിയ ശേഷം, യജമാനവേഷവും അണിയുന്നവർ, അല്പരും, അപകടകാരികളുമാണ്. അവരെ അകറ്റി നിർത്താൻ നമുക്കാകണം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര