🌹 “ഇന്നത്തെ ചിന്താവിഷയം” 🌹 – 2024 | ജൂലൈ 06 | ശനി ✍ പ്രൊഫസ്സർ എ.വി. ഇട്ടി മാവേലിക്കര

ഒരിക്കൽ നാറാണത്തു ഭ്രാന്തനെ അനുഗമിക്കാൻ ഒരാളെത്തി. അവർ രണ്ടു പേരും കൂടി യാത്ര തിരിച്ചു. ദാഹം തോന്നിയപ്പോൾ, രണ്ടു പേരും കൂടി ഒരു കുടിലിൽ കയറി. വീട്ടമ്മ അവർക്കു കൈക്കുമ്പിളിൽ സംഭാരം ഒഴിച്ചു കൊടുത്തു. അതു കുടിച്ചു ദാഹമകറ്റി, അവർ യാത്ര തുടർന്നു. പിന്നീടവർക്കു ദാഹിച്ചപ്പോൾ, അവരൊരു ചെത്തുകാരനെ കണ്ടുമുട്ടി. അയാൾ അവർക്കു് ഇളം കള്ളു്, പകർന്നു കൊടുത്തു. അതും കുടിച്ച് തൃപ്തരായി അവർ വീണ്ടും യാത്ര തുടർന്നു. പിന്നെയും ദാഹിച്ചപ്പോൾ, നാറാണത്തുഭ്രാന്തൻ, ഒരു മൂശാരിയുടെ ആലയിലാണു കയറിയത്. മൂശാരി അയാളുടെ കൈക്കുമ്പിളിൽ കോരിയൊഴിച്ചത്, തിളച്ചുമറിയുന്ന ലോഹ ദ്രാവകമായിരുന്നു. ഒന്നും സംഭവിക്കാത്തതുപോലെ, അദ്ദേഹം അതകത്താക്കി. പരിഭ്രാന്തനായ ശിഷ്യൻ ജീവനും കൊണ്ടോടി.

അനുഗമനം വെറും ആകർഷണത്തിൻ്റെ പേരിൽ ആകരുത്. തീവ്രമായ അഭിനിവേശത്തിൻ്റെ ഫലമായി വേണം അതു രൂപപ്പെടുവാൻ. കേവലം അനുകരണമല്ല, അനുഗമനം. അത്ഭുതങ്ങളും അതിശയങ്ങളും മാത്രം കണ്ട് ആരുടെയും പുറകെ പോകരുത്. അങ്ങനെയായാൽ, പൊള്ളുന്ന യാഥാർത്ഥ്യങ്ങളെ അഭിമുഖീകരിക്കേണ്ടി വരുമ്പോൾ, പിന്തിരിഞ്ഞോടേണ്ടി വരും.

അകലെ നിന്നു കാണുമ്പോൾ ആരാധന തോന്നുന്ന പലരോടും അടുത്തു കഴിയുമ്പോൾ, അകലാൻ തോന്നിയേക്കാം. അകറ്റി നിർത്തിയിതുന്ന പലരോടും, അടുത്തിടപെട്ടു കഴിയുമ്പോൾ, ആരാധന തോന്നിയെന്നും വരാം. ആരെയും ഒന്നിനെയും മാറി നിന്നു വിലയിരുത്തുകയും വിലയിടുകയും അരുത്. അടുത്തറിഞ്ഞും, ആളറിഞ്ഞും വേണം ആരേയും അനുഗമിക്കുവാൻ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര