🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 04 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

ഉപമകൾക്കും ഉദാഹരണങ്ങൾക്കും അപ്പുറം
——————————————————————

രണ്ടു കൂട്ടുകാർ, എന്തോ ആലോചിച്ചിരുന്ന് ചായ കുടിക്കുകയായിരുന്നു. അദ്യത്തേയാൾ, തൻ്റെ കയ്യിലിരുന്ന കപ്പിലേക്കു നോക്കി നെടുവീർപ്പിട്ടു കൊണ്ടു പറഞ്ഞു: “ജീവിതം ഒരു ചായക്കോപ്പ പോലെയാണ് !” എത്ര ആലോചിച്ചിട്ടും ഒന്നും പിടികിട്ടാതിരുന്ന രണ്ടാമൻ ചോദിച്ചു: “എന്തുകൊണ്ടാണു ജീവിതത്തെ, ചായക്കോപ്പയോടു താൻ ഉപമിച്ചത് ?” മറുപടി പെട്ടന്നായിരുന്നു:
“ഞാനങ്ങനെയൊക്കെ ചിന്തിക്കും. ഞാനൊരു ബുദ്ധിജീവിയാണ് !”

ഉപമകളും ഉദാഹരണങ്ങളും കൊണ്ട് ജീവിതം കരുപ്പിടിപ്പിക്കാനാകില്ല. ഓരോ ജീവിതവും വിഭിന്നമാണു്ണ്. ഒന്നിനെ മറ്റൊന്നിനോടു താരതമ്യപ്പെടുത്താനോ, തുലനം ചെയ്യാനോ സാദ്ധ്യമല്ല. ഓരോരുത്തരും തങ്ങളുടെ ജീവിതം, തങ്ങളുടേതു മാത്രമായ അനുഭവങ്ങളിലൂടെയാണു രൂപപ്പെടുത്തുക. ഒരാൾ സഞ്ചരിക്കുന്ന വഴികളിലൂടെയും, വൈകാരിക അനുഭവങ്ങളിലൂടെയും, വേറൊരാളും സഞ്ചരിക്കുന്നില്ല; സഞ്ചരിക്കാനാകയുമില്ല.

ദാർശനികതയെക്കാളും, ബൗദ്ധീകതയെക്കാളും, പ്രായോഗികതയാണു ജീവിതത്തിനു
പകരിക്കുക. എഴുതിത്തയാറാക്കപ്പെട്ട തിരക്കഥകളിലൂടെ മാത്രം, ജീവിതം മുന്നോട്ടു പോയെന്നു വരില്ല. അന്യരുടെ നിർദ്ദേശങ്ങളും, നിർവചനങ്ങളും അനുസരിച്ചു മാത്രം ജീവിതം മുമ്പോട്ടു കൊണ്ടു പോകുന്നവർ, അവർ അനുഭവിക്കാത്ത അനുഭവങ്ങളിലൂടെ കടന്നു പോകുമ്പോൾ, ആകുലചിത്തരായും, ഭയചകിതരായും തീർന്നുവെന്നു വരാം.

ഓരോരുത്തരുടെയും തനതു ശൈലികളയും സമീപനങ്ങളെയും ബഹുമാനിക്കാൻ നമുക്കാകണം. അനാവശ്യമായ ഉപദേശങ്ങളേക്കാൾ നല്ലത്, അർത്ഥഗർഭമായ നിശബ്ദതയാകും.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര