🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 02 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

സാന്നിദ്ധ്യം പകർന്നു നൽകുന്ന ഊർജ്ജം!
——————————————————————–

ഒരു വീട്ടിലെ അമ്മ ദീർഘനാളായി തളർന്നു കിടപ്പിലായിരുന്നു. പരിചരിക്കാൻ ആരെങ്കിലും എപ്പോഴും വേണം. അധിക നാൾ ഇങ്ങനെ കിടക്കാതിരുന്നെങ്കിൽ എന്ന ചിന്ത അമ്മയ്ക്കും മക്കൾക്കുമുണ്ടായിരുന്നു. ഒരു ദിവസം അമ്മ മരിച്ചു. സംസ്കാരച്ചടങ്ങുകൾ കഴിഞ്ഞു തിരിച്ചെത്തിയപ്പോൾ, കൊച്ചുമകൾ പറഞ്ഞു: “അമ്മൂമ്മ പോയപ്പോൾ, എന്തോ ഒന്നു നഷ്പ്പെട്ടതു പോലെ”. അമ്മൂമ്മയുടെ അസാന്നിദ്ധ്യം സൃഷ്ടിച്ച ശൂന്യത, അവർ ആദ്യമായി അനുഭവിച്ചറിഞ്ഞു!

കാര്യശേഷി മാത്രമല്ല ഒരാളുടെ വിലയറിയാനുളള അടിസ്ഥാന ഘടകം. അയാളുടെ സാന്നിദ്ധ്യം പകർന്നു നൽകുന്ന ഊർജ്ജത്തിന് ചിലപ്പോൾ അയാളുടെ കർമ്മ ശേഷിയേക്കാൾ പ്രചാദനം നൽകുവാൻ കഴിഞ്ഞെന്നു വരാം. ഒരുപകാരവുമില്ലെന്നു കരുതി തഴയപ്പെടുന്നവർ, ഒരു കാലത്ത് സ്വപ്ന വാഹകരായിരുന്നവരായിരിക്കാം. അവരുടെ പ്രസരിപ്പും പ്രവർത്തന ശൈലിയും ഒട്ടേറെപ്പേരിൽ ഉത്സാഹം ജനിപ്പിച്ചിട്ടുമുണ്ടാകും.

ഓരോ സമയത്തും ഒരാൾ പ്രകടിപ്പിക്കുന്ന ചലനശേഷിയും, ക്രീയാത്മകതയും അനുസരിച്ചു മാത്രം, അടുപ്പം നിലനിർത്തുന്നവർക്ക് ഒരു ബന്ധവും ശാശ്വതമാകണമെന്നില്ല. പ്രയോജനത്തിനനുസരിച്ചു മാത്രം ബന്ധങ്ങൾ ഈട്ടിയുറപ്പിക്കുന്നവർ, ലാഭനഷ്ട ക്കണക്കുകളിലൂടെയാകും, ബന്ധങ്ങളുടെ മൂല്യം നിശ്ചയിക്കുക.

ചില ബന്ധങ്ങളുടെ വില ഒരു ത്രാസിലും തൂക്കി നോക്കാവുന്നതല്ല. ഒരാളുടെ സാന്നിദ്ധ്യം എത്ര പ്രസക്തമായിരുന്നു എന്നറിയുന്നത്, അയാളുടെ അസാന്നിദ്ധ്യം സൃഷ്ടിക്കുന്ന ശൂന്യത ബോദ്ധ്യപ്പെടുമ്പോഴാണു്ണ്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര