🌹 “ഇന്നത്തെ ചിന്താവിഷയം” 🌹 – 2024 | നവംബർ 29 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

എന്താണു സ്വപ്ന സാക്ഷാത്ക്കാരം?
———————————————————-

രാജകുമാരിയെ സ്വന്തമാക്കാനുള്ള മല്ല യുദ്ധത്തിനായി രണ്ടു യുവയോദ്ധാക്കൾ പ്രാർത്ഥിച്ചു തയ്യാറായി. രണ്ടു പേരും ഒരേ ദേവൻ്റ ആരാധകരായിരുന്നു. യുദ്ധത്തിൽ ഒരുവൻ ജയിച്ചു. എന്നാൽ, വിജയാഘോഷത്തിനിടെ, ആനയിടഞ്ഞു. വിജയിയായ യുവാവ്, ആനയുടെ ചവിട്ടേറ്റ് തൽക്ഷണം മൃതിയടഞ്ഞു. മല്ലയുദ്ധത്തിൽ പരാജിതനായവൻ രാജകുമാരിയെ വിവാഹം ചെയ്തു.

ബഹളങ്ങളൊക്കെക്കഴിഞ്ഞ്, ആ യുവാവ്, ദേവൻ്റെയടുത്തെത്തി ചോദിച്ചു: “ഞങ്ങൾ രണ്ടു പേരും അങ്ങയുടെ ഭക്തർ. പ്രാർത്ഥിച്ചത് ഒരേ കാര്യവും. പിന്നെന്തു കൊണ്ട് രണ്ടു വിധി?” ദേവൻ പറഞ്ഞു: “നിങ്ങളുടെ രണ്ടു പേരുടെയും ആവശ്യം രണ്ടായിരുന്നു. നിൻ്റെ എതിരാളി പ്രാർത്ഥിച്ചത്, യുദ്ധത്തിൽ ജയിക്കണം എന്നായിരുന്നു. നിൻ്റെ ആവശ്യമോ, രാജകുമാരിയെ വിവാഹം ചെയ്യണമെന്നും ”

സ്വപ്നങ്ങൾക്കു തെറ്റു പറ്റുന്നതെവിടെയാണ് ? മനസ്സിൽ കാണുന്ന ലക്ഷ്യത്തെ, അർത്ഥമറിഞ്ഞു മനസ്സിലാക്കാൻ കഴിയാതെ വരുമ്പോൾ. ഓരോ തെരഞ്ഞെടുപ്പിനു മുമ്പും, മൂന്നു ചോദ്യങ്ങൾ നാം ചോദിക്കണം. എന്താണു സ്വപ്നം? എന്തുകൊണ്ട് ആ സ്വപ്നം? ആ സ്വപ്ന സാക്ഷാത്ക്കാരത്തിലൂടെ എന്തു ചെയ്യും?

തോരണങ്ങളും, ആരവങ്ങളും കാണുമ്പോൾ, പലർക്കും തങ്ങൾ ലക്ഷ്യത്തിലെത്തി എന്നു തോന്നാം. ഒരു പക്ഷെ, യാത്ര പാതി വഴിയിലായിരിക്കും. അർധസ്വപ്നങ്ങൾക്കു മുന്നിൽ അടിയറവു പറയേണ്ടി വരുന്നവരാണ്, സ്വപനങ്ങളില്ലാത്തവരേക്കാൾ, ഹതഭാഗ്യർ.

വിജയത്തിൻ്റെ നിർവചനങ്ങളെല്ലാം ആപേക്ഷികമാണ്. ജയിച്ചുവെന്നു കരുതുന്നവരൊക്കെ, യഥാർത്ഥത്തിൽ തോറ്റവരാകാം. തോറ്റു എന്നു വിധിക്കപ്പെട്ടവരാകും ചിലപ്പോൾ വിജയശ്രീലാളിതർ! എവിടെയെങ്കിലും എത്തിച്ചേരുന്നതല്ല വിജയം. എത്തിച്ചേരുന്ന സ്ഥലത്തു കാഴ്ചവയ്ക്കുന്ന പ്രകടനമാണു
വിജയം. ആഗ്രഹിച്ച പദവിയോ, ജോലിയോ സ്വന്തമാക്കുന്നതല്ല, സ്വന്തമാക്കിയ പദവിയിലെ, കൃത്യ നിർവഹണമാണു് യഥാർത്ഥ സ്വപന സാക്ഷാത്കാരം! അതിനു സർവ്വേശ്വരൻ നമ്മെ സഹായിക്കട്ടെ..

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര