🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 26 | ശനി ✍ പ്രൊഫസ്സർ എ.വി. ഇട്ടി മാവേലിക്കര

മികവും തികവും
——————————-

ഒരു കമ്പ്യൂട്ടർ നിർമാണ കമ്പനി, തങ്ങളുടെ ഉല്പന്നങ്ങളുടെ ഗുണനിലവാരം വർദ്ധിപ്പിക്കുന്നതിനായി, പുതിയൊരു ശ്രംഖലയ്ക്കു് നിർമാണ ചുമതല കൈമാറി. ധാരണാ പത്രത്തിൽ കൃത്യമായ മാനദണ്ഡങ്ങൾ രേഖപ്പെടുത്തിയിരുന്നു. പതിനായിരം എണ്ണത്തിൽ, പരമാവധി മൂന്നെണ്ണത്തിനു കേടു വരാം എന്നായിരുന്നു ധാരണ. നിർമാണം പൂർത്തിയാക്കിയ പതിനായിരം കമ്പ്യൂട്ടറുകളും, അവർ കമ്പനിക്ക് അയച്ചുകൊടുത്തു. ഒപ്പം ഒരു കുറിപ്പും, അവർ വച്ചിരുന്നു: “എന്തിനാണ് കേടുവന്ന മൂന്നു കമ്പ്യൂട്ടറുകൾ നിങ്ങൾ ആവശ്യപ്പെട്ടതെന്ന് അറിയില്ല. എങ്കിലും, ഞങ്ങൾ അവ കൂടി അയച്ചിട്ടുണ്ട്. തിരിച്ചറിയുന്നതിനായി, അവ മൂന്നും, പ്രത്യേകം പായ്ക്കറ്റിൽ വച്ചിരിക്കുന്നു!”

തികവാണു് മികവ് . ചെയ്യുന്ന കാര്യങ്ങളുടെ ഉത്തരവാദിത്തം, അതിലെ മികവിനൊപ്പം, കുറവിലും ഏറ്റെടുക്കാൻ കഴിയുന്നവർക്കാണ് പൂർണ്ണത കൈവരിക്കാനാകുക. മേന്മയുടെ ഉത്തരവാദിത്തം അവകാശപ്പെടാൻ ഏറെ ആളുകൾ കാണും.എന്നാൽ, വീഴ്ചയുടെ ബാദ്ധ്യത അവകാശികളില്ലാതെ അവശേഷിക്കും. ഏറ്റവും ചെറിയ പോരായ്മയും സ്വയം കണ്ടെത്താനും, അവയ്ക്കു പ്രതിവിധി കണ്ടെത്താനും കഴിയുന്നവർക്കു മാത്രമേ മികവിലേക്കു യാത്ര ചെയ്യാനാകൂ. ആദ്യ ദിനത്തിലെ ആസ്മീകതയല്ല, ഒരു മികവും. അനുദിന പ്രയത്നത്തിൻ്റെയും വിട്ടുവീഴ്ചയില്ലായ്മയുടെയും, പരിണിത ഫലമാണത്.

സൂക്ഷ്മതയാണു സമ്പൂർണതയുടെ അടിത്തറ. മികവ്, അർപ്പണത്തിൻ്റെ ഫലവും. എന്തെങ്കിലും, എങ്ങനെയെങ്കിലും ചെയ്യുന്നവരിൽ, ഗുണമേന്മയുടെ കണിക പോലും, കാണുകയില്ല. നിസ്സാര കര്യങ്ങളേപ്പോലും അവഗണിക്കാതിരുന്നെങ്കിലെ പൂർണത കൈവരിക്കാനാകൂ. ഒന്നിനേയും നിസ്സാരമായി കാണാതിരിക്കുക അതിനേറെ ആവശ്യമാണ്.

പ്രതീക്ഷകളെ മറികടക്കുന്നവരാണു പ്രതിഭകൾ. മൂല്യനിർണയ മാനദണ്ഡങ്ങൾ രൂപപ്പെടുന്നത്, ഒരുല്പന്നം നിർമിക്കുന്നവരുടെ നിലവാരത്തേയും, അതുപയോഗിക്കുന്നവർക്ക്, അതേക്കുറിച്ചുള്ള പ്രതീക്ഷകളെയും അടിസ്ഥാനപ്പെടുത്തിയായിരിക്കും. പൊതു നിലവാരത്തിനും, മാർഗരേഖകൾക്കും മുകളിൽ നിൽക്കുക എന്നത് അനിതരസാധാരണമായ പ്രതാജ്ഞാ ബദ്ധതയുളളവർക്കു മാത്രം, കഴിയുന്ന കാര്യമാണ്. തികവ്, മികവിൻ്റെ ഫലമാണ്. അതിന് ഏറെ പ്രയന്തവും അർപണവും ആവശ്യമാണ്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര