🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 19 | ശനി ✍ പ്രൊഫസ്സർ എ.വി. ഇട്ടി മാവേലിക്കര

ആത്മവിശ്വാസമെന്ന കെടാവിളക്കുകൾ
മറ്റുളളവരിൽ കത്തിക്കാൻ ആകട്ടെ..
————————————————————–

താൻ വിരൂപയാണെന്നു കരുതിയിരുന്ന ഒരു പെൺകുട്ടി , ഒരിക്കൽ സൗന്ദര്യ വർധക വസ്തുക്കൾ വില്ക്കുന്ന ഒരു കടയിലെത്തി പറഞ്ഞു: “ദയവായി, എന്തെങ്കിലും കൊണ്ടെന്നെ അലങ്കരിക്കുക. അങ്ങനെയെങ്കിലും, എൻ്റെ വൈരൂപ്യം മാറിക്കിട്ടട്ടെ”

അവർ, ആ കടയിലെ ഏറ്റവും മികച്ച കിരീടം അവളെ ധരിപ്പിച്ചു. കണ്ണാടിയിൽ നോക്കിയ അവൾക്ക് ജീവിതത്തിൽ ആദ്യമായി താൻ സുന്ദരിയാണെന്ന തോന്നലുണ്ടായി. ആ ആത്മവിശ്വാസത്തോടെയാണവൾ അടുത്തുള്ള നൃത്തശാലയിലേക്കു ഓടിക്കയറിയത്. അവളുടെ അതിമനോഹരമായ നൃത്തച്ചുവടുകളിൽ കാണികളാകെ മതിമറന്നു. എല്ലാം കഴിഞ്ഞ് ഒന്നു കൂടി തൻ്റെ സൗന്ദര്യം ആസ്വദിക്കാനായി അവൾ കണ്ണാടിയിൽ നോക്കി. എന്നാൽ, തൻ്റെ തലയിൽ കിരീടം കാണാനില്ല! അവൾ, അതന്വേഷിച്ച് കടയിലെത്തി. അവളോട് അവർ പറഞ്ഞു: “നിങ്ങൾ ഇവിടെ നിന്നോടിപ്പോയപ്പോൾ കിരീടം താഴെ വീണിരുന്നു. അതു ഞങ്ങളുടെ പക്കൽ ഉണ്ട് “.

സ്വന്തം ധാരണകളുടെ അടിമകളാണ് മനുഷ്യർ ഓരോരുത്തരും. നിഷേധാത്മക ചിന്തകളുടെ തടവറയിൽ നിന്നു പുറന്നു വരാത്ത ഒരാൾക്കും, സ്വന്തം വിജയം കെട്ടുപണി ചെയ്യാനാവില്ല. മറ്റുളളവർ എന്തു ചിന്തിക്കുന്നുവെന്നതിനേക്കാൾ പ്രധാനമാണ്, ഒരാൾ സ്വയം എന്തു വിചാരിക്കുന്നു എന്നത്.

ഒരാൾക്ക്, മറ്റൊരാൾക്കു കൊടുക്കാൻ കഴിയുന്ന ഏറ്റവും വിലയേറിയ ഉപഹാരമാണ് ആത്മവിശ്വാസം. മറ്റെല്ലാം കാലപ്പഴക്കത്തിൽ മങ്ങിപ്പോയാലും, ഒരിക്കൽ കൊളുത്തി നൽകിയ ആത്മവിശ്വാസം, ഒരു കെടാവിളക്കായി അയാളോടുകൂടെ എന്നുമുണ്ടാകും!

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര