🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 18 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

വളർച്ചയിലേക്കു നയിക്കുന്ന തിരിച്ചറിയൽ
——————————————————————

തൻ്റെ പ്രഭാഷണത്തിൽ, ഗഹനമായ വിഷയങ്ങളെക്കുറിച്ചു പ്രതിപാദിച്ചുകൊണ്ടിരുന്ന ഗുരുവിനോട് ഒരു ശ്രോതാവു പറഞ്ഞു: “എനിക്ക് താങ്കൾ പറയുന്ന പല കാര്യങ്ങളും മനസ്സിലാകുന്നില്ല. ഞാൻ എങ്ങനെ ജീവിക്കണം എന്നതിന് ലളിതമായ ഉദാഹരണങ്ങളിലൂടെ ഉത്തരം നൽകാമോ?”

ഗുരു പറഞ്ഞു: “ഉറുമ്പിനെപ്പോലെയും, നീർക്കാക്കയെപ്പോലെയും, ചേർമീനെപ്പോലെയും ജീവിക്കുക. പഞ്ചസാരയും മണലും കൂട്ടിക്കലർത്തിയിട്ടാലും, ഉറുമ്പു്, അതിൽ നിന്നു്, പഞ്ചസാര മാത്രമേ ശേഖരിക്കൂ. നീർക്കാക്ക വെള്ളത്തിൽ മുങ്ങിക്കിടന്നാലും, വെളളത്തിൽ നിന്നു പൊങ്ങുമ്പോൾ, അതു് വെള്ളമെല്ലാം കുടഞ്ഞു കളയും. ചേർമീൻ ചെളിയിൽ താമസിച്ചാലും, അതിൻ്റെ ദേഹം ചെളി പറ്റാതെ, എപ്പൊഴും തിളങ്ങിക്കൊരിക്കും!”

സാദ്ധ്യതകൾ പൊതുവും, തെരഞ്ഞെടുപ്പു തികച്ചും വ്യക്തിപരവും ആണ്. അവനവൻ്റെ വഴികൾ, അവനവൻ തന്നെ തെരഞ്ഞെടുക്കണം. ശരിയും തെറ്റും തിരിച്ചറിയാനായെങ്കിലേ അതിനു കഴിയൂ. അവിടെയാണ് യഥാർത്ഥ വളർച്ച ആരംഭിക്കുന്നത്.

ഒരുമിച്ചു ജീവിക്കുന്നവർക്കെല്ലാം ഉള്ളത് ഒരേ അഭിരുചികളും, അഭീഷ്ടങ്ങളും ആയിരിക്കണമെന്നില്ല. തനതു ലക്ഷ്യങ്ങളുടെ സാധൂകരണത്തിനു വേണ്ടിയുള്ള അന്വേഷണവും കണ്ടെത്തലുമാകണം ഓരോരുത്തരുടെയും ജീവിത ലക്ഷ്യം.

ഒരാൾ എന്തു തെരഞ്ഞെടുക്കുന്നു എന്നത് അയാളുടെ താൽപര്യം എന്താണെന്നതിലും, അയാൾ അത് എത്രമാത്രം ശേഖരിക്കുന്നുവെന്നത് അയാളുടെ ആത്മനിയന്ത്രണത്തിലും അടിസ്ഥാനപ്പെട്ടിരിക്കുന്നു. ശരിയായ തിരിച്ചറിയാലാണതിന് ഒരാളെ സഹായിക്കുന്നത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര