🌹 “ഇന്നത്തെ ചിന്താവിഷയം” 🌹 – 2024 | ഒക്ടോബർ 17 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

സ്വതന്ത്രമായി വളരാനാകട്ടെ, വളർത്താനാകട്ടെ
——————————————————————————

വെള്ളത്തിന് സ്വന്തമായ ആകൃതിയില്ല. ഏതു പാത്രത്തിൽ അതിരിക്കുന്നുവോ, അതിൻ്റെ ആകൃതി വെള്ളം സ്വയം സ്വീകരിക്കും. തങ്ങൾ വളർന്നു വരുന്ന സാഹചര്യങ്ങളുടെ സ്വാധീനത്തിലായിരിക്കും ഓരോരുത്തരും രൂപപ്പെടുക. ഒരാൾ എന്തിനോടൊക്കെ തദാത്മ്യം പ്രാപിച്ചു വളരുന്നുവോ, അവയോടെല്ലാം ചോദ്യം ചെയ്യാനാവാത്ത ഒരു അഭിനിവേശവും, ആവേശവും അയാളിൽ രൂപപ്പെടുക, സ്വാഭാവികമാണ്. അവ മാത്രമാണ് ശരി എന്ന മിഥ്യാധാരണയിൽപ്പോലും, ആയാൾ എത്തിച്ചേർത്തുവെന്നു വന്നേക്കാം.

ഒരാൾ വളർന്നു വരുന്ന സാഹചര്യങ്ങളുടെ വളർച്ചാ സാദ്ധ്യത ഉറപ്പു വരുത്തേണ്ട ബാദ്ധ്യത, അയാളെ വളർത്തുന്നവർക്കുണ്ട് . വീടിൻ്റെ നാലുചുവരുകളുടെ സംരക്ഷണവലയങ്ങൾക്കുള്ളിൽ മാത്രം വളരുന്നവർക്ക് , അതിൽ നിന്നു വ്യത്യസ്ഥമായ ഒന്നിനേയും അഭിമുഖീകരിക്കാനുള്ള ശേഷി ഉണ്ടാകണമെന്നില്ല: അപകടങ്ങളെ മാത്രമല്ല, അപരിചിതരെപ്പോലും.

ക്ലാസ്സ് മുറികളുടെ നാലു ചുവരുകൾ മാത്രമല്ല, കലാലയം. ചുറ്റുമതിലുകൾക്കകത്തുള്ള പരിസരത്തെ മാത്രം വിളിക്കേണ്ട പേരല്ല
‘ക്യാമ്പസ് ‘,എന്നത്. ഓരോ കലാലയവും സൃഷ്ടിക്കുന്ന വിദ്യാഭ്യാസ ലോകത്തെ
മുഴുവനായി സൂചിപ്പിക്കേണ്ട പദങ്ങളാണവ.
പുസ്തകങ്ങൾക്കകത്ത് അറിവുണ്ട് ; പുസ്തകങ്ങൾക്കപ്പുറത്ത് അനുഭവങ്ങളും. കേവല അറിവിൻ്റെ തടവറയിൽ നിന്ന് , അനുഭവങ്ങളുടെ വിശാല ലോകത്തേക്കുള്ള വഴിവെട്ടിത്തുറക്കലാകണം ഓരോ ക്യാമ്പസ് മുറിയും നിർവഹിക്കുന്ന ദൗത്യം. തളച്ചിടപ്പെടുന്നവയെല്ലാം തളരും; തുറന്നുവിടപ്പെടുന്നവയെല്ലാം സ്വന്തമായ ആകാശം കണ്ടെത്തി വളരും.