🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 24 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

നേർവഴിയിലൂടെ സഞ്ചരിക്കാൻ ആകട്ടെ
—————————————————————-

നാളുകളായി നാട്ടുകാർ അന്വേഷിച്ചിരുന്ന മോഷ്ടാവിനെ ഒരു നാൾ അവർ കരിമ്പിൻ തോട്ടത്തിൽ കണ്ടെത്തി. പക്ഷെ, വളരെ വേഗം അയാൾ അവരുടെ കണ്ണുവെട്ടിച്ച് കടന്നു കളഞ്ഞു. ജനം പിറകെ ഓടിയെങ്കിലും, അയാൾ വളരെ വേഗം ഓടി അടുത്തുള്ള പുഴയുടെ തീരത്തെത്തി. അരോ ഉണ്ടാക്കിയ ഒരടുപ്പിൽ, കുറെ ചാരം കിടക്കുന്നതു കണ്ട കള്ളൻ, അത് തൻ്റെ ദേഹം മുഴുവൻ വാരിപ്പൂശി. ഓടി വന്ന ജനക്കൂട്ടം അയാളെ കണ്ട് തപസ്സിരിക്കുന്ന ഏതോ സന്യാസിയാണെന്നു കരുതി അയാളെ തൊഴുതു മടങ്ങി!

പരിവേഷങ്ങളേയല്ല, യാഥാർത്ഥ്യങ്ങളെയാണു നാം അംഗീകരിക്കണ്ടതും ആദരിക്കേണ്ടതും. ആകാരസാദൃശ്യം കൊണ്ടും, രൂപഭംഗി കൊണ്ടും, ഒരാൾക്കും ഏറെക്കാലം മറ്റൊരാളാകാൻ കഴിയില്ല. നമ്മുടെ മുമ്പിൽ പ്രത്യക്ഷപ്പെടുന്ന പല അത്ഭുത പ്രതിഭാസങ്ങളെയും കാര്യമായി നിരീക്ഷണ വിധേയമാക്കിയാൽ അവയുടെ പുറംപൂച്ച് വെളിയിൽ വരും.

അടിസ്ഥാനപരമായ ഒരു മാറ്റവും ഒരു നിമിഷം കൊണ്ടുണ്ടാകുന്നതല്ല. ഉറച്ച തീരുമാനവും, കർശന നിഷ്ഠയും അതിനാവശ്യമാണ്. സ്വതന്ത്രമായ തീരുമാനങ്ങളിലൂടെയല്ലാതെ, സാഹചര്യങ്ങളുടെ സമ്മർദ്ദം കൊണ്ടു മാത്രം നന്നാകാൻ ശ്രമിക്കുന്നവർക്ക് അധികകാലം പിടിച്ചു നിൽക്കാനാകില്ല. സ്ഥിരതയിലാണ് സ്വഭാവത്തിൻ്റെ ദൃഢത തീരുമാനിക്കപ്പെടുക.

കള്ളനാണയങ്ങൾ കൈമാറാൻ കഴിയുന്ന ക്രയവിക്രയ കേന്ദ്രങ്ങളിലല്ല യാഥാർഥ്യത്തെ അന്വേഷിക്കേണ്ടതു്ത്. സത്യം എല്ലായിടത്തും കൂടി സഞ്ചരിക്കില്ല. തിരക്കൊഴിഞ്ഞ നേർവഴി മാത്രമാകും അതിൻ്റെ സഞ്ചാരപഥം. ആ വഴിയിലൂടെ മാത്രം സഞ്ചരിക്കാൻ നമുക്കുമാകട്ടെ

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര