🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 09 | തിങ്കൾ ✍ പ്രൊഫസ്സർ എ.വി. ഇട്ടി മാവേലിക്കര

കാര്യശേഷിയില്ലാത്തവർക്ക്
സഹായത്തിൻ്റെ കരം നീട്ടിക്കൊടുക്കാൻ ആകട്ടെ
———————————————————————————————————-

‘ബക്കറ്റ് ലിസ്റ്റ് ‘ എന്ന ചലച്ചിത്രം, ഒരാതുരാലയത്തിൽ, ഒരേ മുറി പങ്കിടുന്ന രണ്ടു രോഗികളെ സംബന്ധിക്കുന്ന കഥയാണ് . ഒരാൾ ദരിദ്രനും, മറ്റേയാൾ സമ്പന്നനും. ദരിദ്രൻ എന്തൊക്കയോ, ഒരു പേപ്പറിൽ കുത്തിക്കുറിക്കുന്നതും, പിന്നീടതു ചുരുട്ടിക്കൂട്ടി ചവറ്റുകുട്ടയിലേക്കു വലിച്ചെറിയുന്നതും ധനീകൻ കണ്ടു. അയാൾ കാണാതെ, അതു പരതിയെടുത്തു വായിച്ച ധനീകൻ്റെ കണ്ണുകൾ നിറഞ്ഞു. പൂർത്തീകരിക്കാൻ കഴിയാതെ പോയ തൻ്റെ കൊച്ചു കൊച്ചാഗ്രഹങ്ങളുടെ നീണ്ട പട്ടികയാണ് ദരിദ്രൻ ആ കടലാസ്സിൽ കുത്തിക്കുറിച്ചിരുന്നത്.

ആഗ്രഹങ്ങളും, അത്യാഗ്രഹങ്ങളും വരെ നേടിയെടുക്കാനാകുന്നവരുടെ ഇടയിൽ, അടിസ്ഥാന ആവശ്യങ്ങൾ പോലും നിറവേറ്റാനാകാതെ മൺമറയുന്നവർ ഏറെയാണ്. പൂർത്തീകരിക്കപ്പെട്ട മോഹങ്ങൾ മാത്രമല്ല, പൂർത്തീകരിക്കാനാകാതെ പോയ സ്വപ്നങ്ങളും ഒരാളുടെ ജീവിതാഭിലാഷങ്ങളുടെ അളവുകോലാണ്.
ആഗ്രഹങ്ങളുടെ പട്ടിക ഒന്നൊന്നായി വെട്ടിപ്പിടുച്ചു മുന്നേറുന്നതിനിടയിൽ, ഒരാഗ്രവും സഫലീകരിക്കാനാകാതെ നട്ടം തിരിയുന്നവരുടെ കാര്യം അവഗണിച്ചു പോകാൻ നമുക്കിടയാകരുത്.

കണ്ണിൽക്കണ്ടതെല്ലാം കൈക്കലാക്കി എന്നതിനേക്കാൾ, കാര്യശേഷിയില്ലാത്തവക്ക്, സഹായത്തിൻ്റെ കരം നീട്ടിക്കൊടുക്കാൻ ആയി എന്നതാകും കണ്ണടയുന്നതിനു മുമ്പായി നമുക്കു ചെയ്യാൻ കഴിയുന്ന വലിയ സുകൃതം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര