🌹 “ഇന്നത്തെ ചിന്താവിഷയം” 🌹 – 2024 | സെപ്റ്റംബർ 08 | ഞായർ ✍ പ്രൊഫസ്സർ എ.വി. ഇട്ടി മാവേലിക്കര

വൈദഗ്ധ്യം മാത്രം പോരാ, വകതിരിവും വേണം
——————————————————————————-–

ഒരു മീൻ പിടുത്തക്കാരൻ നല്ലൊരു പാട്ടു കാരനും കൂടിയായിരുന്നു. ഒരു ദിവസം, അയാൾ തൻ്റെ ഓടക്കുഴലും വലയുമായി വള്ളത്തിൽ കായലിലേക്കിറങ്ങി. വല വെളളത്തിലിട്ടതിനു ശേഷം, അയാൾ ഓടക്കുഴലെടുത്ത്‌ മനോഹരമായി വായിക്കാൻ തുടങ്ങി. തൻ്റെ ഓടക്കുഴൽ സംഗീതം കേട്ട്‌ മീനുകൾ നൃത്തം ചെയ്തു വന്ന് വലയിൽ കയറും എന്നാണയാൾ ചിന്തിച്ചത്. ഏറെ നേരം ഓടക്കുഴൽ വായിച്ചിട്ടും ഒരു മീനും വന്നില്ല. അപ്പോൾ അയൾ വലയെടുത്ത്‌ ആഞ്ഞു വീശി. വലിച്ചു കയറ്റിയപ്പോൾ വല നിറയെ പിടയ്ക്കുന്ന മീനുകൾ. അയാൾ പറഞ്ഞു: “നിങ്ങൾ തലതിരിഞ്ഞ ജീവികളാണ് . ഞാൻ ഓടക്കുഴൽ വായിച്ചപ്പോൾ നിങ്ങൾ നൃത്തം വച്ചില്ല. പക്ഷേ, ഇപ്പാൾ വലയിലായപ്പോൾ, നൃത്തം ചെയ്യുന്നു”.

ഫലസിദ്ധിക്ക് വൈദഗ്ധ്യം മാത്രം പോരാ, വകതിരിവും ആവശ്യമാണ്. കാര്യക്ഷമത മാത്രം പോരാ, പ്രയോഗക്ഷമതയും ഉണ്ടാകണം. ഓരോ ശേഷിയും സമർത്ഥമായി ഉപയോഗിക്കുക എന്നതിന് സന്ദർഭോചിതമായും, സമയോചിതമായും ഉപയോഗിക്കുക എന്നും കൂടി അർത്ഥമുണ്ട് . ഓരോ കഴിവും എവിടെ എങ്ങനെ പ്രയോഗിക്കപ്പെടുന്നു എന്നിടത്താണ് പ്രയോജനകരമായ ഫലമുണ്ടാകുന്നതു്. എല്ലാ കഴിവും എല്ലായിടത്തും പ്രയോജനപ്പെടണമെന്നില്ല. വ്യത്യസ്ഥ കഴിവുകളുള്ളതു തല്ലതാണ്. പക്ഷെ, ഉള്ള കഴിവുകൾ പരമാവധി വർദ്ധിപ്പിക്കുക എന്നത് അതിനേക്കാൾ ഏറെ അഭികാമ്യവും.

കൈവശമുള്ള ആയുധങ്ങളുടെ ശേഷിയല്ല, ഉള്ള ആയുധങ്ങളുടെ കാര്യക്ഷമമായ ഉപയോഗമാണ് നേട്ടങ്ങൾക്കു വഴിയൊരുക്കുന്നത്. ജീവിത വിജയത്തിന്, വൈദഗ്ധ്യം മാത്രം പോരാ, വകതിരിവും വേണം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര