🌹 “ഇന്നത്തെ ചിന്താവിഷയം” 🌹 – 2024 | ഓഗസ്റ്റ് 20 | ചൊവ്വ ✍ പ്രൊഫസ്സർ എ.വി. ഇട്ടി മാവേലിക്കര

ആന്തരീകതയാണു മുഖ്യം
——————————————-

ഒരു ഗുരുവും തൻ്റെ ശിഷ്യരും കൂടി, വനത്തിലൂടെ നടക്കുകയായിരുന്നു. കുറച്ചു ദൂരം ചെന്നപ്പോൾ, മരങ്ങൾ മുറിച്ചു മാറ്റുന്നത് അവർ ശ്രദ്ധിച്ചു. എന്നാൽ, ആരും ഒന്നു നോക്കുക പോലും ചെയ്യാതെ, ഒരു വലിയ മരം തലയെടുപ്പോടെ അവിടെ നിൽപുണ്ടായിരുന്നു. ശുരു ശിഷ്യരോടു ചോദിച്ചു: “അവർ എന്തുകൊണ്ട് ആ മരം മുറിക്കുന്നില്ല?” ശിഷ്യർ അപ്പോഴാണതു ശ്രദ്ധിച്ചത്. ആ ഒറ്റ മരം മതിയാകുമായാരുന്നു ഏതാവശ്യത്തിനും. അവർ മരം മുറിക്കുന്നവരോടു കാരണമന്വേഷിച്ചു. അവർ പറഞ്ഞു: ” ആ മരം ഒന്നിനും കൊള്ളില്ല. ഉള്ളു പൊള്ളയാണ്. യാതൊരുപ്പുമില്ല. അതു കൊണ്ടന്തുണ്ടാക്കിയാലും, അതു വേഗം നശിച്ചുപോകും. വിറകാക്കിയാൽ കത്തില്ല. പുകയുക മാത്രമേയുള്ളു”.

ആകർഷണീയതല്ല, ആന്തരീകതയാണു പ്രധാനം. പുറമേ കാണുന്നതല്ല, അകമേയുള്ളതാണ് മുഖ്യം.എല്ലാ വ്യക്തികൾക്കും വസ്തുക്കൾക്കും, അവരുടേതായ / അവയുടേതായ, തനിമയും താലന്തും ഉണ്ടായിരിക്കും. ലാഭനഷ്ടക്കണക്കുകൾ നോക്കി മാത്രം ബന്ധങ്ങൾക്കു വിലയിടുരത്. പുറമേ കാണുന്ന അലങ്കാരങ്ങളും ആഡംബരങ്ങളും അല്ല, വിലയിരുത്തലിനാധാരമാക്കേണ്ടത്.
ഉള്ളു പൊളളയാണെന്നങ്കിൽപ്പിന്നെ, പുറമേയുള്ളതിനെന്തു വില? ലോകം എഴുതിത്തള്ളിയ പലരും, പിൽക്കാലത്ത് തങ്ങളുടെ സംഭാവനകളാൽ ലോകത്തെ അത്ഭുതപ്പെടുത്തിയിട്ടുണ്ട് എന്നത് മറക്കാതിരിക്കാം.

കച്ചവട താൽപര്യങ്ങൾക്കു മുമ്പിൽ, പണയപ്പെടുത്തേണ്ടതല്ല, ധീഷണതയും ധീരതയും. ഇഷ്ടാനിഷ്ടങ്ങളും ചിന്താഗതികളും സ്വന്തമായുണ്ടാകണം. മറ്റുള്ളവരുടെ മനസ്സിൽ ഇടം നേടാനുള്ള തത്രപ്പാടിനിടയ്ക്ക് സ്വന്തം മനസ്സും മജ്ജയും നഷ്ടപ്പെടുത്തരുത്.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര