🌹 ചിന്താ പ്രഭാതം 🌹 – 2024 | സെപ്റ്റംബർ 30 | തിങ്കൾ ✍ ബേബി മാത്യു അടിമാലി

കൂട്ടുകാരേ,

ഇന്ന് ഞാൻ സ്നേഹത്തേക്കുറിച്ചാണ് എഴുതുന്നത്. എന്താണ് സ്നേഹം ? എങ്ങിനെയായിരിക്കണം സ്നേഹം ?

നമ്മൾ ഹൃദയത്തിൽ ഒരാൾക്ക് നൽകപ്പെടുന്ന സ്ഥാനമാണ് സ്‌നേഹത്തിന്റെ അടയാളം. സ്‌നേഹിക്കുന്നവരിലേക്ക് ഓടിയെത്താൻ മനസ്സ് കൊതിക്കുന്നില്ലെങ്കിൽ അതിനർത്ഥം സ്‌നേഹത്തിന്റെ വില നമുക്ക് മനസ്സിലായിട്ടില്ല എന്നാണ്. സ്‌നേഹിക്കുന്നവരെയോർത്ത് തന്നെത്താൻ മറക്കുന്നതാണ് യഥാർത്ഥ സ്‌നേഹം. ലാഭനഷ്ടങ്ങളെ കുറിച്ച് അത് ചിന്തിക്കുക പോലുമില്ല. കൂട്ടിയും കിഴിച്ചും ലഭിക്കുന്ന ലാഭനഷ്ടമല്ല സ്‌നേഹം. ലാഭനഷ്ടങ്ങളൊക്കെ കണക്കു കൂട്ടി നഷ്ടമൊന്നും വരാതെ ലാഭം മാത്രം കിട്ടണമെന്ന് വിചാരിച്ച് പരസ്പരം അഭിനയിക്കുന്നതല്ല സ്‌നേഹം.

സ്വന്തം താൽപര്യങ്ങൾ ത്യജിച്ച് , ചിലപ്പോൾ ഒട്ടേറെ സഹനങ്ങളേറ്റുവാങ്ങി സ്‌നേഹിക്കുന്നവർക്ക് വേണ്ടി ജീവിക്കുന്നതാണ് സ്‌നേഹം കൊണ്ട് ലഭിക്കേണ്ട ആത്മസംതൃപ്തി. ഉള്ളുതുറന്ന് സംസാരിക്കുവാനും ഉള്ളിലൊന്നും മറച്ചു വെക്കാതിരിക്കാനും സാധിക്കുന്നത് സ്‌നേഹിക്കുന്നവരുടെ മുമ്പിൽ മാത്രമാണ്.

സന്തോഷാശ്രുക്കൾ മാത്രമല്ല , സന്താപത്തിന്റെ കണ്ണീരും അവരൊപ്പിയെടുക്കും. സ്വന്തമെന്നു കരുതുന്ന സ്‌നേഹത്തിന്റെ മുമ്പിൽ വലിപ്പചെറുപ്പമുണ്ടാവുകയില്ല. കുറച്ചിലോ വേദനയോ അപമാനമോ അസൂയയോ ഒന്നുമുണ്ടാവുകയില്ല.
കടിച്ചമർത്തലുകളും മറച്ചുവെക്കലുകളുമുണ്ടാവുകയില്ല. പകരം തലോടലുകളും ആശ്വസിപ്പിക്കലും കൊഞ്ചലുകളും കുസൃതികളും പരിഭവങ്ങളും പരിദേവനങ്ങളും പൊട്ടിച്ചിരികളും പൊട്ടിക്കരയലുകളും അവിടങ്ങളിൽ നിറഞ്ഞു നിൽക്കും.

അങ്ങിനെ ഉള്ളുതുറന്ന് സ്നേഹിക്കുവാൻ നമ്മുടെ മനസ്സുകളെ പരുവപ്പെടുത്തുവാൻ നമുക്ക് സാധിക്കട്ടെ.

ഒത്തിരി ഇഷ്ടത്തോടെ……🙏

🙏 ശുഭദിനാശംസകൾ 🙏

ബേബി മാത്യു അടിമാലി