📱വാർത്തകൾ ഒറ്റനോട്ടത്തിൽ📱 – 2024 | ഓഗസ്റ്റ് 20 | ചൊവ്വ ✍ കപിൽ ശങ്കർ

🔹ക്രിമിനലുകള്‍ നിയന്ത്രിക്കുന്ന മേഖലയാണ് മലയാള സിനിമയെന്നും, അടിമുടി സ്ത്രീ വിരുദ്ധതയാണ് മലയാള സിനിമാ മേഖലയിലെന്നും ജസ്റ്റിസ് ഹേമ കമ്മിറ്റി റിപ്പോര്‍ട്ട്. സിനിമാ മേഖലക്ക് പുറമേയുള്ള തിളക്കം മാത്രമേയുള്ളൂവെന്നും നടിമാര്‍ക്ക് അവസരം ലഭിക്കാന്‍ വിട്ടുവീഴ്ചയ്ക്ക് തയ്യാറാകേണ്ടി വരുന്നുവെന്നും റിപ്പോര്‍ട്ടില്‍ പരാമര്‍ശിക്കുന്നുണ്ട്. വനിതാ പ്രൊഡ്യൂസര്‍മാരെ വരെ സംവിധായകരും നടന്‍മാരും അപമാനിക്കുന്ന സംഭവങ്ങളുണ്ട്. മലയാള സിനിമ നിയന്ത്രിക്കുന്നത് മാഫിയ സംഘമാണ്. മലയാള സിനിമാ മേഖലക്ക് ഒന്നാകെ അപമാനമാവുകയാണ് ജസ്റ്റിസ് ഹേമ കമ്മിറ്റി പുറത്തുവിട്ട ഞെട്ടിക്കുന്ന വെളിപ്പെടുത്തലുകള്‍.
രാത്രി കാലങ്ങളില്‍ ഒറ്റക്ക് താമസിക്കുന്ന നടിമാരുടെ വാതിലില്‍ മുട്ടും, വാതില്‍ തുറന്നില്ലെങ്കില്‍ ശക്തമായി ഇടിക്കും. സഹകരിച്ചില്ലെങ്കില്‍ റീടേക്കുകള്‍ എടുപ്പിച്ച് ബുദ്ധിമുട്ടിക്കും. വഴിവിട്ട കാര്യങ്ങള്‍ ചെയ്യാന്‍ നിര്‍ബന്ധിക്കുന്നത് സംവിധായകനും നിര്‍മാതാക്കളും. സഹകരിക്കുന്നവരെ വിശേഷിപ്പിക്കുന്നത് കോപ്പറേറ്റിംഗ് ആര്‍ട്ടിസ്റ്റെന്നാണ്. ലൈംഗിക ആവശ്യങ്ങള്‍ക്ക് വഴങ്ങാത്തവരെ പ്രശ്‌നക്കാര്‍ എന്ന് മുദ്രകുത്തി സിനിമയില്‍ നിന്ന് ഒഴിവാക്കുകയും അവരുടെ കുടുംബങ്ങളെ പോലും ഭീഷണിപ്പെടുത്തുകയും ചെയ്യും. അവസരം ലഭിക്കാന്‍ നടിമാര്‍ വഴങ്ങിക്കൊടുക്കേണ്ടി വരുന്നു. ജൂനിയര്‍ ആര്‍ട്ടിസ്റ്റിന്റെ ജോലിക്ക് സമയപരിധി ഇല്ല, ടോയ്‌ലറ്റില്‍ പോകാന്‍ പോലും അനുവദിച്ചിരുന്നില്ല. കൃത്യമായ വേതനമില്ല. തുണി മറ സൃഷ്ടിച്ച് മൂത്രമൊഴിക്കേണ്ട, വസ്ത്രം മാറേണ്ട അവസ്ഥ. അതിക്രമം കാട്ടിയ പലരും ഉന്നതരെന്ന് മൊഴി. മലയാള സിനിമയെ നിയന്ത്രിക്കുന്നത് 13 പേര്‍. ക്രിമിനല്‍വത്ക്കരിക്കപ്പെട്ട മലയാള സിനിമയുടെ ക്രൂരവും വികൃതവുമായ മുഖമാണ് ജസ്റ്റിസ് ഹേമ കമ്മിറ്റി റിപ്പോര്‍ട്ടിലൂടെ തെളിഞ്ഞുവന്നത്. മലയാള സിനിമയിലെ ലൈംഗികാതിക്രമത്തെക്കുറിച്ചുള്ള വെളിപ്പെടുത്തല്‍ കേട്ട് കമ്മിറ്റി തന്നെ ഞെട്ടിപ്പോയെന്ന് റിപ്പോര്‍ട്ടില്‍ പറയുന്നു.

🔹വയനാട്ടിലെ ഉരുള്‍പൊട്ടല്‍ ദുരിതബാധിതര്‍ക്ക് സര്‍ക്കാര്‍ അനുവദിച്ച അടിയന്തര ധനസഹായമായ 10,000 രൂപയില്‍ നിന്നും വായ്പ തിരിച്ചടവ് ഈടാക്കിയ കേരള ഗ്രാമീണ്‍ ബാങ്കിനെതിരെ മനുഷ്യാവകാശ കമ്മീഷന്‍ സ്വമേധയാ കേസെടുത്തു. ജില്ലാ കളക്ടറും കേരള ഗ്രാമീണ്‍ ബാങ്ക് ചൂരല്‍മല ബ്രാഞ്ച് മാനേജരും ഇക്കാര്യം പരിശോധിച്ച് ഒരാഴ്ചക്കകം വിശദമായ റിപ്പോര്‍ട്ട് സമര്‍പ്പിക്കണമെന്ന് കമ്മീഷന്‍ ജുഡീഷ്യല്‍ അംഗം കെ ബൈജുനാഥ് ആവശ്യപ്പെട്ടു.

🔹കെഎസ്ആര്‍ടിസി ബസ് ഡ്രൈവര്‍ക്ക് യുവാവിന്റെ മര്‍ദ്ദനം. കോഴിക്കോട് മാങ്കാവില്‍ കാറിന് സൈഡ് നല്‍കിയില്ലെന്ന് ആരോപിച്ചാണ് കെഎസ്ആര്‍ടിസി ഡ്രൈവറെ മര്‍ദിച്ചത്. കോഴിക്കോട് ഡിപ്പോയിലെ ഡ്രൈവര്‍ക്കാണ് മര്‍ദ്ദനമേറ്റത്. മര്‍ദ്ദനമേറ്റ കെഎസ്ആര്‍ടിസി ഡ്രൈവര്‍ സുബ്രഹ്‌മണ്യനെ ബീച്ച് ആശുപത്രിയില്‍ പ്രവേശിപ്പിച്ചു. പാലക്കാട് നിന്നും കോഴിക്കോടിന് വരികയായിരുന്ന കെഎസ്ആര്‍ടിസി ബസ് തടഞ്ഞ് നിര്‍ത്തിയാണ് യുവാവ് അക്രമം നടത്തിയത്.

🔹നാടിനെ ഏകീകരിക്കാന്‍ സാഹിത്യത്തിനും കലയ്ക്കും കഴിയുമെന്ന് ഗോവ ഗവര്‍ണര്‍ പി എസ്. ശ്രീധരന്‍ പിള്ള. ബഹറിന്‍ കേരളീയ സമാജം പ്രവാസി കുടുംബ സംഗമമായ ‘ഹാര്‍മണി 2024’ ല്‍ പ്രസംഗിക്കുകയായിരുന്ന അദ്ദേഹം. കാലദേശങ്ങളെ അതിജീവിക്കാന്‍ സാഹിത്യത്തിനു കഴിയുമെന്നും രാജ്യത്തെ സാമ്പത്തികമായി മുന്നോട്ടു നയിക്കുന്നതില്‍ പ്രവാസികള്‍ വഹിക്കുന്ന പങ്കുവലുതാണെന്നും ശ്രീധരന്‍ പിള്ള പറഞ്ഞു. ബഹറിനില്‍ അധ്വാനിച്ചു ജീവിതം വിജയകരമാക്കി കുടുംബത്തിനും നാടിനും കൈത്താങ്ങായവരാണ് ബഹറിന്‍ പ്രവാസികളെന്ന് മന്ത്രി റോഷി അഗസ്റ്റിന്‍ ഉദ്ഘാടന പ്രസംഗത്തില്‍ പറഞ്ഞു. വയനാട്ടിലെ ദുരിതത്തിനു പരിഹാരം കാണാന്‍ കേന്ദ്ര സര്‍ക്കാരില്‍നിന്ന് ഇപ്പോഴാണു സഹായം കിട്ടേണ്ടതെന്നും കിട്ടേണ്ട സമയത്തു സഹായം കിട്ടണമെന്നും ചടങ്ങില്‍ പങ്കെടുത്ത സാഹിത്യകാരന്‍ ടി. പദ്മനാഭന്‍ പറഞ്ഞു.

🔹ലഹരിക്കടിമയായ കൊച്ചുമകന്‍ വയോധികയെ ക്വാറിവേസ്റ്റിലേക്ക് തള്ളിയിട്ടു കൊന്നു. ആലപ്പുഴ പുളിങ്കുന്ന് പഞ്ചായത്ത് അഞ്ചാം വാര്‍ഡ് കാഞ്ഞിരക്കാട് ലക്ഷംവീട് കോളനിയില്‍ ജനാര്‍ദ്ദനന്റെ ഭാര്യ സരോജിനി(70)യാണ് മരിച്ചത്. കൊച്ചുമകന്‍ ജിത്തു(24) ആണ് തള്ളിയിട്ടത്.

🔹മൈസുരു അര്‍ബന്‍ ഡെവലപ്പ്മെന്റ് അതോറിറ്റി ഭൂമി അഴിമതി കേസില്‍ തന്നെ പ്രോസിക്യൂട്ട് ചെയ്യാന്‍ അനുമതി നല്‍കിയ ഗവര്‍ണറുടെ നടപടിക്കെതിരെ കര്‍ണാടക ഹൈക്കോടതിയില്‍ നിന്ന് അനുകൂല ഉത്തരവ് നേടി കര്‍ണാടക മുഖ്യമന്ത്രി സിദ്ധരാമയ്യ. താന്‍ പ്രതിയോ പങ്കാളിയോ അല്ലായെന്നും ഭൂമി ഇടപാടില്‍ തന്നെ പ്രോസിക്യൂട്ട് ചെയ്യാന്‍ അനുമതി നല്‍കിയ ഗവര്‍ണര്‍ തവര്‍ ചന്ദ് ഗെഹ്ലോട്ടിന്റെ നടപടി ചട്ടവിരുദ്ധമെന്ന് കാണിച്ചുമായിരുന്നു സിദ്ധരാമയ്യ ഹര്‍ജി നല്‍കിയത്.

🔹അനധികൃതമായി പ്രവര്‍ത്തിച്ചു വരുന്ന അന്ധേരി ഈസ്റ്റിലെ ഡാന്‍സ് ബാറില്‍ നിന്ന് 24 പെണ്‍കുട്ടികളെ പൊലിസെത്തി രക്ഷിച്ചു. ഡാന്‍സ് ബാറിലുണ്ടായിരുന്ന പെണ്‍കുട്ടികളിലൊരാള്‍ നല്‍കിയ പരാതിയെ തുടര്‍ന്നായിരുന്നു സ്ഥാപനത്തില്‍ റെയ്ഡ് നടത്തിയത്. സൗകര്യങ്ങളോന്നുമില്ലാതെ പാര്‍പ്പിച്ചിരിക്കുക, നിരന്തരം ലൈഗിക ചൂഷണത്തിന് വിധേയരാക്കുക, മര്‍ദ്ദിക്കുക ഇതെക്കെയായിരുന്നു ഡാന്‍സറില്‍ ഒരാള്‍ നല്‍കിയ പരാതി.

🔹ആഫ്രിക്കയില്‍ വ്യാപിച്ചുകൊണ്ടിരിക്കുന്ന എംപോക്സ് വൈറസിനെതിരെ മുന്‍കരുതലുകളുമായി കേന്ദ്ര ആരോഗ്യ മന്ത്രാലയം. വൈറസിന്റെ വ്യാപനം തടയാനായി ആശുപത്രികളിലും വിമാനത്തവാളങ്ങളിലും അത്യാഹിത വാര്‍ഡുകള്‍ സജ്ജീകരിക്കാനുള്ള നടപടികള്‍ ആരംഭിച്ചു. കഴിഞ്ഞാഴ്ച ലോകാരോഗ്യസംഘടന ആരോഗ്യ അടിയന്തരാവസ്ഥ പ്രഖ്യാപിച്ചിതിനു പിന്നാലെയാണ് ഇന്ത്യയുടെ നീക്കം.

🔹പ്രധാനമന്ത്രി നരേന്ദ്ര മോദി അടുത്ത ഓഗസ്റ്റ് 23ന് യുക്രൈന്‍ സന്ദര്‍ശിക്കും. റഷ്യ യുക്രൈന്‍ യുദ്ധം തുടങ്ങിയ ശേഷം ഇതാദ്യമായാണ് മോദി യുക്രൈനില്‍ എത്തുന്നത്. ബുധന്‍, വ്യാഴം ദിവസങ്ങളില്‍ നിശ്ചയിച്ച പോളണ്ട് സന്ദര്‍ശനത്തിന് ശേഷമാവും മോദി യുക്രൈനില്‍ എത്തുക.

🔹ഒക്ടോബര്‍ മൂന്ന് മുതല്‍ 20 വരെ നടക്കാനിരിക്കുന്ന വനിതാ ട്വന്റി 20 ലോകകപ്പിന് യുഎഇ വേദിയായേക്കും. രാജ്യത്തെ സംഘാര്‍ഷാവസ്ഥ കണക്കിലെടുത്ത് ബംഗ്ലാദേശ് ആതിഥേയത്വത്തില്‍ നിന്ന് പിന്‍മാറിയതോടെ ആണിത്. ലോകകപ്പ് വേദിയാവാനുള്ള ഐസിസിയുടെ നിര്‍ദേശം ബിസിസിഐ നിരസിച്ചിരുന്നു.

🔹മംഗളൂരുവില്‍ ഓടുന്ന ട്രെയിനില്‍ ചാടി കയറാന്‍ ശ്രമിച്ച് പ്ലാറ്റ്‌ഫോമിനും ട്രെയിനിനും ഇടയില്‍ കുരുങ്ങിയ യാത്രക്കാരനെ രക്ഷിച്ച് മലയാളിയായ ആര്‍പിഎഫ് ഉദ്യോഗസ്ഥന്‍.കാസര്‍ഗോഡ് കള്ളാര്‍ സ്വദേശിയായ ആര്‍പിഎഫ് ഉദ്യോഗസ്ഥന്‍ എം.രാഘവനാണ് സമയോചിതമായ ഇടപെടലിലൂടെ ഹാസന്‍ സ്വദേശി ശശാങ്ക് ഗൗഡയുടെ ജീവന്‍ രക്ഷിച്ചത്.

🔹ആലുവയിൽ നാലംഗ സംഘങ്ങള്‍ തമ്മിലുണ്ടായ ഏറ്റുമുട്ടലില്‍ ഒരാള്‍ക്ക് വെട്ടേറ്റു. കോഴിക്കോട് സ്വദേശി മുരളിക്കാണ് വെട്ടേറ്റത്. ആലുവ റെയില്‍വേ സ്റ്റേഷന് സമീപമാണ് സംഭവം.രണ്ട് സ്ത്രീകളുമായി വാക്കുതര്‍ക്കം ഉണ്ടാവുകയും തുടര്‍ന്ന് മുരളിയും ഇടുക്കി സ്വദേശിയായ ടിന്‍ റോയും തമ്മിലുണ്ടായ ഏറ്റുമുട്ടലിലാണ് മുരളിക്ക് വേട്ടേറ്റത്. ഗുരുതരാവസ്ഥയിലായ ഇയാളെ കളമശ്ശേരി മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. പൊലീസ് എത്തി ടിന്‍ റോയെയും തമിഴ്‌നാട് സ്വദേശിയായ ഒരു സ്ത്രീയേയും കസ്റ്റഡിയിലെടുത്തു.

🔹സാഹസിക ടൂറിസമായ പാക്ക് റാഫ്റ്റിംഗ് പരിശീലനം ഇനി കോഴിക്കോടും . ഇന്ത്യയിലെ തന്നെ ആദ്യത്തെ പാക്ക് റാഫ്റ്റിംഗ് പരിശീലന കേന്ദ്രത്തിന് കോടഞ്ചേരിയിലെ ഇൻ്റർനാഷണൽ കയാക്കിംഗ് സെൻ്ററിൽ തുടക്കം കുറിച്ചു. വിദഗ്ദരുടെ സഹകരണത്തോടെയാണ് പരിശീലനം നടക്കുക. കേരള ടൂറിസവും കേരള അഡ്വഞ്ചർ ടൂറിസം പ്രൊമോഷൻ സൊസൈറ്റിയും ചേർന്നാണ് രാജ്യത്തെ ആദ്യത്തെ പാക്ക് റാഫ്റ്റിംഗ് പരിശീലന സംരഭത്തിന് കോഴിക്കോട് തുടക്കം കുറിക്കുന്നത്.
വിദഗ്ധരായ ഇൻസ്ട്രക്ടർമാരുടെ മാർഗനിർദേശത്തിന് കീഴിൽ, സുരക്ഷാ കയാക്കർമാരുടെ സഹായത്തിൽ തല്പരരായ ആർക്കും പാക്ക് റാഫ്റ്റിംഗ് പഠിക്കാനുള്ള സൗകര്യം ഒരുക്കിയിട്ടുണ്ട്. പുതു സംരംഭത്തോടെ സാഹസിക ടൂറിസത്തിന്റെ ഹബ്ബായി കേരളത്തെ മാറ്റാനാണ് ലക്ഷ്യം വെക്കുന്നത്. പാക്ക് റാഫ്റ്റിംങ് പരിശീലിക്കുന്നതിനും പദ്ധതിയെ കുറിച്ച് കൂടുതൽ അറിയുന്നതിനും വേണ്ടിയും കൊച്ചിയിൽ നിന്നും സ്കൂബ ഡൈവേഴ്‌സ് ടീമും പുലിക്കയത്ത് എത്തിയിരുന്നു.

തയ്യാറാക്കിയത്:
കപിൽ ശങ്കർ