📱വാർത്തകൾ ഒറ്റനോട്ടത്തിൽ📱 – 2024 | ജൂൺ 04 | ചൊവ്വ ✍ കപിൽ ശങ്കർ

🔹രാജ്യം അടുത്ത അഞ്ചുവര്‍ഷം ആര് ഭരിക്കുമെന്നറിയാന്‍ ഇനി മണിക്കൂറുകള്‍ മാത്രം. ലോക്‌സഭ തെരഞ്ഞെടുപ്പിലെ വോട്ടെണ്ണല്‍ ഇന്ന് രാവിലെ എട്ട് മണി മുതല്‍ ആരംഭിക്കും. ആദ്യം പോസ്റ്റല്‍ ബാലറ്റും, പിന്നീട് ഇലക്ട്രോണിക് വോട്ടിംഗ് മെഷീനിലെ വോട്ടുകളും എണ്ണും. മോദി സര്‍ക്കാരിന്റെ മൂന്നാമൂഴമാണ് എല്ലാ എക്സിറ്റ് പോളുകളും പ്രവചിക്കുന്നത്. എന്നാല്‍ എക്സിറ്റ് പോള്‍ പ്രവചനങ്ങളെ തള്ളിയ പ്രതിപക്ഷ സഖ്യമായ ഇന്ത്യാ മുന്നണി 295 സീറ്റ് നേടി അധികാരത്തില്‍ വരുമെന്ന ആത്മവിശ്വാസത്തിലാണ്. അതേ സമയം കേരളത്തില്‍ യുഡിഎഫ് മുന്നേറ്റം പ്രവചിച്ചിരിക്കുന്ന എക്സിറ്റ് പോളുകളില്‍ എല്‍ഡിഎഫ്ിന് പൂജ്യം മുതല്‍ 4 സീറ്റ് വരേയും എന്‍ഡിഎക്ക് പൂജ്യം മുതല്‍ 3 സീറ്റുകള്‍ വരേയും പ്രവചിച്ചിട്ടുണ്ട്.

🔹വടകരയില്‍ സംഘര്‍ഷ സാധ്യതയെന്ന് മുന്നറിയിപ്പ്. ഇതിനെ തുടര്‍ന്ന് ക്രമസമാധന ചുമതലയുളള എഡിജിപി വടകരയില്‍ ക്യാമ്പ് ചെയ്യുകയാണ്. രഹസ്യാന്വേഷണ വിഭാഗമാണ് സംഘര്‍ഷത്തിന് സാധ്യതയുണ്ടെന്ന് മുന്നറിയിപ്പ് നല്‍കിയത്. ഇതിന്റെ അടിസ്ഥാനത്തില്‍ ഡിജിപിയും എഡിജിപിയും പ്രത്യേക യോഗം വിളിച്ച് വടക്കന്‍ കേരളത്തിലെ സ്ഥിതി വിലയിരുത്തി.

🔹കൊല്ലം ജില്ലയില്‍ വോട്ടെണ്ണല്‍ കേന്ദ്രത്തിന്റെ പരിസരത്ത് കലക്ടര്‍ നിരോധനാജ്ഞ പ്രഖ്യാപിച്ചു. വോട്ടെണ്ണുന്ന തങ്കശ്ശേരി സെന്റ് അലോഷ്യസ് സ്‌കൂള്‍ പരിസരത്താണ് നിരോധനാജ്ഞ . ഇവിടെ പൊതുയോഗമോ അഞ്ചുപേരില്‍ കൂടുതല്‍ ആളുകള്‍ കൂട്ടം കൂടാനോ പാടില്ല. രാവിലെ 5 മണി മുതല്‍ വൈകിട്ട് 5 മണി വരെയാണ് നിരോധനജ്ഞ. അടിയന്തര വൈദ്യ സഹായം, നിയമ പാലനം, അഗ്നി സുരക്ഷ, സര്‍ക്കാര്‍ പ്രവര്‍ത്തികള്‍ എന്നിവയ്ക്ക് അനുമതി ഉണ്ടെന്നും കലക്ടര്‍ അറിയിച്ചു.

🔹 ലോക്‌സഭാ തിരഞ്ഞെടുപ്പ് ഫലം 2024
വോട്ടെണ്ണൽ പുരോഗമിക്കുന്നു….

നരേന്ദ്രമോദി വാരാണസിയിൽ ആറായിരത്തിലധികം വോട്ടിന് പിന്നിലും. അമിത് ഷായുടെ ലീഡ് 1.24 ലക്ഷമെന്നും സൂചന. ദേശീയതലത്തില്‍ എന്‍ഡിഎ 255, ഇന്ത്യ സഖ്യം 237, മറ്റുള്ളവര്‍ 13 എന്നിങ്ങനെയാണ് ലീഡ് നില.

കർണാടകയിൽ ശോഭ കരന്തലജെ, പ്രഹ്ളാദ് ജോഷി തേജസ്വി സൂര്യ ജഗദീഷ് ഷെട്ടർ ബി വൈ രാഘവേന്ദ്ര കുമാരസ്വാമി എന്നിവര്‍ മുന്നിലും ലീഡ് ചെയ്യുന്നു.

കേരളത്തിൽ വ്യക്തമായ ലീഡുയർത്തി യുഡിഎഫ്. ആദ്യ ഘട്ടത്തിൽ തുടക്കം മുതൽ ലീഡ് നിലയിൽ ആധിപത്യം സ്ഥാപിച്ച് യു ഡി എഫ് സ്ഥാനാർത്ഥികൾ.

വയനാട്ടിൽ ലീഡുയർത്തി രാഹുൽ ഗാന്ധി. 20000 കടന്ന് ലീഡിൽ മുന്നേറ്റം തുടരുന്നു.

തൃശൂരിൽ സുരേഷ് ഗോപി 18711 വോട്ടുകൾക്ക് മുന്നിൽ. കെ മുരളീധരൻ മൂന്നാം സ്ഥാനത്ത്.

തിരുവനന്തപുരത്ത് ഇഞ്ചോടിഞ്ച് പോരാട്ടവുമായി കോൺഗ്രസും ബിജെപിയും.

ആലപ്പുഴയിൽ കെ സി വേണുഗോപാല്‍ വ്യക്തമായ ലീഡിലേക്ക്. ലീഡ് നില 9000 കടന്നു.

കണ്ണൂർ ആദ്യ റൗണ്ട് യുഡിഎഫിന് 7231 വോട്ടിന്റെ ലീഡ്.

വടകരയില്‍ ഷാഫി പറമ്പിലിന്‍റെ ലീഡ് 10000 കടന്നു.

വാരണാസിയില്‍ ലീഡ് ഉയരുന്നു മോദിയ്ക്ക് 9066 വോട്ടിൻ്റെ ലീഡ്.

മഹാരാഷ്ട്രയില്‍ ഇന്ത്യ മുന്നണി ലീഡ് ചെയ്യുന്നു. മഹാവികാസ് അഘാഡി (ഇന്ത്യ) 25, മഹായുതി (എൻഡിഎ ) 21, മറ്റുളളവർ 02 എന്നിങ്ങനെയാണ് ലീഡ്.

രാജസ്ഥാനില്‍ ബിജെപിക്ക് 13 സീറ്റില്‍ ലീഡ് ,ഇന്ത്യ സഖ്യത്തിന് 12 സീറ്റിലും ലീഡ്.

അരലക്ഷം പിന്നിട്ട് എറണാകുളത്ത് യുഡിഎഫ് സ്ഥാനാര്‍ത്ഥി ഹൈബി ഈഡന്റെ ഭൂരിപക്ഷം.

ഇടുക്കിയില്‍ യുഡിഎഫ് സ്ഥാനാര്‍ത്ഥി ഡീന്‍ കൂര്യക്കോസിന്‍റെ ലീഡ് 30000 കടന്നു.

വടകരയിൽ ഷാഫി പറമ്പിലിന്റെ ലീഡ് 22172 കടന്നു.

കണ്ണൂരിൽ കെ സുധാകരൻ 12245 നു മുന്നിൽ.

തമിഴ്നാട്ടിൽ 39ൽ 37 സീറ്റിൽ ഇന്ത്യ സഖ്യം മുന്നിൽ. AIADMK നാമക്കലിലും, NDA ധർമപുരിയിലും മാത്രമാണ് മുന്നിലുള്ളത്. ബി ജെ പി ഒരിടത്തും ലീഡിലില്ല.

നരേന്ദ്ര മോദിയുടെ ലീഡ് 17148 വോട്ടായി ഉയര്‍ന്നു.

വയനാട്ടിൽ രാഹുൽ ഗാന്ധിയുടെ ലീഡ് ഒരു ലക്ഷത്തോടടുക്കുന്നു.

പശ്ചിമബംഗാളില്‍ തൃണമൂല്‍ കോണ്‍ഗ്രസിന് 26 സീറ്റില്‍ ലീഡ്. ബിജെപി ലീഡ് 14 ആയി താഴ്ന്നു, കോണ്‍ഗ്രസിന് 2 സീറ്റിലും ലീഡ്.

തൃശൂരിൽ സുരേഷ് ഗോപിയുടെ ലീഡ് 30073 കടന്നു. കെ മുരളീധരൻ മൂന്നാം സ്ഥാനത്തേക്ക് തള്ളപ്പെട്ടു.

എൻഡിഎ 280,

ഇന്ത്യ സഖ്യം 239

മറ്റുള്ളവർ 24 എന്നിങ്ങനെയാണ് ലീഡ് നില.

കേരളത്തിൽ യു ഡി എഫ് 17

എൽ ഡി എഫ് 1

എൻഡിഎ 2 എന്നിങ്ങനെയാണ് ലീഡ് നില.

സിപിഎമ്മിന് ആശ്വാസമായ ആലത്തൂരില്‍ കെ രാധാകൃഷ്ണന്‍റെ ലീഡ് 10000 ത്തിലേക്ക്.

മഹാരാഷ്ട്രയിൽ എൻ ഡി എ 19
ഇന്ത്യസഖ്യം 28
മറ്റുള്ളവർ 1 എന്നതാണ് ലീഡ് നില .

തമിഴ്നാട്ടിൽ എൻ ഡി എ 1
ഇന്ത്യസഖ്യം 36
എ ഐ എ ഡി എം കെ 2 എന്നതാണ് ലീഡ് നില .

ഉത്തർപ്രദേശിൽ എൻ ഡി എ 51, ഇന്ത്യസഖ്യം 23 എന്നിങ്ങനെയാണ് ലീഡ്.

കേരളത്തിൽ 17 മണ്ഡലങ്ങളിൽ യു ഡി എഫ് മുന്നേറ്റം. എൻ ഡി എ യ്ക്കും പിന്നിലായി എൽഡിഎഫ്. എൽഡിഎഫ് ലീഡ് ആലത്തൂരിൽ മാത്രം.

ആററിങ്ങലിൽ എൽ ഡി എഫിന് ലീഡ്. 346 വോട്ടുകൾക്ക് വി.ജോയി മുന്നിൽ.

ദില്ലിയില്‍ എല്ലാ സീറ്റിലും ബി ജെ പി. ആംആദ്മി കോണ്‍ഗ്രസ് സഖ്യത്തിന് നേട്ടമില്ല.

സ്മൃതി ഇറാനി മുപ്പത്തിയൊന്നായിരത്തിൽ പരം വോട്ടിന് പിന്നിൽ.

അയോധ്യ ഉള്‍പ്പെടുന്ന ഫൈസാബാദില്‍ ബിജെപി പിന്നില്‍.

പഞ്ചാബിൽ ബിജെപിക്ക് ഒറ്റ സീറ്റിലും ലീഡില്ല 13 ൽ 7 കോൺ​ഗ്രസ്, എഎപി 3, അകാലിദൾ 1 സ്വതന്ത്രർ 2

വയനാട്ടിൽ രാഹുൽ ഗാന്ധിയുടെ ലീഡ് ഒരു ലക്ഷം കടന്നു. റായ്ബറേലിയിലും രാഹുൽ മുന്നിൽ.

കൊല്ലത്ത് എന്‍കെ പ്രേമചന്ദ്രന്‍റെ ഭൂരിപക്ഷം 40000 കടന്നു.

മലപ്പുറത്ത് ഇടി മുഹമ്മദ് ബഷീറിന്റെ ലീഡ് അരലക്ഷം കടന്നു.

കണ്ണൂരിൽ കെ സുധാകരൻ

കോഴിക്കോട് എം കെ രാഘവൻ

പാലക്കാട് വി കെ ശ്രീകണ്ഠൻ

വടകര ഷാഫി പറമ്പിൽ

എറണാകുളത്ത് ഹൈബി ഈഡൻ എന്നിവർ വൻ ഭൂരിപക്ഷത്തോടെ ലീഡ് നില ഉയർത്തുന്നു.

തൃശൂരിൽ സുരേഷ് ഗോപി 47991 വോട്ടുകൾക്ക് മുന്നിൽ.

തിരുവനന്തപുരത്ത് രാജീവ് ചന്ദ്രശേഖർ 9112 വോട്ടുകൾക്ക് മുന്നിൽ.

ഉത്തർപ്രദേശിൽ എൻ ഡി എ 33

ഇന്ത്യസഖ്യം 46 ലും ലീഡ് ചെയ്യുന്നു.

തിരഞ്ഞെടുപ്പ് ഫലം 2024 June 4,
വോട്ടെണ്ണൽ പുരോഗമിക്കുന്നു…

🔹ചക്രവാത ചുഴി കേരളത്തിന് മുകളില്‍ നിലനില്‍ക്കുന്നുവെന്ന് കേന്ദ്ര കാലാവസ്ഥാ വകുപ്പ്. കേരളാ തീരത്ത് ശക്തമായ പടിഞ്ഞാറന്‍ കാറ്റും വീശുന്നുണ്ട്. അതിനാല്‍ അടുത്ത അഞ്ച് ദിവസം വ്യാപകമായി ഇടത്തരം മഴ പെയ്യുമെന്നാണ് വിലയിരുത്തല്‍. ഇതോടൊപ്പം ഇടിമിന്നലും 40 കിലോമീറ്റര്‍ വേഗത്തില്‍ കാറ്റും ഉണ്ടാകാനിടയുണ്ട്.

🔹യൂട്യൂബര്‍ സഞ്ജു ടെക്കിക്കെതിരെ എംവിഡി കുറ്റപത്രം നല്‍കി. ആലപ്പുഴ മജിസ്ട്രേറ്റ് കോടതിയില്‍ എന്‍ഫോഴ്സ്മെന്റ് ആര്‍ടിഒ കുറ്റപത്രം സമര്‍പ്പിച്ചു . സഞ്ജുവും കാര്‍ ഓടിച്ച സൂര്യനാരായണനുമെതിരെ പ്രൊസിക്യൂഷന്‍ നടപടികളും ആരംഭിച്ചു. ആറ് മാസം മുതല്‍ ഒരുവര്‍ഷം വരെ ജയില്‍ ശിക്ഷ ലഭിക്കാവുന്ന അപകടമുണ്ടാക്കുന്ന രീതിയില്‍ വണ്ടിയോടിച്ചുവെന്ന കുറ്റമാണ് പ്രതികള്‍ക്കെതിരെ ചുമത്തിയത്. സുരക്ഷിതമല്ലാത്ത വാഹനം റോഡില്‍ ഓടിച്ചതിനുള്ള വകുപ്പും ചുമത്തി. കേസില്‍ പ്രതികള്‍ കോടതിയില്‍ വിചാരണ നേരിടണം.

🔹കൊച്ചിയിലെ കാനകളുടെ ശുചീകരണത്തില്‍ കോടതി തുടര്‍ച്ചയായി ഇടപെട്ടിട്ടും നടപടികള്‍ കാര്യക്ഷമമാകുന്നില്ലെന്ന് ഹൈക്കോടതി. സര്‍ക്കാരിനോടും ബന്ധപ്പെട്ട അധികൃതരോടും പറഞ്ഞുമടുത്തുവെന്നും ഒരു മണിക്കൂര്‍ തുടര്‍ച്ചയായി മഴ പെയ്താല്‍ തന്നെ ജനങ്ങള്‍ ദുരിതത്തിലാവുകയാണെന്നും കോടതി പറഞ്ഞു. അവസാന നിമിഷത്തിലേക്ക് കാര്യങ്ങള്‍ ചെയ്യുന്നത് എന്തുകൊണ്ടാണെന്നും ഒരു മാസ്റ്റര്‍ പ്ലാന്‍ വേണ്ടേ എന്നും കോടതി ചോദിച്ചു. പൊതുജനങ്ങള്‍ ജലാശയങ്ങളിലേക്ക് മാലിന്യങ്ങള്‍ തള്ളിയാല്‍ കര്‍ശന നടപടിയെടുക്കണമെന്നും കോടതി വ്യക്തമാക്കി.

🔹പെരിയാര്‍ മത്സ്യക്കുരുതിയില്‍ കുഫോസിന്റെ രാസപരിശോധനാഫലം അടുത്തയാഴ്ചയോടെ പുറത്തുവരും . രാസപരിശോധനാ ഫലം വൈകുന്നതിനാലാണ് തുടര്‍നടപടികളും നീളുന്നത്. ഈ റിപ്പോര്‍ട്ടിന്റെ അടിസ്ഥാനത്തില്‍ വേണം ഏത് കമ്പനിയാണ് മാലിന്യം ഒഴുക്കിയതെന്ന് കണ്ടെത്താന്‍. അതേസമയം, ഉത്തരവാദികള്‍ക്ക് എതിരെ നടപടി ആവശ്യപ്പെട്ട് മത്സ്യത്തൊഴിലാളികള്‍ പ്രതിഷേധിച്ചു.

🔹പാലക്കാട്ട് താലൂക്ക് സര്‍വേയര്‍ കൈക്കൂലി വാങ്ങുന്നതിനിടെ വിജിലന്‍സിന്റെ പിടിയില്‍. നാല്‍പ്പതിനായിരം രൂപ കൈക്കൂലി വാങ്ങുന്നതിനിടെ മണ്ണാര്‍ക്കാട് താലൂക്ക് സര്‍വേയര്‍ പി.സി.രാമദാസാണ് പാലക്കാട് വിജിലന്‍സ് സംഘത്തിന്റെ പിടിയിലായത്. ആനമൂളിയിലെ പത്ത് സെന്റ് സ്ഥലത്തിന്റെ തരം മാറ്റവുമായി ബന്ധപ്പെട്ട് വസ്തു ഉടമയുടെ കയ്യില്‍ നിന്നും 50,000 രൂപയായിരുന്നു ഇയാള്‍ കൈക്കൂലി ചോദിച്ചിരുന്നത്. എന്നാല്‍ ഇയാള്‍ നാല്‍പ്പതിനായിരം രൂപയാണ് നല്‍കിയത്. ഇതു വാങ്ങുന്നതിനിടെയാണ് വിജിലന്‍സിന്റെ പിടിയിലായത്.

🔹കട്ടപ്പന ഇരട്ടക്കൊലപാതക കേസില്‍ വിജയന്റെ മകന്‍ വിഷ്ണു മാപ്പു സാക്ഷി. ദൃക്സാക്ഷികളൊന്നും ഇല്ലാത്തിനാലാണ് പൊലീസിന്റെ ഈ തീരുമാനം. കേസില്‍ മാപ്പു സാക്ഷിയാകാന്‍ തയ്യാറാണെന്ന് ചൂണ്ടിക്കാട്ടി വിഷ്ണു കോടതിയില്‍ അപേക്ഷ നല്‍കി. വിജയനെ കൊലപ്പെടുത്തിയ കേസില്‍ രണ്ടാം പ്രതിയും നവജാത ശിശുവിനെ കൊലപ്പെടുത്തിയതില്‍ മൂന്നാം പ്രതിയുമാണ് വിഷ്ണു.

🔹കേരള പൊലീസ് കണ്ണൂര്‍ ക്യാമ്പിലെ ക്യാമ്പ് ഫോളോവര്‍ ട്രെയിനില്‍ കുഴഞ്ഞു വീണ് മരിച്ചു. തെരഞ്ഞെടുപ്പ് ഡ്യൂട്ടിക്ക് പോയ കണ്ണൂര്‍ കണ്ണവം സ്വദേശി രവി എ(54) ആണ് മരിച്ചത്. പഞ്ചാബിലെ ലുധിയാനയില്‍ നിന്ന് കേരളത്തിലേക്കുള്ള മടക്കയാത്രയിലാണ് സംഭവം. കനത്ത ചൂടില്‍ പൊലീസുകാരന് അസ്വസ്ഥത അനുഭവപ്പെടുകയായിരുന്നു.

🔹മഹാരാഷ്ട്രയിലെ കോല്‍ഹപൂരിലെ സൈബര്‍ ചൗക്ക് ജംഗ്ഷനില്‍ അമിത വേഗതയിലെത്തിയ കാര്‍ ബൈക്കുകളിലേക്ക് ഇടിച്ചുകയറി മൂന്ന് മരണം. പാഞ്ഞെത്തിയ കാര്‍ അഞ്ച് ബൈക്കുകളെ ഇടിച്ചു തെറിപ്പിക്കുകയായിരുന്നുവെന്ന് പൊലീസ് പറഞ്ഞു. പരുക്കേറ്റ ആറ് പേരില്‍ രണ്ട് പേരുടെ നില ഗുരുതരമായി തുടരുകയാണെന്ന് പൊലീസ് അറിയിച്ചു.

🔹വിമാനത്തിനുള്ളില്‍ അതിക്രമം കാണിച്ച കോഴിക്കോട് സ്വദേശിയെ മുംബൈ പോലീസ് അറസ്റ്റുചെയ്തു. 25-കാരനായ അബ്ദുള്‍ മുസവിര്‍ നടുക്കണ്ടിയാണ് പിടിയിലായത്. ഇയാള്‍ വിമാനജീവനക്കാരെ ആക്രമിക്കുകയും വിമാനത്തിന്റെ വാതില്‍ തുറക്കാന്‍ ശ്രമിച്ചെന്നും പോലീസ് അറിയിച്ചു.

🔹ട്വന്റി20 ലോകകപ്പില്‍ ശ്രീലങ്കയ്ക്കെതിരെ ദക്ഷിണാഫ്രിക്കക്ക് ആറു വിക്കറ്റിന്റെ വിജയം. ശ്രീലങ്കയെ തകര്‍ത്തെറിഞ്ഞ ബൗളര്‍മാരുടെ മികവിലാണ് ദക്ഷിണാഫ്രിക്ക ആദ്യ ജയം സ്വന്തമാക്കിയത്. ടോസ് നേടി ബാറ്റിങ്ങിനിറങ്ങിയ ശ്രീലങ്കയെ 77 റണ്‍സിനാണ് ദക്ഷിണാഫ്രിക്ക എറിഞ്ഞുവീഴ്ത്തിയത്. മറുപടി ബാറ്റിംഗിനിറങ്ങിയ ദക്ഷിണാഫ്രിക്ക 16.2 ഓവറില്‍ നാലു വിക്കറ്റ് നഷ്ടത്തിലാണ് വിജയം പിടിച്ചെടുത്തത്.

🔹ഫഹദ് ഫാസിലിനെ നായകനാക്കി സത്യന്‍ അന്തിക്കാട് സംവിധാനം ചെയ്ത ‘ഞാന്‍ പ്രകാശന്‍’ എന്ന ചിത്രത്തില്‍ ടീന മോള്‍ എന്ന കഥാപാത്രമായി ശ്രദ്ധ നേടിയ താരമാണ് ദേവിക സഞ്ജയ്. ശേഷം ജയറാമും മീര ജാസ്മിനും ഒന്നിച്ച ‘മകള്‍’ എന്ന ചിത്രത്തിലും അപര്‍ണ എന്ന ഏറെ പ്രാധാന്യമുള്ള വേഷത്തില്‍ താരം എത്തിയിരുന്നു. ഇപ്പോഴിതാ കരിയറിലെ തന്റെ ആദ്യ നായികാ വേഷത്തില്‍ എത്തിയിരിക്കുകയാണ് ദേവിക. നാദിര്‍ഷ സംവിധാനം ചെയ്ത ‘വണ്‍സ് അപ്പോണ്‍ എ ടൈം ഇന്‍ കൊച്ചി’ എന്ന ചിത്രത്തിലൂടെയാണ് ദേവിക നായികയായി എത്തിയിരിക്കുന്നത്. ജാനകി എന്ന കഥാപാത്രമായി ശ്രദ്ധേയ പ്രകടനമാണ് ദേവിക കാഴ്ചവച്ചിരിക്കുന്നത്. പ്രണയ രംഗങ്ങളിലും ഇമോഷണല്‍ രംഗങ്ങളിലുമൊക്കെ മികച്ച രീതിയിലാണ് ദേവികയുടെ പ്രകടനം. ചിത്രത്തില്‍ നായകനായെത്തിയ മുബിന്‍ റാഫിയും ദേവികയും ചേര്‍ന്നുള്ള കെമിസ്ട്രി നല്ല രീതിയില്‍ വര്‍ക്കായിട്ടുമുണ്ട്. റാഫിയുടെ തിരക്കഥയില്‍ നാദിര്‍ഷ സംവിധാനം ചെയ്തിരിക്കുന്ന ചിത്രം മയക്കുമരുന്ന് മാഫിയ, വിദേശത്തേക്ക് ചേക്കേറുന്ന പുതിയ തലമുറ, അവരില്‍ ചിലരുടെയൊക്കെ വീട്ടിലെ അവസ്ഥകള്‍, അവര്‍ അറിയാതേയും അറിഞ്ഞുകൊണ്ടും ചെന്നുപെട്ടുപോകുന്ന പ്രശ്‌നങ്ങള്‍ ഇവയൊക്കെയാണ് സംസാരിക്കുന്നത്. സംവിധായകനും തിരക്കഥാകൃത്തുമായ റാഫിയുടെ മകന്‍ മുബിന്‍ റാഫിയാണ് ചിത്രത്തിലെ നായകന്‍. അര്‍ജുന്‍ അശോകനും ഷൈന്‍ ടോം ചാക്കോയും ചിത്രത്തില്‍ മുഖ്യ വേഷങ്ങളില്‍ എത്തുന്നു. ഹിഷാം അബ്ദുല്‍ വഹാബ് ആണ് ചിത്രത്തിന് സംഗീതം ഒരുക്കുന്നത്.

തയ്യാറാക്കിയത്:
കപിൽ ശങ്കർ