👬👫കുട്ടീസ് കോർണർ 👬👫 (അറുപത്തിരണ്ടാം വാരം)

ഹായ് കുട്ടീസ്!!
ഈ ആഴ്ച നമുക്ക് A)തീപ്പെട്ടി ചിത്രം കണ്ടൊരു വിശദീകരണം,B)പദ ലളിതം (വാക്കുകളെ കുറിച്ചൊരു വിശദീകരണം), C)സ്ഥലനാമ കഥകൾ പിന്നെ കുറച്ചു D)കടംകഥകളും, കൂടാതെ ഈ ആഴ്ചയും എളുപ്പത്തിൽ(E) സ്റ്റെപ് ബൈ സ്റ്റെപ് ആയി വരയ്ക്കുന്ന ഒരു ചിത്രം കൂടി കാണാം ട്ടോ 😍 കുട്ടീസ് ഒഴിവു സമയങ്ങളിൽ അവ വരച്ചു നോക്കണെ ..😍

എന്ന് സ്വന്തം
ശങ്കരിയാന്റി.

👫A) തീപ്പെട്ടി ചിത്രം (7)

ലൈറ്റ് ഹൗസ്

വിളക്കുമാടങ്ങളുടെ ചിത്രമുള്ള തീപ്പെട്ടികൾ ചേർക്കുന്നു.

നാവികർക്കു വഴികാട്ടിയായ പ്രകാശസ്രോതസ്സോടുകൂടിയ ഗോപുരമാണ് ലൈറ്റ് ഹൗസ് (വിളക്കുമാടം ) . കടൽയാത്രക്കാർക്ക് തങ്ങളുടെ ജലയാനത്തിന്റെ സ്ഥാനം തിരിച്ചറിഞ്ഞ് ലക്ഷ്യസ്ഥാനത്ത് എത്തുന്നതിനായി തുറമുഖങ്ങളിലും അപായസാധ്യതയുള്ള സ്ഥലങ്ങളെക്കുറിച്ച് മുന്നറിയിപ്പു നൽകാനായി അത്തരം ഇടങ്ങളിലും വിളക്കുമാടങ്ങൾ സ്ഥാപിക്കാറുണ്ട്. പൊതുവേ, വളരെ ഉയരവും കോൺ ആകൃതിയുമുള്ള ടവറുകളാണ് ഇവ. സാധാരണയായി വെളുപ്പ്, ചുവപ്പ്, കറുപ്പ് എന്നീ നിറങ്ങളിൽ ഏതെങ്കിലുമൊന്നു മാത്രമായോ, രണ്ടുനിറങ്ങൾ ഇടകലർത്തിയോ ഉപയോഗിക്കുകയാണ് പതിവ്.
ആദ്യകാലത്ത് മീൻപിടിത്തക്കാരും നാവികരും കരയിലുള്ള ഉയർന്ന പാറക്കൂട്ടങ്ങളെയോ മരങ്ങളെയോ അടയാളമാക്കിവച്ചുകൊണ്ട് യാത്രചെയ്തിരുന്നു. പുറംകടലിൽ എത്തിക്കഴിഞ്ഞാൽ സ്ഥാന നിർണയനത്തിനായി വെള്ളത്തിന്റെ ആഴം, കാറ്റിന്റെ ഗതി, തിരമാലകളുടെ പാറ്റേൺ, സൂര്യന്റെ സ്ഥാനം എന്നിവയെയാണ് അവർ ആശ്രയിച്ചിരുന്നത്. എന്നാൽ പകൽ സമയത്തെ യാത്രയ്ക്കു മാത്രമേ ഇത്തരം സൂചനകൾ ഉപകരിച്ചിരുന്നുള്ളൂ. രാത്രി കാലങ്ങളിലെ യാത്രയ്ക്ക് കരയിൽ കൂട്ടിയ അഗ്നികുണ്ഡങ്ങളെ അവർ ആശ്രയിച്ചിരുന്നിരിക്കാം എന്ന് ഊഹിക്കുന്നു. പില്ക്കാലത്തു നിർമിച്ച വിളക്കുമാടങ്ങളെ ഇത്തരം തീക്കുണ്ഡങ്ങളുടെ പരിഷ്കൃത രൂപങ്ങളായി കരുതാം.
പഴയകാല ലോക അത്ഭുതങ്ങളിൽ രണ്ടെണ്ണം വിളക്കുമാടങ്ങളായിരുന്നുവെന്ന് ചരിത്രം പറയുന്നു. ടോളമി രണ്ടാമന്റെ കാലത്ത് ഈജിപ്തിലെ അലക്സാൻഡ്രിയ തുറമുഖത്ത് സ്ഥാപിച്ച 450 അടി ഉയരം ഉണ്ടായിരുന്ന ഷാറോസ് ഓഫ് അലക്സാൻഡ്രിയയും ഗ്രീസ് ലെ റോഡ്സ് തുറമുഖത്തെ പടുകൂറ്റൻ ലോഹപ്രതിമയായിരുന്ന കൊളോസസ് ഓഫ് റോഡ്സുമായിരുന്നു ഇവ. ഭൂകമ്പങ്ങളിൽ നാമാവശേഷമായ ഇവയിൽ വഴികാട്ടിയായത് തീക്കുണ്ഡങ്ങളായിരുന്നു. ലോകത്തെ ആദ്യ ലൈറ്റ് ഹൗസ് തീക്കുണ്ഡമായിരുന്നുവെന്ന് ചരിത്രം പറയുന്നു. പതിനാറാം നൂറ്റാണ്ടിൽ മൃഗക്കൊഴുപ്പ് ചേർത്തുള്ള മെഴുകുതിരികളും പതിനേഴാം നൂറ്റാണ്ടിൽ എണ്ണവിളക്കും ഇതിന്റെ സ്ഥാനം ഏറ്റെടുത്തു. തുടർന്ന് സിൽക്കിലും കോട്ടണിലും തീർത്ത മാന്റിലുകൾ, പെട്രോളിയം വിളക്കുകൾ, വൈദ്യുതിവിളക്കുകൾ എന്നിവ ഘട്ടം ഘട്ടമായി നിലവിൽവന്നു.
ചില വിളക്കുമാടങ്ങളുടെ പ്രകാശസ്രോതസ്സ് സ്ഥിരമായി കത്തി നിൽക്കുന്നതായിരിക്കും. സാധാരണ ഗതിയിൽ കറങ്ങുന്ന പ്രകാശ സ്രോതസ്സാണുണ്ടാവുക. വിവിധ വിളക്കുമാടങ്ങളിലെ പ്രകാശ സ്രോതസ്സ് കറങ്ങുന്ന വേഗത വ്യത്യസ്തമായിരിക്കും. ഇത് അടിസ്ഥാനമാക്കി കടൽ യാത്രികർക്ക് ഏത് വിളക്കുമാടമാണ് തങ്ങൾ കാണുന്നതെന്നും അതുവഴി കപ്പലിന്റെ അപ്പോഴുള്ള കൃത്യമായ സ്ഥാനം എവിടെയെന്നും മനസ്സിലാക്കാൻ സാധിക്കും.

📗📗

👫B) പദ ലളിതം

വിലസുക

വിലസുകയെന്ന പദം കേൾക്കാത്തവർ ചുരുക്കം. അഹങ്കരിക്കുകയെന്നർത്ഥമതി നിപ്പോൾ ഉണ്ട്. എന്നാൽ എന്താണ് ആ പദത്തിന്റെ അർത്ഥം?. വിശേഷപ്പെട്ട രീതിയിൽ ശോഭിക്കുകയെന്നർത്ഥം. മറ്റുള്ളവരിൽ നിന്ന് വ്യത്യസ്തമായി പെരുമാറുന്നവരെന്നാണ് ആ പദത്തിനർത്ഥം. അപ്പോൾ വിലാസിനി, വിലാസം എന്നിവയുടെ അർത്ഥത്തെ ക്കുറിച്ച് ചിന്തിച്ച് നോക്കു. വിലാസം വിശേഷാർഥകമായ ശബ്ദമാണ്. സ്ത്രീകളുടെ ഭാവം, ഹാവം, ഹേലം തുടങ്ങി ശൃംഗാരപ്രധാനങ്ങളായ 28 ചേഷ്ടകളിലൊന്നാണ് വിലാസം. വിലാസമറിയുന്നവൾ വിലാസിനി.
“ഭാവം മാറി ഹാവമായി
ഹാവം മാറി ഹേലമായി
പൂവല്മേനി പുളകത്താൽ
ഭൂഷിതമായി”
ഇങ്ങനെയൊരു നതോന്നതാശീല് ഓർമയിൽ വിലസുന്നു.
ചുണ്ടുകടിച്ചു ചുവപ്പിക്കലും സാരിത്തുമ്പു പിടിച്ചിടലും കാല്നഖംകൊണ്ട് ചിത്രം വരയ്ക്കലും ഒക്കെ വിലാസങ്ങളാണ്.

📗📗

👫C) സ്ഥലനാമ കഥകൾ

കുട്ടീസ് ഈ ആഴ്ചയിലും ചില സ്ഥലങ്ങൾക്ക് എങ്ങനെ ആ പേര് വന്നു എന്ന് കൗതുകത്തോടെ വായിച്ചറിഞ്ഞോളൂ 😍

കോഴിക്കോട്

കൊട്ടാരം എന്നര്‍ത്ഥമുള്ള “കോയില്‍”, എന്ന പദവും, കോട്ടകള്‍ നിറഞ്ഞ സ്ഥലം എന്നര്‍ത്ഥമുള്ള “കോട്” എന്ന പദവും സംയോജിച്ചുണ്ടായ “കോയില്‍ക്കോട്” എന്ന പ്രയോഗത്തില്‍ നിന്നാണ് കോഴിക്കോട് എന്ന സ്ഥലനാമം ഉണ്ടായതെന്ന് പ്രഗത്ഭരായ ചില ചരിത്രകാരന്മാര്‍ അഭിപ്രായപ്പെടുന്നു. പില്‍ക്കാലത്ത് ബ്രിട്ടീഷുകാരിലൂടെ പ്രചാരം സിദ്ധിച്ച “കാലിക്കറ്റ്” എന്ന പ്രയോഗം കോഴിക്കോട് എന്നതിന്റെ അറബിരൂപമായിരുന്നു. കോഴിക്കോട് തലസ്ഥാനമാക്കിയായിരുന്നു പുരാതന കേരളത്തിലെ സാമൂതിരിയുടെ നാട്ടുരാജ്യം നിലനിന്നിരുന്നത്. പില്‍ക്കാലത്ത് ഭാരതത്തിന്‍റെ വിധിയാകെ മാറ്റിമറിക്കുമാറ്, 1498-ല്‍ വാസ്കോ ഡ ഗാമ എന്ന പോര്‍ച്ചുഗീസ് നാവികന്‍ കോഴിക്കോട് കാപ്പാട് കടല്‍ത്തീരത്ത് കാലുകുത്തിയതോടെയാണ് യൂറോപ്യന്‍ ശക്തികള്‍ നമ്മുടെ രാജ്യത്തെ വരുതിയിലാക്കുന്നതിന് തുടക്കമിട്ടത്. പുരാതനകാലം മുതല്‍ അറബികളും ചീനക്കാരും കോഴിക്കോടുമായി വ്യാപാരബന്ധത്തിലേര്‍പ്പെട്ടിരുന്നു. പഴയ ബ്രിട്ടീഷ് മദ്രാസ് സംസ്ഥാനത്തെ മലബാര്‍ ജില്ലയുടെ ആസ്ഥാനവും കോഴിക്കോടായിരുന്നു. കോഴിക്കോട് അന്താരാഷ്ട്ര വിമാനത്താവളം മലപ്പുറം ജില്ലയിലെ കരിപ്പൂരിലാണ് സ്ഥിതി ചെയ്യുന്നത്. ആകാശവാണി നിലയവും, മെഡിക്കല്‍ കോളേജും, അന്താരാഷ്ട്ര വിമാനത്താവളവും, തുറമുഖവും, സര്‍വ്വകലാശാലയുമെല്ലാമുള്ള നഗരമാണ് കോഴിക്കോട്.

📗📗

👫D) കടങ്കഥകൾ (18)

1)ഇപ്പോള്‍ വെട്ടിയ പുത്തന്‍ കിണറ്റില്‍ തൂവെത്തൂവെ വെള്ളം-

കരിക്ക്.

2)ഇവിടെ ഓതിയാല്‍ അവിടെ അലറും-

ഉച്ചഭാഷിണി.

3)ഈച്ച തൊടാത്തൊരിറച്ചിക്കഷ്ണം-

തീക്കട്ട.

4)ഈഹു, ആഹു മരം, കാക്കയ്ക്കിരിക്കാന്‍ കൊമ്പില്ലാത്ത മരം-

പുക .

5)ഉരുട്ടാം പിരട്ടാം എടുക്കാന്‍ പറ്റില്ല-

കണ്ണ് .

6)ഉരിയരി വെച്ചു, കുറുകുറെ വെന്തു, ഉള്ളരി വാങ്ങി, ഭഗവാനുണ്ടു എന്നിട്ടും ഒരു പറ ചോറ് ബാക്കി-

ചുണ്ണാമ്പ്.

7)ഉണ്ടാക്കാന്‍ പാട്, ഉണ്ടാക്കിയാല്‍ ഒടുങ്ങില്ല, കൊടുത്താലിരട്ടിക്കും-

അറിവ്.

8)ഉടുത്തുണിയില്ലാത്തോന്‍ കുട ചൂടി നില്‍ക്കുന്നു-

കൂണ്‍.

9)ഉറക്കത്തിലും കണ്ണുതുറന്നിരിക്കുവന്റെ പേരു പറയാത്തവര്‍ക്കു പന്തീരായിരം കടം-

മീന്‍ .

10)ഉച്ചിക്കുടുമ്മന്‍ ചന്തയ്ക്കു പോയി-

കൈതച്ചക്ക.

📗📗

👫E) എളുപ്പത്തിൽ ഒരു ചിത്രം വരയ്ക്കാം (46)

അവതരണം:

സൈമ ശങ്കർ, മൈസൂർ

➖➖➖➖➖➖➖➖➖➖➖
👬👭👫👭👬👭👫👭👬👭