🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 27 | വെള്ളി ✍ പ്രൊഫസ്സർ എ.വി. ഇട്ടി മാവേലിക്കര

അറിവിന് ആധാരമായിരിക്കുന്ന വിനയം
————————————————————

തൻ്റെ ശിഷ്യനാകാൻ എത്തിയ യുവാവാനോടു ഗുരു പറഞ്ഞു: “നിനക്ക് അറിയാവുന്ന കാര്യങ്ങളും, അറിവില്ലാത്ത കാര്യങ്ങളും ഒരു കടലാസിൽ എഴുതിക്കൊണ്ടു വരിക.
നിനക്കറിയാവുന്ന കാര്യങ്ങൾ പറഞ്ഞു സമയം പഴാക്കാതിരിക്കാമല്ലോ?”

ആലോചിച്ചു തുടങ്ങിയ യുവാവ് , ആകെ ചിന്താക്കുഴപ്പത്തിലായി. ദൈവത്തെക്കുറിച്ചറിയാം; ദൈവത്തെ അറിയില്ല! സഹോദരനെക്കുറിച്ചറിയാം;
സഹോദരനെ അറിയില്ല! അയാൾ ഗുരുവിൻ്റെ അടുത്തെത്തിപ്പറഞ്ഞു: “എനിക്ക്, ഒന്നുമറിയില്ല!” ഗുരു പറഞ്ഞു: “ഇനിയും നമുക്കു പഠനം തുടങ്ങാം. ഒന്നുമറിയില്ല എന്ന തിരിച്ചറിവാണ്, പoനത്തിന് ആദ്യം വേണ്ടത് “.

എല്ലാ അറിവുകളും, വിഷയ കേന്ദ്രീകൃതവും, സന്ദർഭാനുസൃതമുളളതും ആണ്. ആഴത്തിലുള്ള ഗവേഷണം പോലും, നിർദ്ദേശങ്ങൾക്കും നിബന്ധനകൾക്കും വിധേയമായിട്ടാണു നിർവ്വഹിക്കപ്പെടുക.
പര്യവേഷണങ്ങളുടെ പരിധിയിൽ നിന്നു കൊണ്ടു നേടിയ അറിവിൻ്റെ പേരിൽ അഹങ്കരിക്കുന്നവർ, തങ്ങൾ നേടിയ അറിവ്, ഒരു സർവ്വവിജ്ഞാന കോശത്തിൽ ശേഖരിച്ചു വച്ചിരിക്കുന്ന അറിവുമായി തട്ടിച്ചു നോക്കണം. അപ്പോൾ മനസ്സിലാകും, ആ അറിവ് എത്രയോ ചെറുതാണെന്ന്. സ്വന്തം കണ്ടെത്തൽ എന്നു പറഞ്ഞ് ഒരാൾ അവകാശപ്പെടുന്ന പലതും, രൂപഭേദങ്ങളോടെ മുമ്പേ നിലനിന്നിരുന്നതാകാം?

ഒന്നുമറിയാത്ത ആരെങ്കിലുമുണ്ടോ എന്ന ചോദ്യം പോലെ തന്നെ പ്രസക്തമാണ്, എല്ലാമറിയുന്ന ആരെങ്കിലുമുണ്ടോ എന്ന ചോദ്യവും. ഇനിയും പലതുമറിയാനുണ്ട് എന്ന മനോഭവത്തിൽ നിന്നുകൊണ്ടു മാത്രമേ, അറിവു തേടിയുള്ള അന്വേഷണം ആരംഭിക്കാനാകയുള്ളൂ. വിദ്യാഭ്യാസത്തെ, – ‘തൊഴിലധിഷ്ഠിതം’ മാത്രമായി ചുരുക്കുമ്പോൾ, അറിവു ചില വിഷയങ്ങളെ മാത്രം അധികരിച്ചാകും നേടുക. അങ്ങനെ സമ്പാദിക്കുന്ന അറിവിന്, ഒരു തൊഴിൽ നേടുന്നതോടെ, പൂർണ വിരാമവും സംഭവിച്ചെന്നിരിക്കും. ജീവിതത്തിൻ്റെ ആദ്യ മൂന്നാലൊന്നു ഭാഗം കൊണ്ടു നേടിയ അറിവുകൾക്കൊണ്ടു്, പിന്നീടുള്ള മൂന്നിൽ രണ്ടു ഭാഗം ജീവിച്ചു തീർക്കാൻ ശ്രമിക്കുന്നത് വ്യക്തിപര പരാജയം മാത്രമല്ല, സാമൂഹിക ദുരന്തം കൂടിയാണ്.

ചില പഠനങ്ങൾ തുടർച്ചയായിരിക്കും; ചിലതു പഴയതിൻ്റെ അവസാനവും, പുതിയതിൻ്റെ ആരംഭവും. മറ്റു ചിലതു്, മുമ്പു പഠിച്ചതിൻ്റെ ഓർമ്മ പുതുക്കലും, തീർച്ചപ്പെടുത്തലുമായിരിക്കും. എല്ലാ അധ്യയനങ്ങളിലും, സന്നദ്ധവും സുതാര്യവുമായ മനസ്സാണു പ്രധാനം.
സ്വയം ശൂന്യരാക്കാനും, എന്തിനേയും സ്വീകരിക്കാനും തയ്യാറുള്ളവർക്കേ, ജ്ഞാനസമ്പാദനം കുറച്ചെങ്കിലും സാദ്ധ്യമാകൂ.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര