🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 25 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

സ്വാതന്ത്ര്യം ആർക്കും അടിയറ വയ്ക്കരുത്
———————————————————

അഴകുള്ള, സംസാരിക്കുന്ന ഒരു തത്തയെ പിടിച്ച് രാജാവു സ്വർണ്ണക്കൂട്ടിലടച്ചു. ധാരാളം പഴങ്ങളും മറ്റും നൽകിയ ശേഷം, രാജാവു തത്ത സംസാരിക്കുന്നതു കേൾക്കാൻ കാത്തിരുന്നു. പക്ഷെ, സ്വതന്ത്ര ആകാശത്തെ സ്നേഹിച്ചിരുന്ന തത്ത, മിണ്ടിയതേയില്ല. എങ്ങനെയെങ്കിലും കൂട്ടിൽ നിന്നു രക്ഷപെടണം എന്നു മാത്രമായിരുന്നു അതിൻ്റെ ചിന്ത! എല്ലാ അടവുകളും പരാജയപ്പെട്ടപ്പോൾ, തത്തമ്മ കൊട്ടാര രഹസ്യങ്ങളെല്ലാം വിളിച്ചു പറയാൻ ആരംഭിച്ചു. സഹികെട്ട രാജാവ്, അവസാനം തത്തമ്മയെ തുറന്നു വിട്ടു!

പുറത്തു കാത്തു നിന്നിരുന്ന മറ്റൊരു തത്ത, അവളെ കുറ്റപ്പെടുത്തിക്കൊണ്ടു പറഞ്ഞു: “സ്വർണ്ണ കൂട്ടിൽ കിടക്കണമെങ്കിലും, ഭാഗ്യം വേണം. രാജാവു പറയുന്നതുമനുസരിച്ചു ജീവിക്കുന്നതിൽ എന്താണിത്ര കുഴപ്പം?” തുറന്നു കിടന്നിരുന്ന കൂട്ടിനകത്ത്, അതു കയറി. പുറത്തുവന്ന തത്തയാകട്ടെ, നീലാകാശത്തേക്കു പറന്നുയർന്നു!

അനുസരിക്കണം; പക്ഷെ, അടിമകളാകരുത്. സ്വതന്ത്രമായ ചിന്തകളും, സ്വന്തമായ നിലപാടുകളുമാണ് ഓരേരുത്തരേയും വ്യത്യസ്ഥരാക്കുന്നത്. അവ പണയം വച്ച്, അടിമത്വം സ്വീകരിക്കുന്നവർ, സ്വന്തം അസ്തിത്വത്തിനു പോലും വില കല്പിക്കാത്തവരാണ് അടിമകളാക്കുന്നവർ, ആഹാരം മാത്രം നൽകി വളർത്തും. ചിന്തിക്കാനോ, ചോദ്യം ചോദിക്കാനോ ഉള്ള ശേഷി, അവർ മുളയിലെ നുള്ളിക്കളയും. തങ്ങൾ പറയുന്നതെന്തും, ആലോചനകളൊന്നുമില്ലാതെ, അനുസരിക്കാൻ തക്കവിധം,
‘കൂട്ടിലുള്ളവരെ’, അവർ പാകപ്പെടുത്തും. അടിമത്വം ഒരു അവസരമായി, കൂട്ടിലുള്ളവർ സ്വീകരിക്കുകയും ചെയ്യും.

സ്വന്തം സ്വതന്ത്ര്യത്തെ മറക്കുന്നവരെല്ലാം, മുട്ടിലിഴയേണ്ടി വരും. അവർക്ക് ഒരിക്കലും, പുതിയ മേച്ചിൽ പുറങ്ങളോ, പുതിയ അനുഭവങ്ങളോ, ഉണ്ടാകയില്ല. അനാവശ്യമായ വിധേയത്വം, അസ്ഥാനത്തു പോലും കാണിക്കുന്നവർ, നിർഗുണരും കാര്യശേഷിയില്ലാത്തവരുമാണ്. സ്വന്തം അഭിപ്രായങ്ങൾ പറയുകയും, വിയോജിപ്പുകൾ രേഖപ്പെടുത്തുകയും ചെയ്യുന്നവർക്കു മാത്രമേ, തങ്ങളുടെ സ്വാതന്ത്ര്യം, ആർക്കും പണയപ്പെടുത്താതെ, ജീവിക്കുവാനാകൂ. നമുക്കും അതിനാകട്ടെ..

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര