🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 11 | ബുധൻ ✍ പ്രൊഫസ്സർ എ.വി. ഇട്ടി മാവേലിക്കര

ദൈവീകരായിതീരാൻ നമുക്കാകട്ടെ
—————————————————-

ഒരു കൂട്ടം യാത്രീകർ വഴിതെറ്റി മരുഭൂമിയിലെത്തി. അവർ വിശന്നു ദാഹിച്ച് അവശരായിരുന്നു. അവരിൽ രണ്ടു പേർ, കുറച്ചകലെ ഒരു മതിൽ കണ്ട്, അതുലക്ഷ്യമാക്കി നടന്നു. അടുത്തുചെന്നപ്പോൾ, മതിലിനകത്തു നിന്നും വെള്ളമൊഴുകുന്നതിൻ്റെയും, പക്ഷികൾ പാടുന്നതിൻ്റെയും ഒക്കെ ശബ്ദം അവർ കേട്ടു. മതിലിനു മുകളിലായി, ഒരു മരത്തിൽ ധാരാളം പഴങ്ങൾ തൂങ്ങിക്കിടക്കുന്നതും അവർ കണ്ടു. ഒന്നാമൻ, സർവ്വ ശക്തിയുമെടുത്തു മതിൽ ചാടി അപ്പുറത്തെത്തി. എന്നാൽ, രണ്ടാമൻ അവർക്കൊപ്പമുണ്ടായിരുന്ന മറ്റു യാത്രീകരേയും കൂടി വിളിച്ചു കൊണ്ടു വരാനായി, അവരെത്തേടി പുറപ്പെട്ടു.

ആദ്യമെത്തുന്നതാകണമെന്നില്ല, മികവിൻ്റെ അടയാളം. ഒന്നാമനാകാൻ, പരിശീലനം കൊണ്ടു കഴിയും. എന്നാൽ, ഒന്നാമതാകാൻ സാദ്ധ്യതയില്ലത്തവരെക്കൂടെ, അവിടെയെത്തിക്കാൻ, സഹിഷ്ണതയും സഹാനുഭൂതിയും കൂടി ഉണ്ടാകണം. എല്ലാവരും കൂടി ഒരുമിച്ചു നേടുമ്പോഴുള്ള ആത്മസംതൃപ്തി അനുഭവിച്ചിട്ടുള്ളവരാരും, ഒറ്റയ്ക്കു നേടുന്നതിനെക്കുറിച്ചു ചിന്തിക്കുകയില്ല.

മറ്റുള്ളവരെ വീഴ്ത്തിയും തോൽപിച്ചും നേടുന്ന കിരീടങ്ങൾ മാത്രം, ഉൽകൃഷ്ടതയുടെ അടയാളങ്ങളായി കാണുന്നവരുടെ ഇടയിൽ, ഒപ്പമുള്ളവരെ പരിഗണിക്കുന്നവർ കാണുകയില്ല. മുന്നോട്ടു നോക്കിയോടാൻ, മത്സരക്ഷമത മതി. പിറകോട്ടു കൂടി നോക്കണമെങ്കിൽ, ഹൃദയവിശാലതയും പരക്ഷേമ താൽപര്യവും,
ഉണ്ടായിരിക്കണം.

നിവൃത്തികേടിൻ്റെ സമയത്തു ലഭിക്കുന്ന പിടിവള്ളിയിൽ, മറ്റൊന്നും ചിന്തിക്കാതെ ചാടിപ്പിടിക്കുക എന്നതു മാനുഷീകം. പക്ഷെ, രക്ഷപെടാനുള്ള അവസാന വഞ്ചി വരുമ്പോൾ, കൂടെയുള്ളവർക്കെല്ലാം, അതിൽ സ്ഥലമുണ്ടെന്നുറപ്പു വരുത്തുന്നതു ദൈവീകം. നമുക്കു ദൈവീകരാകാൻ പരിശ്രമിക്കാം.

സർവ്വേശ്വരൻ സഹായിക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര