🌹 “ഇന്നത്തെ ചിന്താവിഷയം” 🌹 – 2024 | ഡിസംബർ 05 | വ്യാഴം ✍ പ്രൊഫസ്സർ എ.വി. ഇട്ടി മാവേലിക്കര

നഷ്ടക്കച്ചവടങ്ങൾക്ക് ഒരുമ്പെടാനും
നാം തയ്യാറായി ഇരിക്കണം
———————————————————-

ഒരു പെൺകുട്ടി സുഖമില്ലാതെ, ആശുപത്രിയിലായിരുന്നു. കൂടെയുണ്ടായിരുന്ന അവളുടെ ഇളയ സഹോദരനോടു ഡോക്ടർ പറഞ്ഞു:
”ചേച്ചിയുടെ അസുഖം ഭേദമാകാൻ ഒറ്റ വഴിയേയുള്ളു. നിൻ്റെ രക്തം ചേച്ചിക്കു നൽകണം!” പേടിച്ചു പോയെങ്കിലും, അവൻ പറഞ്ഞു: “രക്തം നൽകാൻ ഞാൻ റെഡി!” രക്തം നൽകി കുറച്ചു നേരം കഴിഞ്ഞപ്പോൾ, അവൻ ഡോക്ടറോടു ചോദിച്ചു: “ഡോക്ടറെ, ഞാനിനി എത്ര സമയം കൂടി ജീവിച്ചിരിക്കും?”
അതു കേട്ടു ചിരി വന്നെങ്കിലും, ഡോക്ടർക്കു്ക്ക്, അവൻ്റെ ഭയം എത്രത്തോള
മായിരുന്നുവെന്നു മനസ്സിലായി. ഒപ്പം, അതിനിടയിലും രക്തം നൽകാൻ തയ്യാറായ അവൻ്റെ സ്നേഹത്തേക്കുറിച്ച് ഏറെ മതിപ്പും, അദ്ദേഹത്തിൽ രൂപപ്പെട്ടു.

നഷ്ടക്കച്ചവടമാണെന്നറിഞ്ഞു കൊണ്ടു തന്നെ, ചില ഇടപാടുകൾ നടത്തുന്നവരുണ്ട്.
ഒരു ലാഭവുമില്ലാതിരുന്നിട്ടും, ചില ബന്ധങ്ങൾ എക്കാലവും കാത്തുസൂക്ഷിക്കുന്നവരുമുണ്ട്. വിശദീകരിക്കാനാവാത്ത ചില കാരണങ്ങളാകും, അവയുടെയെല്ലാം പ്രേരണ. കണക്കുകളും രേഖകളുമില്ലാതെ സൗഹൃദം പരിപോഷിപോഷിപ്പിക്കുന്നവർ വിഡ്ഢികളല്ല. അവർ മറ്റെന്തിനേക്കാളും വിലമതിക്കുന്നതു ബന്ധങ്ങളായിരിക്കും.

സ്വന്തം കാര്യങ്ങൾ നോക്കാനറിയാത്തവരെയൊക്കെ വിഡ്ഢികൾ എന്നു മാത്രമേ, ലോകം വിശേഷിപ്പിക്കൂ. എന്നാൽ, അതിനൊരു മറുവശമുള്ളതു കാണാതിരുന്നു കുടാ. സ്വന്തം ഇഷ്ടങ്ങളും മുൻഗണനകളും അവഗണിച്ച് ഇറങ്ങിത്തിരിക്കുന്നവരുടെ പേരുകൾ മാത്രമേ, ചരിത്രം രേഖപ്പെടുത്തി വയ്ക്കാറുള്ളൂ. തൻകാര്യ തൽപരർക്കെല്ലാം, തന്നിഷ്ടത്തിനുള്ള തൻ്റേടമുണ്ടായിരിക്കും. എന്നാൽ, സ്വന്തം താൽപര്യങ്ങളക്കാൾ, മറ്റുള്ളവരുടെ ഇല്ലായ്മകളിലേക്കു ശ്രദ്ധ തിരിക്കണമെങ്കിൽ, ഒരാൾക്ക് മനസ്സലിവും, ആർദ്രതയും ഏറെയുണ്ടായിരിക്കണം.

ഒന്നും ലഭിക്കില്ലെന്നു മാത്രമല്ല, കയ്യിലുള്ളതു നഷ്ടപ്പെടുകയും ചെയ്യുമെന്ന ഉറപ്പോടെ, മറ്റുള്ളവരെ സഹായിക്കാൻ ഇറങ്ങിപ്പുറപ്പെടുന്നവർക്ക് നാം എന്തു പകരം നൽകും? അവരുടെ ഏക ലക്ഷ്യം, മറ്റുള്ളവരുടെ ജീവിതം സമ്പന്നമാക്കുക എന്നതു മാത്രമായിരിക്കും. നമുക്കും അതിനായിരുന്നുവെങ്കിൽ..?

സർവ്വശക്തൻ തുണയ്ക്കട്ടെ..
എല്ലാവർക്കും നന്മകൾ നേരുന്നു.
നന്ദി, നമസ്ക്കാരം.

പ്രൊഫസ്സർ എ.വി. ഇട്ടി മാവേലിക്കര